વ્યૂહાત્મક રીતે અત્યંત મહત્વપૂર્ણ એવા ઉત્તર-પશ્ચિમ દરિયાકાંઠા પર ભારતીય કોસ્ટ ગાર્ડના ઓપરેશનલ ઇન્ફ્રાસ્ટ્રક્ચરને વધુ મજબૂત બનાવતા, કોસ્ટ ગાર્ડ રિજનના કમાન્ડર ઇન્સ્પેક્ટર જનરલ ટી શશી કુમાર, ટીએમ દ્વારા 02 જુલાઈ 2026ના રોજ પોરબંદરમાં આઈસીજી જેટીના વિસ્તરણનું ઉદ્ઘાટન કરવામાં આવ્યું હતું. આ વિસ્તરણથી જેટીની લંબાઈ 175 મીટરથી વધીને 275 મીટર થઈ ગઈ છે, જેનાથી બર્થિંગ ક્ષમતા (જહાજ લાંગરવાની ક્ષમતા), લોજિસ્ટિક્સ સપોર્ટ અને ઓપરેશનલ સજ્જતામાં નોંધપાત્ર વધારો થયો છે. આ અપગ્રેડ કરાયેલી સુવિધાથી વધારાના કોસ્ટ ગાર્ડ જહાજોને એકસાથે લાંગરી શકાશે, જે દરિયાઈ દેખરેખ, દરિયાકાંઠાની સુરક્ષા અને દરિયાઈ આકસ્મિક પરિસ્થિતિઓ માટે ઝડપી ટર્નઅરાઉન્ડ અને સતત તૈનાતી સુનિશ્ચિત કરશે.

વ્યૂહાત્મક દ્રષ્ટિએ મહત્વ ધરાવતા પશ્ચિમી દરિયાકાંઠા પર આવેલું પોરબંદર, ભારતીય કોસ્ટ ગાર્ડ માટે દરિયાઈ સલામતી, સુરક્ષા અને પર્યાવરણીય સંરક્ષણને સક્ષમ બનાવતો એક મુખ્ય દરિયાઈ સુરક્ષા અને ઓપરેશનલ બેઝ (કાર્યકારી મથક) તરીકે સેવા આપે છે. જેટીના આ વિસ્તૃત ઇન્ફ્રાસ્ટ્રક્ચરથી ઈઈઝેડ (EEZ - વિશિષ્ટ આર્થિક ક્ષેત્ર) માં જહાજોની સતત તૈનાતી, આઈએમબીએલ (IMBL - આંતરરાષ્ટ્રીય દરિયાઈ સરહદ રેખા) ની નજીકના વિસ્તારોમાં કામગીરી અને કટોકટીના સમયે ઝડપી પ્રતિભાવ આપવામાં સરળતા રહેશે. આ મહત્વપૂર્ણ ઇન્ફ્રાસ્ટ્રક્ચર પ્રોજેક્ટનું સફળતાપૂર્વક પૂર્ણ થવું એ ગુજરાત મેરિટાઇમ બોર્ડ, IIT મદ્રાસ અને મિલિટરી એન્જિનિયર સર્વિસીસ વચ્ચેના અનુકરણીય સહયોગને પ્રતિબિંબિત કરે છે, જેમના સામૂહિક જ્ઞાન અને કુશળતાએ એક મહત્વપૂર્ણ ઓપરેશનલ જરૂરિયાતને આધુનિક દરિયાઈ સંપત્તિમાં પરિવર્તિત કરી છે.

આ વિસ્તૃત જેટી ભારતના દરિયાઈ સરહદોની રક્ષા કરવા, દરિયાકાંઠાની સંપત્તિઓનું રક્ષણ કરવા, માછીમારો/ખલાસીઓની સુરક્ષા સુનિશ્ચિત કરવા અને ગુજરાતના દરિયાકાંઠે ઉભરતા દરિયાઈ પડકારોનો ઝડપથી સામનો કરવા માટે ભારતીય કોસ્ટ ગાર્ડની ક્ષમતાને મજબૂત કરશે. ઓપરેશનલ ઇન્ફ્રાસ્ટ્રક્ચરમાં થયેલો આ વધારો દેશના દરિયાઈ ક્ષેત્રની રક્ષા કરવા અને ઉત્તર-પશ્ચિમ મેરિટાઇમ સેક્ટરમાં સુરક્ષિત અને સતર્ક દરિયાકાંઠાનું વાતાવરણ જાળવી રાખવા માટે ભારતીય કોસ્ટ ગાર્ડની અડગ પ્રતિબદ્ધતાને પુનઃપુષ્ટ કરે છે.

આ ઉપરાંત, કોસ્ટ ગાર્ડ રિજન (ઉત્તર-પશ્ચિમ) ના કમાન્ડરે M/s SDHIL પીપાવાવ ખાતે કોસ્ટ ગાર્ડના જહાજોના ચાલી રહેલા સમારકામ અને આધુનિકીકરણની પ્રગતિની સમીક્ષા કરી હતી. તેમણે ICGS સમુદ્ર પાવક અને  ICGS આર્યમન જહાજો પર રૂબરૂ મુલાકાત લીધી હતી, જે બાદ ICGના અધિકારીઓ અને રિફિટના હિસ્સેદારો સાથે આંતરિક બેઠક યોજી હતી. આ બેઠકમાં રિફિટની કામગીરી સમયસર પૂર્ણ કરવા સંબંધિત મુદ્દાઓ પર ચર્ચા કરવામાં આવી હતી અને આ સમસ્યાઓના વહેલા ઉકેલ માટે વહેલી તકે લેવાના પગલાં અંગેના વિચારો શેર કરવામાં આવ્યા હતા.

 

SM/BS/GP/JD

સોશિયલ મીડિયા પર અમને ફોલો કરો :  @PIBAhmedabad    /pibahmedabad1964    /pibahmedabad  pibahmedabad1964[at]gmail[dot]com

(रिलीज़ आईडी: 2280602) आगंतुक पटल : 22