ઇન્ડિયન ઇન્સ્ટિટ્યૂટ ઓફ ટેક્નોલોજી ગાંધીનગર (IITGN) દ્વારા આજે હેલિપેડ એક્ઝિબિશન સેન્ટર (HEC), ગાંધીનગર ખાતે તેના 15મા પદવીદાન સમારોહનું આયોજન કરવામાં આવ્યું હતું, જેમાં 733 વિદ્યાર્થીઓ સ્નાતક થયા હતા અને અંડરગ્રેજ્યુએટ, પોસ્ટગ્રેજ્યુએટ તેમજ ડોક્ટરલ કાર્યક્રમોમાં કુલ 734 પદવીઓ એનાયત કરવામાં આવી હતી.

આ પદવીદાન પ્રવચન એક્સિસ બેંકના ચીફ ઇકોનોમિસ્ટ, યુનિક આઇડેન્ટિફિકેશન ઓથોરિટી ઓફ ઇન્ડિયા (UIDAI) ના ચેરમેન અને ટેલિકોમ રેગ્યુલેટરી ઓથોરિટી ઓફ ઇન્ડિયા (TRAI) ના સભ્ય નીલકંઠ મિશ્રા દ્વારા આપવામાં આવ્યું હતું, જેઓ આ દીક્ષાંત સમારોહમાં ગરિમાપૂર્ણ ઉપસ્થિતિ રહ્યા હતા. ગેસ્ટ ઓફ ઓનર તરીકે એશિયન ઇન્સ્ટિટ્યૂટ ઓફ ટેક્નોલોજી (AIT) ના પ્રેસિડેન્ટ પ્રો. પાઈ-ચી લી વર્ચ્યુઅલી જોડાયા હતા. આ ઉપરાંત બોર્ડ ઓફ ગવર્નર્સના સભ્યો, ફેકલ્ટી, સ્ટાફ, ભૂતપૂર્વ વિદ્યાર્થીઓ, પદવી મેળવનારા વિદ્યાર્થીઓ અને તેમના પરિવારો ઉપસ્થિત રહ્યા હતા.

સ્નાતક થયેલી આ બેચમાં ભારતના 26 રાજ્યો અને કેન્દ્રશાસિત પ્રદેશોના 225 મહિલા અને 508 પુરુષ વિદ્યાર્થીઓ તેમજ મોરેશિયસ અને નેપાળના આંતરરાષ્ટ્રીય વિદ્યાર્થીઓ સામેલ હતા. સંસ્થા દ્વારા 107 પીએચડી (PhD) પદવીઓ એનાયત કરવામાં આવી હતી, જે આઈઆઈટી ગાંધીનગર ખાતે સંશોધન, નવીનતા (ઇનોવેશન) અને આંતર-વિદ્યાશાખાકીય (ઇન્ટરડિસિપ્લિનરી) શિક્ષણ પર સતત આપવામાં આવતા ભારને પ્રતિબિંબિત કરે છે. વિદ્યાર્થીઓ પીએચડી, એમટેક, બીટેક-એમટેક ડ્યુઅલ ડિગ્રી પ્રોગ્રામ્સ, એમએસસી, એમએ, એક્ઝિક્યુટિવ માસ્ટર્સ, PGDIIT, ડ્યુઅલ મેજર બીટેક, બીટેક અને બીએસસીમાંથી સ્નાતક થયા હતા. આ ઉપરાંત, બીટેક-એમટેક ડ્યુઅલ ડિગ્રી પ્રોગ્રામમાંથી પાસ આઉટ થયેલા એક વિદ્યાર્થીને બીટેક અને એમટેક બંને પદવી એનાયત કરવામાં આવી હતી, જેથી એનાયત કરાયેલી કુલ પદવીઓની સંખ્યા 734 થઈ હતી. આ પદવીદાન સમારોહ એક્ઝિક્યુટિવ માસ્ટર્સ પ્રોગ્રામ, ઇન્ટિગ્રેટેડ સર્કિટ ડિઝાઇન એન્ડ ટેક્નોલોજીમાં એમટેક અને આર્ટિફિશિયલ ઇન્ટેલિજન્સમાં એમટેકની પ્રથમ બેચના દીક્ષાંતને પણ ચિહ્નિત કરે છે.

દીક્ષાંત સમારોહના મુખ્ય અતિથિ, એક્સિસ બેંકના ચીફ ઇકોનોમિસ્ટ, યુનિક આઇડેન્ટિફિકેશન ઓથોરિટી ઓફ ઇન્ડિયા (UIDAI) ના ચેરમેન અને ટેલિકોમ રેગ્યુલેટરી ઓથોરિટી ઓફ ઇન્ડિયા (TRAI) ના સભ્ય નીલકંઠ મિશ્રાએ વર્ષ 2026ની સ્નાતક બેચને સંબોધતા ભારતની અનન્ય આર્થિક તકો, મધ્યમ આવકની જાળમાંથી બહાર નીકળવાના પડકારો અને દેશને ટેક્નોલોજી તથા પ્રોડક્ટ સંચાલિત રાષ્ટ્ર બનાવવાની જરૂરિયાત વિશે વાત કરી હતી. તેમણે ભારપૂર્વક જણાવ્યું હતું કે ભારત માત્ર વૈશ્વિક પ્રવાહો કે વિદેશી ટેક્નોલોજી પર નિર્ભર રહી શકે નહીં, પરંતુ તેણે પોતાની આગવી ઇનોવેશન ઇકોસિસ્ટમ ઊભી કરવી પડશે, ડીપટેક ક્ષમતાઓમાં રોકાણ કરવું પડશે અને બહુવિધ વ્યૂહાત્મક ક્ષેત્રોમાં વૈશ્વિક સ્તરે સ્પર્ધાત્મક ઉત્પાદનો વિકસાવવા પડશે.

તેમણે કહ્યું કે ભારતનું ભવિષ્ય માત્ર નીતિ ઘડવૈયાઓ અને અર્થશાસ્ત્રીઓ દ્વારા જ નહીં પરંતુ આજના યુવાનો દ્વારા લેવામાં આવતા નિર્ણયોથી ઘડાશે અને તેમણે સ્નાતકોને જોખમ ઉઠાવવા, ટેક્નોલોજીકલ શ્રેષ્ઠતા પ્રાપ્ત કરવા અને આત્મનિર્ભર તથા વૈશ્વિક સ્તરે સ્પર્ધાત્મક ભારતનું નિર્માણ કરવા વિનંતી કરી હતી.

"ભારત એક ટેક્નોલોજીકલ સુપરપાવર બનવાની સફર રાજકારણીઓ, અમલદારો કે અર્થશાસ્ત્રીઓ દ્વારા નક્કી કરવામાં આવશે નહીં. આ આજના આ દીક્ષાંત હોલમાં બેઠેલા યુવાન પુરુષો અને મહિલાઓના નિર્ણયો દ્વારા નક્કી થશે. સરળ રસ્તો પસંદ કરશો નહીં. પડકારોને સ્વીકારો, કંઈક અર્થપૂર્ણ મેળવવાની સફરમાં નિષ્ફળ જવાની હિંમત રાખો અને એવા ભારતનું નિર્માણ કરવામાં મદદ કરો જે સુરક્ષિત, આત્મનિર્ભર અને તકનીકી રીતે મજબૂત હોય," તેમ તેમણે પોતાનો અભિપ્રાય આપતા જણાવ્યું હતું.

એશિયન ઇન્સ્ટિટ્યૂટ ઓફ ટેક્નોલોજી (AIT) ના પ્રેસિડેન્ટ પ્રો. પાઈ-ચી લીએ ગેસ્ટ ઓફ ઓનર તરીકે સેવા આપી હતી અને વર્ચ્યુઅલી દીક્ષાંત સમારોહને સંબોધિત કરતી વખતે, સ્નાતકોને તેમની સિદ્ધિઓ બદલ અભિંદન પાઠવ્યા હતા અને તેમની સતત સફળતા અને પ્રગતિ માટે શુભેચ્છાઓ પાઠવી હતી.

એઈમ્સ (AIIMS) રાજકોટના એક્ઝિક્યુટિવ ડિરેક્ટર ડૉ. એલ. એન. દોરાઈરાજન, જેઓ ગેસ્ટ ઓફ ઓનર તરીકે ઉપસ્થિત રહ્યા હતા, તેમણે એવોર્ડ વિતરણ સમારોહની અધ્યક્ષતા કરી હતી.

સ્નાતક થયેલી બેચને અભિનંદન આપતાં આઈઆઈટી ગાંધીનગરના ડિરેક્ટર પ્રો. રજત મૂનાએ જણાવ્યું હતું કે, “આપણા વિદ્યાર્થીઓ આઈઆઈટી ગાંધીનગરમાંથી માત્ર પદવીઓ લઈને જ નથી જઈ રહ્યા, પરંતુ ગંભીરતાપૂર્વક વિચારવાની, સતત શીખવાની અને સમાજમાં અર્થપૂર્ણ યોગદાન આપવાની ક્ષમતા સાથે સ્નાતક થઈ રહ્યા છે.” પ્રો. મૂનાએ વિશ્વાસ વ્યક્ત કર્યો હતો કે વિદ્યાર્થીઓ પોતપોતાના ક્ષેત્રો અને સમુદાયોમાં સકારાત્મક પ્રભાવ પાડવા માટે તેમના જ્ઞાન, કૌશલ્ય અને મૂલ્યોનો ઉપયોગ કરશે.

“ટેક્નોલોજી, નવા વિચારો અને નવી તકોથી પ્રેરિત આપણી આ દુનિયા ખૂબ જ ઝડપથી બદલાઈ રહી છે, જેમાં આપણા સ્નાતકો પ્રવેશી રહ્યા છે. અમે આશા રાખીએ છીએ કે તેઓ આ સફરમાં આગળ વધતી વખતે જિજ્ઞાસુ, અનુકૂલનશીલ અને હેતુ-સંચાલિત રહે. આઈઆઈટી ગાંધીનગર ખાતે, અમે માત્ર શૈક્ષણિક શ્રેષ્ઠતાને જ નહીં, પરંતુ પ્રામાણિકતા, સહાનુભૂતિ અને નેતૃત્વના મૂલ્યોને પણ પોષવાનું લક્ષ્ય રાખ્યું છે જે તેમને સમાજમાં અર્થપૂર્ણ યોગદાન આપવા અને ઝડપથી બદલાતી દુનિયાના પડકારોનો સામનો કરવા સક્ષમ બનાવશે,” તેમ તેમણે ઉમેર્યું હતું.

પદવીદાન ઉત્સવના ભાગરૂપે, આઈઆઈટી ગાંધીનગરે 19 જૂનના રોજ તેના વાર્ષિક એવોર્ડ સમારોહમાં વિદ્યાર્થીઓની અસાધારણ સિદ્ધિઓની ઉજવણી કરી હતી, જેમાં વિદ્યાર્થીઓને શિક્ષણ, સંશોધન, નેતૃત્વ, ઇનોવેશન, આંત્રપ્રિન્યોરશિપ (ઉદ્યોગસાહસિકતા), રમતગમત, કલા અને સંસ્કૃતિ તેમજ સામુદાયિક જોડાણ વગેરે ક્ષેત્રોમાં ઉત્કૃષ્ટતા માટે સન્માનિત કરવામાં આવ્યા હતા.

જયદેવ સંજય ખલાણે (બીટેક), શર્મા કન્હૈયા વિજય (એમએસસી અને એમએ) અને આદિત્ય કાંત (એમટેક) ને ઉત્કૃષ્ટ શૈક્ષણિક શ્રેષ્ઠતા, નેતૃત્વના ગુણો અને સર્વાંગી સિદ્ધિઓ માટે 'પ્રેસિડેન્ટ્સ ગોલ્ડ મેડલ' એનાયત કરવામાં આવ્યો હતો.

શંભવી અગ્રવાલ (બીટેક), અક્ષત ખન્ના (પીએચડી), સાયન બેરા (એમએસસી અને એમએ), અને તેજસ કોમલસિંગ ગિરાસે (એમટેક) ને તેમના ઉત્કૃષ્ટ શૈક્ષણિક પ્રદર્શન અને સંસ્થાના સમુદાયમાં યોગદાન બદલ 'ડિરેક્ટર્સ ગોલ્ડ મેડલ' એનાયત કરવામાં આવ્યો હતો.

સ્નાતક થનારા વિદ્યાર્થીઓમાં સૌથી વધુ સંખ્યા ગુજરાત (104) ના વિદ્યાર્થીઓની હતી, ત્યારબાદ મહારાષ્ટ્ર (84), ઉત્તર પ્રદેશ (81), રાજસ્થાન (74), પશ્ચિમ બંગાળ (58), અને મધ્ય પ્રદેશ (40) નો સમાવેશ થાય છે.

એવોર્ડ સમારોહ દરમિયાન કુલ 46 મેડલ અને એવોર્ડ એનાયત કરવામાં આવ્યા હતા, જેમાં ત્રણ પ્રેસિડેન્ટ્સ ગોલ્ડ મેડલ, ચાર ડિરેક્ટર્સ ગોલ્ડ મેડલ, ઉત્કૃષ્ટ સંશોધન માટે ચાર ગોલ્ડ મેડલ, વિવિધ વિદ્યાશાખાઓમાં શૈક્ષણિક ટોપર્સને 20 ઇન્સ્ટિટ્યૂટ ગોલ્ડ મેડલ, ઉત્કૃષ્ટ નેતૃત્વ માટે એક પાયોનિયર બેચ મેડલ અને રમતગમત, ઉદ્યોગસાહસિકતા, વિદ્યાર્થીઓની પહેલ, કલા અને સંસ્કૃતિ તથા સામાજિક સેવા ક્ષેત્રે ઉત્કૃષ્ટતાની માન્યતા આપતા 14 પ્રશંસા પત્રો (કમન્ડેશન એવોર્ડ્સ) નો સમાવેશ થાય છે. અન્ય એવોર્ડ વિજેતાઓમાં સિદ્ધાર્થ સચિન દોશી સામેલ હતા, જેમને ઉત્કૃષ્ટ નેતૃત્વ માટે પાયોનિયર બેચ મેડલ મળ્યો હતો; મોહમ્મદ રાશિદ પઠાણ, જેમને રમતગમતમાં ઉત્કૃષ્ટ પ્રદર્શન માટે પ્રશંસા પત્ર મળ્યું હતું; શ્રીજીત એ નાયર, જેમને ઉત્કૃષ્ટ સંશોધન (પીએચડી) માટે ગોલ્ડ મેડલ મળ્યો હતો; અને ચંદ્રભાન પટેલ, જેમને વિદ્યાર્થી પ્રવૃત્તિઓમાં ઉત્કૃષ્ટ નેતૃત્વ માટે પ્રશંસા પત્ર મળ્યું હતું.

પ્રેસિડેન્ટ્સ ગોલ્ડ મેડલ વિજેતા જયદેવ સંજય ખલાણેએ જણાવ્યું હતું કે, “પ્રેસિડેન્ટ્સ ગોલ્ડ મેડલ મેળવવો એ એક પ્રતિષ્ઠિત સન્માન છે અને એક એવી ક્ષણ છે જેને હું હંમેશા યાદ રાખીશ. આઈઆઈટી ગાંધીનગર ખાતેના મારા અનુભવો ખરેખર પરિવર્તનકારી રહ્યા છે, જેને ઉત્કૃષ્ટ ફેકલ્ટી માર્ગદર્શન, બહુ-વિદ્યાશાખાકીય સંશોધન અને વિશ્વસ્તરીય સુવિધાઓનો ટેકો મળ્યો છે. મારી મહત્વાકાંક્ષા સંશોધન અને વાસ્તવિક દુનિયામાં સકારાત્મક પ્રભાવ પાડવાના અગ્રિમ સ્થાને રહેવાની છે. મારો માર્ગદર્શક સિદ્ધાંત એ છે કે ટેક્નોલોજીએ હંમેશા લોકોને સેવા આપવી જોઈએ. આઈઆઈટી ગાંધીનગરે મને માત્ર શિક્ષણ જ નહીં પરંતુ જીવનનો એક હેતુ આપ્યો છે.”

ડિરેક્ટર્સ ગોલ્ડ મેડલ (બીટેક) અને ઇલેક્ટ્રિકલ એન્જિનિયરિંગમાં ઇન્સ્ટિટ્યૂટ ગોલ્ડ મેડલ મેળવનાર શંભવી અગ્રવાલે જણાવ્યું હતું કે, “મારા કામ અને સિદ્ધિઓ બદલ સંસ્થા દ્વારા માન્યતા મળવી એ અદ્ભુત છે. મેં વિચાર્યું નહોતું કે મને બે મેડલ મળશે, જે આ ક્ષણને વધુ વિશેષ બનાવે છે. મને આઈઆઈટી ગાંધીનગર ખાતે શિક્ષણ અને સંશોધન, રમતગમત, કલા અને સંસ્કૃતિ તેમજ નેતૃત્વમાં મારા રસના વિષયોને આગળ ધપાવવા માટે એક પ્લેટફોર્મ પૂરું પાડવામાં આવ્યું હતું. આ સંસ્થાએ મને વ્યવસાયિક અને વ્યક્તિગત બંને રીતે વિકાસ કરવાની તક આપી છે અને મેં એવા મિત્રો અને યાદો બનાવી છે જેને હું હંમેશા દિલમાં સાચવી રાખીશ. હું ટૂંક સમયમાં ક્વાલકોમ (Qualcomm) માં સોફ્ટવેર એન્જિનિયર તરીકે જોડાવાની છું અને ભવિષ્યમાં માસ્ટર્સ ડિગ્રી મેળવવાની આશા રાખું છું.”

સંસ્થાએ પ્રો. ડી. પી. રોય અને પ્રો. જી. કે. શર્માને આઈઆઈટી ગાંધીનગરના વિકાસમાં તેમના વિશિષ્ટ યોગદાન બદલ પ્રતિષ્ઠિત 'ઇન્સ્ટિટ્યૂટ ફેલો એવોર્ડ' એનાયત કર્યો હતો. આ એવોર્ડ, જે સંસ્થાના સર્વોચ્ચ સન્માનોમાંનો એક માનવામાં આવે છે, તેવા વ્યક્તિઓને આપવામાં આવે છે જેમનું નેતૃત્વ, સેવા અને યોગદાન ભવિષ્યની પેઢીઓને પ્રેરણા આપતું રહે છે.

ઘણા વર્ષોથી, આઈઆઈટી ગાંધીનગરે શિક્ષણ પ્રત્યેના તેના આંતર-વિદ્યાશાખાકીય અભિગમ, સંશોધન અને નવીનતા પર મજબૂત ભાર અને જીવંત વિદ્યાર્થી સંસ્કૃતિ સાથે ભારતમાં પ્રતિષ્ઠિત ઉચ્ચ શિક્ષણ સંસ્થાઓમાં પોતાનું એક આગવું સ્થાન બનાવ્યું છે. આ વર્ષનો પદવીદાન સમારોહ આ મૂલ્યોને પ્રતિબિંબિત કરતો હતો, જેમાં વર્ષ 2026ની બેચની સિદ્ધિઓની ઉજવણી કરવામાં આવી હતી.

આ સમારોહ દીક્ષાંત શપથ અને રાષ્ટ્રગીત સાથે સંપન્ન થયો હતો.

અન્ય વિદ્યાર્થીઓના પ્રતિભાવો નીચે મુજબ છે:

ડિરેક્ટર્સ ગોલ્ડ મેડલ (પીએચડી) એનાયત મેળવનાર અક્ષત ખન્નાએ જણાવ્યું હતું કે, “ડિરેક્ટર્સ ગોલ્ડ મેડલ મેળવવો એ મારા માટે નમ્રતા અને ગૌરવની ક્ષણ છે. આઈઆઈટી ગાંધીનગર ખાતે મારી એમએસસી અને પીએચડી પૂર્ણ કર્યા પછી, આ માન્યતા એક એવી સફરની પૂર્ણાહુતિ જેવી લાગે છે જેણે મને એક સંશોધક અને એક વ્યક્તિ તરીકે ઘડ્યો છે. હું મારા સલાહકાર, ફેકલ્ટી, મિત્રો, સહકર્મીઓ અને પરિવારનો તેમના સતત સહકાર માટે ખૂબ જ આભારી છું. સંશોધન ઉપરાંત, આઈઆઈટી ગાંધીનગરે મારા વ્યક્તિગત વિકાસ માટે અને વિવિધ રસના વિષયોને આગળ ધપાવવા માટેના માર્ગો ખોલ્યા જેણે આ સફરને યાદગાર બનાવી દીધી.”

ડિરેક્ટર્સ ગોલ્ડ મેડલ (એમએસસી અને એમએ) મેળવનાર સાયન બેરાએ જણાવ્યું હતું કે, "ડિરેક્ટર્સ ગોલ્ડ મેડલ મેળવવો એ એક અદ્ભુત સન્માન છે અને તે સખત પરિશ્રમ, જિજ્ઞાસા અને દ્રઢતાનું પ્રતિબિંબ છે જેણે આઈઆઈટી ગાંધીનગર ખાતેની મારી સફરને વ્યાખ્યાયિત કરી છે. મારા શૈક્ષણિક પ્રદર્શન ઉપરાંત, મને એક પબ્લિકેશન અને પેટન્ટમાં સંશોધનમાં યોગદાન આપવાની, સતત બે વર્ષ સુધી ઇન્ટર આઈઆઈટી સ્પોર્ટ્સ મીટમાં એથ્લેટિક્સમાં આઈઆઈટીજીએન (IITGN) નું પ્રતિનિધિત્વ કરવાની અને વિવિધ શૈક્ષણિક તથા આઉટરીચ પ્રવૃત્તિઓમાં સક્રિયપણે ભાગ લેવાની તક મળી. આઈઆઈટીજીએન મારા માટે શિક્ષણથી પર એક સફર રહી છે - વિકાસ, પ્રેરણાદાયી માર્ગદર્શન, અર્થપૂર્ણ મિત્રતા અને અવિસ્મરણીય અનુભવોની સફર. આ સંસ્થાએ મને પોતાના માટે વિચારતા, પડકારોનો સામનો કરતા અને હેતુ સાથે વિજ્ઞાનને આગળ ધપાવતા શીખવ્યું છે. હું આશા રાખું છું કે જ્યારે હું પીએચડી તરફ આગળ વધું અને વૈજ્ઞાનિક સંશોધનમાં નોંધપાત્ર યોગદાન આપું ત્યારે આ મૂલ્યોને આગળ લઈ જઈશ. હું મારા સુપરવાઈઝર, ફેકલ્ટી સભ્યો, મિત્રો, ટીમના સાથીઓ, જ્યુરી સભ્યો અને સમગ્ર આઈઆઈટી ગાંધીનગર સમુદાયનો તેમના સતત સમર્થન અને પ્રોત્સાહન માટે આભાર માનવા માંગું છું."

વિદ્યાર્થી પ્રવૃત્તિઓમાં ઉત્કૃષ્ટ નેતૃત્વ માટે પ્રશંસા પત્ર મેળવનાર ચંદ્રભાન પટેલે જણાવ્યું હતું કે, “આ માન્યતા મેળવીને હું સાચે જ સન્માનિત અનુભવું છું. આ માત્ર મેં એકલાએ કરેલું કામ નથી પરંતુ સ્ટુડન્ટ કાઉન્સિલ અને વિદ્યાર્થીઓની અન્ય પહેલો દ્વારા મેં જેમની સાથે કામ કર્યું છે તે તમામના કાર્યને પ્રતિબિંબિત કરે છે. આઈઆઈટી ગાંધીનગર ખાતેનો મારો સૌથી યાદગાર અનુભવ ઇન્ટર આઈઆઈટી ટેક મીટમાં સંસ્થાની ટુકડીનું નેતૃત્વ કરવાનો હતો જ્યાં અમે અમારું અત્યાર સુધીનું સર્વશ્રેષ્ઠ પ્રદર્શન કર્યું અને અમારો પહેલો ગોલ્ડ મેડલ જીત્યો. કેમ્પસમાં નેતૃત્વની વિવિધ ભૂમિકાઓમાં, હું શીખ્યો કે નેતૃત્વ એટલે અન્ય લોકોને સફળ થવામાં મદદ કરવી, સાથે મળીને કામ કરવું અને જવાબદારી લેવી. હું ઉચ્ચ અભ્યાસ માટે આગળ વધી રહ્યો છું ત્યારે, હું આઈઆઈટીજીએન ખાતે શીખેલા મૂલ્યો અને પાઠોને આગળ ધપાવીને સકારાત્મક પ્રભાવ પાડતી ટેક્નોલોજી બનાવવાની આશા રાખું છું.”

ઉત્કૃષ્ટ સંશોધન (પીએચડી) માટે ગોલ્ડ મેડલ મેળવનાર શ્રીજીત એ નાયરે જણાવ્યું હતું કે, "ઉત્કૃષ્ટ સંશોધન માટે ગોલ્ડ મેડલ મેળવીને હું ખૂબ જ સન્માનિત અનુભવું છું. મારી પીએચડી યાત્રા દરમિયાન મને ટેકો આપવા બદલ હું મારા સુપરવાઈઝર, સહયોગીઓ અને આઈઆઈટી ગાંધીનગરના સંશોધન વાતાવરણનો આભાર માનું છું. મારું સંશોધન ગ્રેવિટેશનલ વેવ્સ (ગુરુત્વાકર્ષણ તરંગો), બ્લેક હોલ્સ અને સ્ટ્રોંગ ફિલ્ડ શાસનમાં ગુરુત્વાકર્ષણની કસોટીઓ પર આધારિત છે. સૌથી લાભદાયી ભાગ એ રહ્યો છે કે વાતચીત અને સહકાર દ્વારા જટિલ વિચારો અર્થપૂર્ણ પરિણામોમાં બદલાતા જોયા છે. હું ભવિષ્યમાં પોસ્ટડોક તરીકે ગ્રેવિટેશનલ-વેવ એસ્ટ્રોનોમી અને બ્લેક-હોલ ફિઝિક્સમાં કામ કરવાનું ચાલુ રાખવાની અને ભવિષ્યના અવલોકનો ગુરુત્વાકર્ષણની કસોટી કરવા અને કૉમ્પેક્ટ ઓબ્જેક્ટ્સને વધુ સારી રીતે સમજવામાં કેવી રીતે મદદ કરી શકે છે તે શોધવાની યોજના ધરાવું છું."

રમતગમતમાં ઉત્કૃષ્ટ પ્રદર્શન માટે પ્રશંસા પત્ર મેળવનાર મોહમ્મદ રાશિદ પઠાણે જણાવ્યું હતું કે, “આ એવોર્ડ મેળવવો એ એક સન્માનની વાત છે, અને તે મને અહીં સુધી લઈ આવનારા રસ્તાની યાદ અપાવે છે. શારીરિક દિવ્યાંગતા ધરાવતા વિદ્યાર્થી તરીકે, મેં મેળવેલી દરેક સિદ્ધિ તેની પોતાની મુશ્કેલીઓ સાથે આવી હતી, અને આ સન્માન માત્ર મારી એ માન્યતાને દ્રઢ કરે છે કે દ્રઢતા, પરિશ્રમ અને આત્મવિશ્વાસ હંમેશા સાર્થક નીવડે છે. આઈઆઈટી ગાંધીનગર માટે ટેબલ ટેનિસ રમવાની અને ઇન્ટર આઈઆઈટી સ્તરે જીત મેળવવાની યાદ હું હંમેશા સાચવી રાખીશ. "મારી ક્ષમતાઓ મારી દિવ્યાંગતા કરતાં પણ મોટી છે" એ હંમેશા મારું સૂત્ર રહ્યું છે. હું આર્ટિફિશિયલ ઇન્ટેલિજન્સના ક્ષેત્રમાં કામ કરવા માંગું છું અને એવી ટેક્નોલોજીના વિકાસમાં યોગદાન આપવા માંગું છું જે સુલભતામાં સુધારો કરે અને વધુ સર્વસમાવેશી ભવિષ્યનું નિર્માણ કરે.”

(रिलीज़ आईडी: 2275845) आगंतुक पटल : 18