નવા અને નવીનીકરણીય ઉર્જા મંત્રાલય
azadi ka amrit mahotsav

કેન્દ્રીય મંત્રી પ્રહલાદ જોશીએ સૌપ્રથમ વિન્ડ સપ્લાય ચેઈન પોર્ટલ લોન્ચ કર્યું


ભારતના પવન ઊર્જા ક્ષેત્રને મોટો વેગ મળ્યો – શ્રી જોશી

ગોવામાં ગ્લોબલ વિન્ડ ડે કોન્ફરન્સ 2026, “Wind Energy: From Ambition to Acceleration" થીમ હેઠળ 2030 સુધીમાં 100 ગીગાવોટ પવન ક્ષમતા માટેનો રોડમેપ તૈયાર કરાયો

प्रविष्टि तिथि: 15 JUN 2026 5:31PM by PIB Ahmedabad

ભારતની પુનઃપ્રાપ્ય ઊર્જા ઇકોસિસ્ટમને મજબૂત કરવા અને દેશના સ્વચ્છ ઊર્જા સંક્રમણને વેગ આપવાની દિશામાં એક મહત્વપૂર્ણ પગલા તરીકે, કેન્દ્રીય નવીન અને પુનઃપ્રાપ્ય ઊર્જા મંત્રી શ્રી પ્રહલાદ જોશીએ આજે ગોવામાં આયોજિત ગ્લોબલ વિન્ડ ડે કોન્ફરન્સ 2026માં ભારતનું પ્રથમ સમર્પિત વિન્ડ ટર્બાઇન સપ્લાય ચેઇન મેનેજમેન્ટ પોર્ટલ ડબલ્યુટી-મારુત - WT-MARUT (વિન્ડ ટર્બાઇન મટિરિયલ્સ એન્ડ રિસોર્સિસ યુટિલિટી ટ્રેકર) લોન્ચ કર્યું હતું.

આ કાર્યક્રમમાં કેન્દ્રીય નવીન અને પુનઃપ્રાપ્ય ઊર્જા રાજ્ય મંત્રી શ્રી શ્રીપદ યેસો નાઈક, ગોવા સરકારના નવીન અને પુનઃપ્રાપ્ય ઊર્જા મંત્રી શ્રી સુદિન ધવલીકર અને નવીન અને પુનઃપ્રાપ્ય ઊર્જા મંત્રાલયના સચિવ શ્રી સંતોષ કુમાર સારંગી, ઉત્પાદકો અને પ્રતિનિધિઓ ઉપસ્થિત રહ્યા હતા.

“Wind Energy: From Ambition to Acceleration" ની થીમ પર આધારિત આ કોન્ફરન્સમાં ઊર્જા સુરક્ષાને મજબૂત કરવા, આર્થિક વૃદ્ધિને પ્રોત્સાહન આપવા અને પર્યાવરણીય ટકાઉપણું આગળ વધારવામાં પવન ઊર્જાની મહત્વપૂર્ણ ભૂમિકા પર પ્રકાશ પાડવામાં આવ્યો હતો.

સભાને સંબોધતા શ્રી પ્રહલાદ જોશીએ ડબલ્યુટી-મારુત (WT-MARUT) પોર્ટલ દેશને સમર્પિત કર્યું હતું અને ભારતની વધતી જતી પુનઃપ્રાપ્ય ઊર્જાની મહત્વાકાંક્ષાઓને સમર્થન આપવા માટે એક મજબૂત સ્થાનિક ઉત્પાદન ઇકોસિસ્ટમ બનાવવાના મહત્વ પર ભાર મૂક્યો હતો. ઇન્ડિયન વિન્ડ ટર્બાઇન મેન્યુફેક્ચરર્સ એસોસિએશન (IWTMA) ના સહયોગથી MNREના નેજા હેઠળ વિકસાવવામાં આવેલું આ પોર્ટલ સપ્લાય-ચેઇનની પારદર્શિતા વધારશે, સપ્લાયરની શોધને સરળ બનાવશે, ALMM માળખા હેઠળ સ્થાનિક સોર્સિંગને મજબૂત કરશે અને ભારતની નિકાસ સજ્જતાને વેગ આપશે.

આ ક્ષેત્રની નોંધપાત્ર પ્રગતિ પર પ્રકાશ પાડતા શ્રી જોશીએ ભારપૂર્વક જણાવ્યું હતું કે ભારત પવન ઉપકરણોના ઉત્પાદન અને નિકાસ માટેના એક મોટા વૈશ્વિક હબ તરીકે ઉભરી આવવાની ક્ષમતા ધરાવે છે.

મંત્રીએ વધુમાં જણાવ્યું હતું કે ભારતે નાણાકીય વર્ષ 2025-26માં રેકોર્ડ 6.1 ગીગાવોટ નવી પવન ક્ષમતા ઉમેરી છે, જે અત્યાર સુધીનું સૌથી વધુ વાર્ષિક ઇન્સ્ટોલેશન છે, જે અગાઉના વર્ષની સરખામણીમાં 46 ટકાની વૃદ્ધિ દર્શાવે છે. 56 ગીગાવોટથી વધુની સ્થાપિત પવન ક્ષમતા સાથે, ભારત આજે વિશ્વના અગ્રણી પવન ઊર્જા બજારોમાં સ્થાન ધરાવે છે.

કેન્દ્રીય મંત્રીએ વિન્ડ ડીસીઆર પોર્ટલ, પવન ઊર્જાનું એક કોફી ટેબલ બુક અને અગ્રણી ઉદ્યોગ અને જ્ઞાન ભાગીદારો દ્વારા તૈયાર કરાયેલા નોલેજ રિપોર્ટ્સ અને રાજ્યવાર નીતિ અહેવાલોની શ્રેણી પણ બહાર પાડી હતી. આ કાર્યક્રમ દરમિયાન નાણાકીય વર્ષ 2025-26 માટે ઉત્કૃષ્ટ પ્રદર્શન કરનારા રાજ્યો, ડેવલપર્સ અને ઉત્પાદકોનું સન્માન કરવામાં આવ્યું હતું.

પોતાનું વિશેષ સંબોધન આપતાં કેન્દ્રીય રાજ્ય મંત્રી શ્રી શ્રીપદ યેસો નાઈકે જણાવ્યું હતું કે પ્રધાનમંત્રી શ્રી નરેન્દ્ર મોદીના દૂરંદેશી નેતૃત્વ હેઠળ ભારતે સ્વચ્છ ઊર્જાને નીતિગત આકાંક્ષામાંથી રાષ્ટ્રીય ચળવળમાં પરિવર્તિત કરી છે. તેમણે નોંધ્યું હતું કે ભારતની સ્થાપિત વીજ ક્ષમતાનો અડધાથી વધુ હિસ્સો હવે બિન-અશ્મિભૂત ઇંધણ (નોન-ફોસિલ ફ્યુઅલ) સ્ત્રોતોમાંથી આવે છે, જે 2030 સુધીમાં 500 ગીગાવોટ બિન-અશ્મિભૂત ઇંધણ ક્ષમતા પ્રાપ્ત કરવા અને 2070 સુધીમાં નેટ ઝીરો ઉત્સર્જન હાંસલ કરવા પ્રત્યેની ભારતની પ્રતિબદ્ધતાને મજબૂત કરે છે.

શ્રી નાઈકે પવન ઊર્જાને ભારતના ઊર્જા સંક્રમણના વ્યૂહાત્મક સ્તંભ તરીકે ગણાવી હતી, જે સૌર ઊર્જાની પૂરક છે, ગ્રીડની સ્થિરતામાં સુધારો કરે છે અને વિશ્વસનીય તેમજ પરવડે તેવી સ્વચ્છ ઊર્જા સુનિશ્ચિત કરે છે. તેમણે નાણાકીય વર્ષ 2025-26 દરમિયાન દેશની રેકોર્ડબ્રેક પવન ક્ષમતાના ઉમેરામાં યોગદાન આપવા બદલ તમામ હિતધારકોની પ્રશંસા કરી હતી.

 

કોન્ફરન્સને સંબોધતા ગોવાના નવીન અને પુનઃપ્રાપ્ય ઊર્જા મંત્રી શ્રી સુદિન ધવલીકરે ગોવામાં પવન ઊર્જાના વિકાસના વિસ્તરણ માટેની તકો અને સંભાવનાઓ પર પ્રકાશ પાડ્યો હતો અને પુનઃપ્રાપ્ય ઊર્જા પહલોને સમર્થન આપવા માટે રાજ્ય સરકારની પ્રતિબદ્ધતાનો પુનરોચ્ચાર કર્યો હતો.

આ કોન્ફરન્સે પુનઃપ્રાપ્ય ઊર્જા, ખાસ કરીને પવન ઊર્જા વિશે જાગૃતિ લાવવા અને સરકારી એજન્સીઓ, ઉદ્યોગો, સંશોધન સંસ્થાઓ અને રોકાણકારો વચ્ચે સહયોગને પ્રોત્સાહન આપવા માટે એક પ્લેટફોર્મ તરીકે પણ કામ કર્યું હતું. આ કાર્યક્રમમાં આશરે 250 સહભાગીઓએ હાજરી આપી હતી.

આ કોન્ફરન્સ નવીન અને પુનઃપ્રાપ્ય ઊર્જા મંત્રાલય (MNRE) દ્વારા અગ્રણી પવન ઉદ્યોગ સંસ્થાઓ જેવી કે ઇન્ડિયન વિન્ડ ટર્બાઇન મેન્યુફેક્ચરર્સ એસોસિએશન (IWTMA), વિન્ડ ઇન્ડિપેન્ડન્ટ પાવર પ્રોડ્યુસર્સ એસોસિએશન (WIPPA) અને ઇન્ડિયન વિન્ડ પાવર એસોસિએશન (IWPA) ના સહયોગથી આયોજિત કરવામાં આવી હતી. આ કોન્ફરન્સમાં નીતિ ઘડવૈયાઓ, ઉદ્યોગના અગ્રણીઓ, ડેવલપર્સ, ઉત્પાદકો, નાણાકીય સંસ્થાઓ, શિક્ષણ જગત અને અન્ય હિતધારકોએ ભાગ લીધો હતો.

SM/IJ/JD


(रिलीज़ आईडी: 2273193) आगंतुक पटल : 17
इस विज्ञप्ति को इन भाषाओं में पढ़ें: English , Marathi