இடுகை இடப்பட்ட நாள்:
09 JUN 2026 5:31PM by PIB Chennai
மத்திய அரசின் புள்ளியியல், திட்ட அமலாக்க அமைச்சகத்தின் கீழ் இயங்கும் தேசிய புள்ளியியல் அலுவலகத்தின் சென்னை மண்டல அலுவலகமானது மண்டல அளவிலான பயிற்சி மாநாட்டிற்கு ஏற்பாடு செய்துள்ளது. சமூகப் பொருளாதாரக் கணக்கெடுப்பின் ஒரு முக்கிய பகுதியாக விளங்கக்கூடிய, இடப்பெயர்வு விவரங்கள் குறித்த என்எஸ்எஸ் 81-வது சுற்றிற்கான இந்தத் தேசிய மாநாடு சென்னை சாஸ்திரி பவனில் அமைந்துள்ள மண்டல அலுவலக வளாகத்தில் வரும் ஜூன் 10 முதல் 11-ம் தேதி வரை இரண்டு நாட்கள் நடைபெறவுள்ளது. இந்த மண்டல அளவிலான பயிற்சி மாநாட்டிற்குச் சென்னை மண்டல அலுவலகத்தின் துணைத் தலைமை இயக்குநர் திரு மனோகர் தலைமை தாங்கி நடத்தவுள்ளார். இதன் செயல்பாடுகளை சென்னை மண்டல அலுவலக இணை இயக்குநர் டாக்டர் சந்திரசேகர் கே வழிநடத்துவார் எனத் தெரிவிக்கப்பட்டுள்ளது.
இந்த ஆலோசனைக் கூட்டத்தில் தமிழ்நாடு, புதுச்சேரி ஆகிய மாநிலங்களின் பொருளாதாரம், புள்ளியியல் இயக்குநரகங்களைச் சேர்ந்த பல முக்கியப் அலுவலர்கள் கலந்துகொள்கிறார்கள். மேலும், சென்னை மண்டல அலுவலகத்தைச் சேர்ந்த அதிகாரிகள், வேலூர், கடலூர், புதுச்சேரி ஆகிய முக்கியத் துணை மண்டல அலுவலகங்களைச் சேர்ந்த பல்வேறு துறைசார்ந்த பங்கேற்பாளர்களும் இந்த மாநாட்டில் கலந்துகொள்கின்றனர். தேசிய புள்ளியியல் அலுவலகமானது இந்த இடப்பெயர்வு விபரங்கள் தொடர்பான விரிவான தேசிய அளவிலான கள ஆய்வினை வரும் 2026 ஜூலை முதல் 2027 ஜூன் வரையிலான குறிப்பிட்ட ஓராண்டு காலகட்டத்தில் நாடு முழுவதும் நடத்தத் திட்டமிட்டுள்ளது. இந்த முக்கிய ஆய்வானது குடும்ப உறுப்பினர்களின் விரிவான இடப்பெயர்வுத் தரவுகள், குடும்பங்களை விட்டு வெளியேறி இடம்பெயர்ந்தவர்களின் பிரத்யேகப் புள்ளிவிவரங்களைச் சேகரிப்பதில் முழுக் கவனம் செலுத்துகிறது.
தேசிய புள்ளியியல் அலுவலகத்தின் கள அதிகாரிகளிடம் பொதுமக்கள் அனைவரும் முறையான, துல்லியமான, உண்மையான விவரங்களை அளித்து இந்த தேசிய ஆய்வுகளுக்குத் தங்களின் முழுமையான ஒத்துழைப்பை நல்குமாறு கேட்டுக்கொள்ளப்படுகிறார்கள். பொதுமக்கள் வழங்கும் இந்த மதிப்புமிக்கப் புள்ளிவிவரங்கள் நம் நாட்டின் கட்டமைப்பு செயல்முறைகளுக்கும், எதிர்கால வளர்ச்சிக்கும் பெரிதும் வழிவகுக்கும். பொதுமக்களால் அதிகாரிகளிடம் வழங்கப்படும் அனைத்துத் தனிப்பட்டத் தகவல்களும் மத்திய அரசின் கொள்கை உருவாக்கத்திற்கு மட்டுமே பிரத்யேகமாகப் பயன்படுத்தப்படும். இந்த முறையில் கள ஆய்வின் போது சேகரிக்கப்படும் அனைத்து விவரங்களும் மிகவும் பாதுகாப்பான முறையில், பராமரிக்கப்படும் எனத் தெரிவிக்கப்பட்டுள்ளது.
***
SS/PD/KR