Kum shi bynta ka campaign Khet Bachao Abhiyan 2026–27 ha baroh kawei ka ri, la pynlong ia ka prokram ai jinghikai kaba shi sngi halor ka jingpyndonkam ïa ki dawai pyniap khniang kaba shngaiñ bad kaba bha ha Horticulture Hub, Thadlaskein Block, West Jaiñtia Hills District, ha ka 03 tarik u Jylliew, 2026. Ia kane ka prokram la pynlong da ka Central Integrated Pest Management Centre (CIPMC), Shillong, kaba trei hapoh ka Tnad ka rep ka riang bad ka bha ka miat jong ki nongrep, Sorkar India. La pynlong ia ka prokram ha ka jingiatreilang bad ka Tnad ka rep ka riang jong ka Sorkar Meghalaya, bad ki Krishi Vigyan Kendra (KVK) ha ka thain, kaba la wanrah lang ïa kiba bun ki nongrep bad ki nongtrei ka rep ka riang na kylleng ka District. Kane ka prokram ka long shi bynta jong ka campaign Khet Bachao Abhiyan kaba neh shibnai kaba dang pynlong ha kylleng ka ri ha baroh u bnai Jylliew ban ïarap ïa ki nongrep ban kylla sha ka rukom rep kaba shngain bad kaba kham bha.

Ha kane ka prokram, ki riew shemphang na ka CIPMC Shillong ki la hikai ia ki nongrep kumno ban pyndonkam ia ki dawai pyniap khniang da kaba shngain bad tang haba donkam eh. Ki la pynshlur ia ki nongrep ba kin pdiang ia ka Integrated Pest Management (IPM), kaba long ka lad kaba kham shngain ban iada ia ki jingthung jingtep. Ki nongrep ki la ioh jinghikai kumno ban jied ia ki dawai pyniap khniang kiba biang, katno ban ban pyndonkam, ban bud ia ki samoi ap kiba shngain shwa ban ot, bad ban pyndonkam ia ki rukom kiba shngain ban sumar, ban buh bad bret ia ki jaboh dawai pyniap khniang.

Ki ophsar ki la ai jingmut ia ki nongrep ba kin sangeh noh ban pyndonkam palat ia ki sboh dawai bad ki dawai pyniap khniang namar ki pynsniew ia ka khyndew. Hynrei, la pynshlur ban pyndonkam da ki rukom kiba iahap bad ka mariang kum ka sboh organic, ki sboh bio-fertilizer, bad ki bio-persticide. La pyni ruh ia ki nongrep ia ki rukom rep ba thymmai hapoh ka National Pest Surveillance System (NPSS). Ki riew shemphang ki la batai ba ka jingpynduna ia ka jingpyndonkam ia ki dawai ka iarap ban pynlong ia ka khyndew kaba koit ba khiah, ka iada ia ka mariang, ka pynduna ia ka jinglut jingsep ha ka rep ka riang, bad ka pynthikna ba ka rep ka riang kalong kaba seisoh bad kaba neh slem.

La ai jingmut ruh ia ki nongrep halor kumno ban kiar na kaba thied ia ki mar thok ne ki mar ki bym bha. La bthah ia ki ba kidei ban thied beit ia ki dawai pyniap khniang na ki nongdie kiba la ioh jingbit, ban pan ia ka bill kaba biang, bad ban peit bha ia ki jingtip jong ka jingpynrung kyrteng, ki batch nombar, ki tarik shna, bad ki tarik ba kut por. Ki ophisar ki la maham ruh shaphang ki jingma kiba khraw ba ka jingpyndonkam khlem da pyrkhat ïa ki dawai pyniap khniang ka buh jingma ïa ka koit ka khiah jong u briew, ia ki khniang kum ki ngap, bad ïa ka mariang.

 

Ha kane ka jingïalang la don ruh ki jingpyni ba lah ban leh ha kaba ki nongrep ki ioh jinghikai kumno ban jied ïa ki symbai kiba bha bad ban sumar bha ïa ki ban ïada na ki jingpang. Ki riewshemphang ki la kren ruh shaphang ki jingma jong ka jingtuid jong ki dawai pyniap khniang, kaba jia haba ki dawai ki poi sha ki lyngkha ba marjan, kaba ktah ia kiwei pat ki jingthung, ki mrad bad ki briew. Ban iada ia kane, la pyni ia ki nongrep kumno ban jied ia ki rukom synreit kiba biang bad kumno ban synreit katkum ka jinglong ka suinbneng.

Khatduh eh, la pyni ia ki nongrep kumno ban pyndonkam da ki tiar kiba suk ban kem ia ki khniang, kum ki jingriam pheromone, ki jingriam ba dambit, ki jingriam ba sting, bad ki dawai synreit ba la shna da u neem. Kine ki rukom kiba iahap bad ka mariang kidei ban long beit kiba nyngkong ban iada shwa ban pyndonkam da ki dawai. Ha kaba kut, baroh ki nongrep kiba la ïashim bynta ki la smai ban pyndonkam ïa ki dawai pyniap khniang da kaba shngain, ban pdiang ïa ki rukom rep kiba ïahap bad ka mariang bad ban ïada ïa ka mariang.

****

(रिलीज़ आईडी: 2269526) आगंतुक पटल : 3