وزیرِ اعظم جناب نریندر مودی کی صدارت میں مرکزی کابینہ نے آئل مارکیٹنگ کمپنیوں(او ایم سی ایس )ایوی ایشن ٹربائن فیول (اے ٹی ایف) کی قیمتوں میں استحکام کے لیے10,000 کروڑ روپے تک کی یک وقتی بجٹ معاونت کی منظوری دے دی ہے۔ یہ امداد طے شدہ  ہندوستانی ایئرلائنز کو ان کی ملکی اور بین الاقوامی پروازوں کے لیے فراہم کی جائے گی۔

یہ فیصلہ مغربی ایشیا کے جاری بحران کے باعث پیدا ہونے والی غیر معمولی ایندھن قیمتوں میں نشیب و فراز کی صورتحال کے تناظر میں کیا گیا ہے، جس نے دنیا بھر کی فضائی کمپنیوں کو متاثر کیا ہے۔ اس اقدام کا مقصد  ہندوستانی ایئرلائنز کے لیے ایندھن کی قیمتوں میں استحکام اور پیش گوئی کے قابل نظام فراہم کرنا ہے، تاکہ فضائی خدمات کا تسلسل برقرار رہے اور مسافروں کو اچانک قیمتوں میں اضافے کے اثرات سے محفوظ رکھا جا سکے۔

اس فیصلہ کا خیرمقدم کرتے ہوئے شہری ہوابازی کے وزیر جناب رام موہن نائیڈو نے کہا کہ وزیراعظم نریندر مودی کی قیادت میں حکومت وقتاً فوقتاً ایسے بروقت اور متوازن اقدامات کرتی رہی ہے جو مسافروں، ایئرلائنز اور مجموعی ہوابازی نظام کے مفاد میں ہیں۔

انہوں نے کہا کہ اس سے قبل ایمرجنسی کریڈٹ لائن گارنٹی اسکیم (ای سی ایل جی ایس) کے تحت تقریباً 5,000 کروڑ روپے کی لیکویڈیٹی امداد ایئرلائنز کو دی گئی تھی۔ اب کابینہ نے ایک اور اہم فیصلہ کرتے ہوئے10,000 (دس ہزار )کروڑ روپے کی سود سے پاک معاونت او ایم سیز کو اے ٹی ایف قیمتوں کے استحکام کے لیے منظور کی ہے۔ ان کے مطابق یہ اقدام ایئرلائنز کے لیے ایندھن کی لاگت میں غیر یقینی صورتحال کو کم کرے گا اور بالآخر مسافروں کو کرایوں میں ممکنہ کمی کی صورت میں فائدہ پہنچائے گا۔

وزیر موصوف نے مزید کہا کہ حکومت نے اس غیر معمولی صورتحال کے آغاز سے ہی ایک فعال اور کثیر سطحی حکمتِ عملی اپنائی ہے۔ انہوں نے بتایا کہ ملکی آپریشنز کے لیے اے ٹی ایف کی بنیادی قیمتوں میں اضافے کو عالمی منڈی میں شدید اضافے کے باوجود 25 فیصد تک محدود رکھا گیا۔ اس کے علاوہ گھریلو ایئرلائنز کے لیے لینڈنگ اور پارکنگ چارجز میں بھی 25 فیصد کمی کی گئی۔انہوں نے دہلی اور مہاراشٹر کے وزرائے اعلیٰ کا شکریہ بھی ادا کیا کہ انہوں نے اے ٹی ایف پر ویٹ(وی اے ٹی) کو 7 فیصد تک کم کیا، جبکہ ملک کا تقریباً 75 سے 80 فیصد اے ٹی ایف انہی ریاستوں سے حاصل ہوتا ہے۔

عام حالات میں ایئرلائنز کے آپریٹنگ اخراجات کا تقریباً **40 فیصد حصہ ایوی ایشن ٹربائن فیول (ATF)** پر مشتمل ہوتا ہے، جبکہ ایندھن کی قیمتوں میں شدید اتار چڑھاؤ کے دوران یہ حصہ بڑھ کر **60 فیصد تک** بھی پہنچ سکتا ہے۔ اس نوعیت کی غیر یقینی صورتحال ایئرلائنز کے آپریشنز، روٹ پلاننگ اور کرایوں کے استحکام پر نمایاں اثر ڈال سکتی ہے۔

 اے ٹی ایف  قیمتوں میں استحکام کے لیے منظور کیا گیا یہ سپورٹ میکانزم حکومت کی ان مسلسل کوششوں کا ایک اور اہم قدم ہے جس کا مقصد  ہندوستان کے ہوابازی کے شعبہ کو مزید مضبوط اور لچکدار بنانا ہے، اور ‘وکست بھارت- 2047’ کے ویژن کے تحت بہتر رابطہ، اقتصادی ترقی اور فضائی سفر کو مزید سہل بنانا ہے۔

اس فیصلہ کے اثرات کو اجاگر کرتے ہوئے وزیر موصوف  نے کہا کہ اس اقدام کو ہوابازی صنعت سمیت مختلف شعبوں میں بھرپور سراہا گیا ہے، کیونکہ اس کے اثرات سیاحت، مہمان نوازی، تجارت اور برآمدات جیسے شعبوں پر بھی مرتب ہوں گے۔ ان کے مطابق اس فیصلے سے فضائی آپریشنز کے تسلسل کو یقینی بنایا جا سکے گا، جس سے مسافروں کے ساتھ ساتھ اعلیٰ قدر کے فضائی کارگو کو بھی سہولت حاصل ہوگی۔

یہ اے ٹی ایف قیمت استحکام معاونت نظام36 ماہ تک فعال رہے گا، جس کے دوران سالانہ جائزے کی گنجائش بھی ہوگی، یا پھر جب تک پیشگی دی گئی رقم مکمل طور پر وصول اور ایڈجسٹ نہ ہو جائے—جو بھی پہلے ہو۔ اس کے نفاذ، دعوؤں کی جانچ، ریکارڈ کی ہم آہنگی اور تصفیے کی نگرانی کے لیے ایک مانیٹرنگ کمیٹی قائم کی جائے گی جس میں وزارتِ شہری ہوابازی، وزارتِ پٹرولیم و قدرتی گیس اور اخراجات کے محکمے کے نمائندے شامل ہوں گے۔

وزارتِ شہری ہوابازی نے اس بدلتی ہوئی صورتحال پر قریبی نظر رکھی ہوئی ہے اور بحران کے باعث پیدا ہونے والے آپریشنل چیلنجز کا جائزہ لینے کے لیے ایئرلائنز اور دیگر متعلقہ فریقین کے ساتھ مسلسل رابطے میں ہے۔

 

********

 

 

ش ح- ظ الف-  ج

UR- 7958

                          

(रिलीज़ आईडी: 2268810) आगंतुक पटल : 6