ઇન્ડિયન ઇન્સ્ટિટ્યૂટ ઓફ મેનેજમેન્ટ અમદાવાદ (IIMA) એ ભારત સરકારના 'એક ભારત શ્રેષ્ઠ ભારત' અભિયાન હેઠળના યુવા સંગમ ફેઝ VI કાર્યક્રમના ભાગરૂપે આજે તેના કેમ્પસમાં ઓડિશાના વિવિધ જિલ્લાઓ અને સંસ્થાઓના 29 પુરુષો અને 12 મહિલાઓ સહિત 41 સહભાગીઓના જૂથનું સ્વાગત કર્યું હતું. IIMA ગુજરાતમાં આ કાર્યક્રમ માટે નોડલ સંસ્થા તરીકે સેવા આપી રહી છે અને 6 જૂન, 2026 સુધી ઓડિશાના જૂથ માટે ગુજરાતના ગહન પ્રવાસની સુવિધા પૂરી પાડશે.

આઈઆઈએમએ (IIMA) ના ડાયરેક્ટર પ્રોફેસર ભરત ભાસ્કર; ચીફ એડમિનિસ્ટ્રેટિવ ઓફિસર અને IIMA ખાતે યુવા સંગમ ફેઝ VI ના નોડલ ઓફિસર કર્નલ (ડૉ.) જગદીશ સી. જોશી (નિવૃત્ત); અને બ્રિગેડિયર દિનેશ શર્મા (નિવૃત્ત), એડવાઈઝર – IFM એ સ્વાગત સત્ર દરમિયાન સહભાગીઓ સાથે વાતચીત કરી હતી.

IIMA ના ડાયરેક્ટર પ્રોફેસર ભરત ભાસ્કરે સાંસ્કૃતિક જાગૃતિ, સંવાદિતા અને અનુભવાત્મક શિક્ષણને પ્રોત્સાહન આપવામાં યુવા સંગમ જેવા કાર્યક્રમોના મહત્વનો સ્વીકાર કરતા જણાવ્યું હતું કે, "ભારત જેવા દેશમાં, જે વિશ્વની સૌથી જૂની સભ્યતાઓમાંની એક હોવા ઉપરાંત અસંખ્ય બોલીઓ, ખાનપાનની આદતો અને સાંસ્કૃતિક પ્રથાઓનું જન્મસ્થળ છે, જે દર થોડાક સો કિલોમીટરે બદલાય છે, ત્યાં આખા દેશની શોધખોળ કરવામાં આખી જિંદગી નીકળી જાય. અને છતાં, એક સામાન્ય દોરો છે જે આપણને બધાને એકસાથે બાંધે છે. યુવા સંગમ કાર્યક્રમ એક સેતુ તરીકે કામ કરે છે જે દેશના યુવાનોમાં આપણા સમૃદ્ધ સામાજિક-સાંસ્કૃતિક અને વિકાસલક્ષી પાસાઓ વિશે અનુભવાત્મક અને ઊંડી સમજણ વધારે છે. સ્વચ્છ મન અને નવા દ્રષ્ટિકોણ સાથે, તમે માત્ર પ્રવાસીઓ તરીકે બીજા ભારતીય રાજ્યની મુલાકાત લઈ રહ્યા નથી, પરંતુ નિરીક્ષકો અને શીખનારાઓ તરીકે મુલાકાત લઈ રહ્યા છો જેઓ વિશિષ્ટ શક્તિઓ અને પડકારોને ઓળખી શકે છે અને ભવિષ્યમાં ભારતના પરિવર્તન અને વિકાસને વેગ આપવા માટે તે જ્ઞાનનો ઉપયોગ કરી શકે છે."

6 દિવસીય કાર્યક્રમ ઓડિશાના સહભાગીઓને ગુજરાતના ઇતિહાસ, સંસ્કૃતિ, પરંપરાઓ, વિકાસની પહેલો, વિકાસ અને શાસન મોડલ, ઔદ્યોગિક અને નવીનતાની ઇકોસિસ્ટમ તથા સ્થાનિક જીવનશૈલીનો પ્રત્યક્ષ અનુભવ કરાવશે. તેઓ ગુજરાતના વિવિધ સીમાચિહ્નોની મુલાકાત લેશે અને તેનો અનુભવ મેળવશે, જેમાં આઈઆઈએમ અમદાવાદ, અડાલજની વાવ, ગાંધી આશ્રમ, બ્લાઇન્ડ પીપલ્સ એસોસિએશન, અમદાવાદનો કોટ વિસ્તાર (ઓલ્ડ સિટી), સ્થાનિક બજારો, સાયન્સ સિટી, ગિફ્ટ સિટી (GIFT City), અમૂલ ફેક્ટરી વગેરેનો સમાવેશ થાય છે. આ જૂથ ગુજરાતના માનનીય રાજ્યપાલ શ્રી આચાર્ય દેવવ્રતની મુલાકાત લેવા અને તેમની સાથે વાતચીત કરવા માટે પણ નિર્ધારિત છે. તેઓ પરંપરાગત ગુજરાતી ભોજનનો સ્વાદ પણ માણશે.

અગાઉ ગયા અઠવાડિયે, IIMA એ ગુજરાતના 39 સહભાગીઓ, જેમાં 27 પુરુષો અને 12 મહિલા સહભાગીઓ સામેલ હતા, તેમને 25-30 મે, 2026 દરમિયાન ઓડિશામાં 6 દિવસના ઇમર્સન (ગહન) કાર્યક્રમ માટે લીલી ઝંડી બતાવી રવાના કર્યા હતા, જ્યાં નેશનલ ઇન્સ્ટિટ્યૂટ ઓફ ટેક્નોલોજી રાઉરકેલા દ્વારા તેમનું યજમાનપદ કરવામાં આવ્યું હતું. મેજર જનરલ બિમલ મોંગા, એસએમ, વીએસએમ, એડિશનલ ડાયરેક્ટર જનરલ, એનસીસી ડિરેક્ટોરેટ ઓફ ગુજરાત, દાદરા અને નગર હવેલી, દમણ અને દીવ, એ મુખ્ય અતિથિ તરીકે વિદાય સમારંભની શોભા વધારી હતી અને IIMA ના ડાયરેક્ટર પ્રોફેસર ભરત ભાસ્કર સાથે સહભાગીઓને આ અનોખી તકનો મહત્તમ ઉપયોગ કરવા પ્રોત્સાહિત કર્યા હતા.

રાષ્ટ્રીય એકાત્મતા અને લોકો-થી-લોકોના જોડાણને પ્રોત્સાહન આપવા માટે રચાયેલ, યુવા સંગમ કાર્યક્રમ કોલેજના વિદ્યાર્થીઓ અને ઓફ-કેમ્પસ યુવાનોને તેમની ક્ષિતિજો વિસ્તારવાની અને આંતર-રાજ્ય પ્રદર્શન પ્રવાસો દ્વારા ભારત અને તેમના દેશવાસીઓ વિશે વધુ સૂક્ષ્મ સમજ વિકસાવવાની તક આપે છે. પર્યટન (Tourism), પરંપરા (Traditions), પ્રગતિ (Development), પરસ્પર સંપર્ક (People-to-people connect) અને પ્રોદ્યોગિકી (Technology) ની થીમ્સ પર આધારિત, યુવા સંગમ સહભાગીઓને રાજ્યની સામાજિક, સાંસ્કૃતિક, વિકાસલક્ષી અને સંસ્થાકીય શક્તિઓનો સર્વગ્રાહી અનુભવ આપવાનો પ્રયાસ કરે છે.

(रिलीज़ आईडी: 2267728) आगंतुक पटल : 56