Shillong, Jymmang 31, 2026: U Myntri Sorkar Pdeng ba dei khmih ia ka Tnad Youth Affairs and Sports, u Dr. Mansukh Mandaviya mynta ka sngi u la iashim bynta ha ka bynta kaba 76 jong ka campaign ha ka ri baroh kawei ka Sundays on Cycle hapoh ka Fit India Movement ha Shillong. Ha kane ka prokram la sakhi ïa ka jingïashim bynta shitrhem na ki samla, ki briew kiba sngewtynnad ia ki kam kilan met bad ki paidbah, da kaba pynsaphriang ïa ka khubor jong ka jingkoit jingkhiah, ka jingiaineh bad ka rukom im kaba koit ba khiah lyngba ka jingniah cycle.

Ka Myntri Khynnah jong ka sorkar pdeng ba dei khmih ia ka Tnad Youth Affairs and Sports ka Raksha Khadse, u Myntri ka Tnad kam ialehkai jong ka jylla Meghalaya u Bah Wailadmiki Shylla, ki nongialehkai bad ki briew kiba sngewtynnad ban niah cycle ki la iadonlang ha kane ka prokram.

Haba ai jingkren ha kane ka jingialang, u Dr. Mandaviya u la pynpaw ka jingkmen ba ki samla jong ka jylla Meghalaya ki pynsaphriang ia ka khubor jong ka jingkoit jingkhiah lyngba ka jingniah cycle. U la ong ba ka jingñiah cycle kadei kawei na ki rukom kilan met kaba bha tam bad ka ai jingmyntoi shibun ïa ki paidbah, kynthup ka jingpynduna ïa ka jingjaboh, ka jingtyngkai ia ka umphniang bad ka ïarap ban pynduna ïa ka jingkhapngiah kali. U la ong ba ka jingniah cycle kam dei tang ka kam ba iadei bad ka jingkoit jingkhiah hynrei kadei ruh ka lad kaba biang ban weng ïa ki katto katne ki jingeh ha kane ka juk, kaba pynlong ïa ka kum ka lad kaba bha na ka bynta ka lawei kaba kham khlain kaba kham biang bad kaba kaba kham iaineh.

U Myntri Sorkar Pdeng u la ong ba ka Sundays on Cycle ka la nang kylla sha ka jingiakhih ha ka ri baroh kawei hapoh ka sienjam Fit India, ha kaba da ki lak ngut ki briew ki la iashim bynta ha kylleng ka ri man la ka Sngi U Blei. U la pyntip ha ka jingialang ba la pynlong ia ki jingniah cycle ha palat 6,000 tylli ki jaka ha kylleng ka ri India mynta ka sngi, kaba pyni ia ka jingkiew jong kane ka campaign.

Haba kren shaphang ki lad ba don ha ka kam ialehkai niah cycle, u Dr. Mandaviya u la ong ba watla ka kam niah cycle kadei kaba iarap bha ban wanrah ia ka jingkoit jingkhiah jong ka met, hynrei kadei ruh ka jingïalehkai kaba don ïa ki lad kiba heh na ka bynta ki samla nongïalehkai. Haba kren shaphang ka jingkiew ka kam niah cycle ha kane ka thain shatei lammihngi, u la pynshlur ïa ki samla ka jylla Meghalaya ba kin peit ïa ka jingniah cycle ym tang kum ka lad ban ioh ia ka koit ka khiah hynrei kum ka jingïalehkai bad ka rukom im.

Katba ka jylla Meghalaya ka pynkhreh ban pynlong ïa ka National Games ha u snem 2027, u Myntri ka sorkar pdeng u la kyntu ïa ki nongshong shnong ban pynkhlaiñ ïa ka kolshor niah cycle ha ka Jylla. U la kyntu ia ki briew ban iashim bynta ha ki kam niah cycle man la ka Sngi U Blei bad ban trei ban pynlong ia ka jingniah cycle kum ka bynta kaba kongsan jong ka jingim ha ka imlang sahlang ha kylleng ki distrik, ki block bad ki jaka sor. U la ong ba ka Meghalaya kadei ban pyndonkam ia ka National Games ka ban sa wan ban kyntiew ia ka jingniah cycle kum ka jingialehkai ha kajuh ka por ban pynshlur ia ka kum ka kam paidbah.

Haba ban jur ia ka jingdonkam jong ka jingkoit jingkhiah ha ka jingtei ia ka ri, u Dr. Mandaviya u la ong ba ia ka ri India kaba la kiew lah ban tei tang da ki nongshong shnong kiba koit ba khiah. U la ong ba ki briew kiba koit ba khiah ki noh synniang sha ka imlang sahlang kaba koit ba khiah, bad ka imlang sahlang kaba koit ba khiah kalong ka nongrim jong ka ri kaba roi bad kaba kiew shaphrang. U la kyntu ia ki samla ba kin iasnohkti lang bad ka Fit India Movement bad ban long ki nongiatreilang kiba shitrhem ban pynurlong ia ka jingthmu jong ka Viksit Bharat.

U Myntri Sorkar Pdeng u la ban jur ruh ia ka bynta jong ka jingniah cycle ha kaba kyntiew ia ka rukom im kaba lah ban iaineh bad ban pynduna ka jingshaniah ha ka umphniang. Haba kren shaphang ka jinglong jingman kaba mynta ha West Asia, u la ong ba u Myntri Rangbahduh ka ri u Narendra Modi u la kyntu ïa ki nongshong shnong ban pynduna katba lah ia ka jingpyndonkam umphniang. U Dr. Mandaviya u la ong ba ka jingniah cycle ka ai ka lad ban kyrshan ïa kane ka sienjam jong ka ri katba ha kajuh ka por ka kyntiew ïa ka jingkoit jingkhiah, pynduna ïa ka jingjaboh bad pynduna ïa ka jingkhapngiah kali. Haba pynshlur ia ki nongshong shnong ban pyndonkam ia ki bicycle na ka bynta ka jingleit jingwan kaba kham jan bad ka jingleit jingwan man ka sngi, u la ong ba ka jingniah cycle ym tangba ka ai jingmyntoi ia ka koit ka khiah jong u briew hynrei ka iarap ruh ban iada ia ka mariang bad ban pynneh pynsah ia ka bording.

Haba ai jingkren ha kane ka sngi, ka Raksha Khadse ka la ong ba ha ka campaign Sundays on Cycle ha nongbah Shillong la sakhi ia ka jingiashim bynta shitrhem naduh ki nongmihkhmat paidbah, ki nongialehkai bad ki briew kiba sngewtynnad ban niah cycle. Ka la sakhi ba ka jingniah cycle ka nang kiew stet ha Shillong bad ka la batai ïa ka kum ka lad kaba biang ban kyntiew ïa ka jingkoit jingkhiah katba dang ïada ïa ka mariang.

Ka Khadse ka la pynshlur ïa ki nongshong shnong ban ïashim bynta shitrhem ha ka Sunday on Cycle bad ban pdiang ïa ka jingniah cycle kum shi bynta jong ka jingim jong ki kaba man la ka sngi. Ka la kyntu ia baroh ki briew ban pynlong ia ka jingniah cycle kum ka jingmlien kaba man ka por bad ban kyrshan ia ki jingthmu jong ka Fit India Movement.

Ha kane ka jingïalang la ban jur ïa ka jingnang kiew ka jingsngewtynnat ban niah cycle kum ka jingïakhih na ka bynta ka jingkoit jingkhiah, ka jinglah ban iaineh bad ka jingsumar ïa ka mariang, katba ka pynskhem ïa ka khubor jong ka Fit India.

 

 

*****

(Release ID: 2267305) visitor counter : 2