لوک سبھا اسپیکر جناب اوم برلا نے آج تاریخی لال قلعہ پر بھارت پرو کا افتتاح کیا۔ یومِ جمہوریہ کے موقع پر منعقدہ اس تقریب کے دوران انہوں نے اس فیسٹول کو بھارت کی روح کا ایک متحرک اظہار قرار دیا — ایک ایسی جگہ قرار دیا جہاں ثقافت، جمہوریت، تخلیقی صلاحیت اور اتحاد یکجا ہوتے ہیں۔

اسپیکر نے اس بات پر زور دیا کہ بھارت پرو محض ایک ثقافتی تقریب نہیں ہے بلکہ یہ ان آئینی اقدار کی پُر اثر یادگار ہے جو ملک کو ایک لڑی میں پروتی ہے۔ انہوں نے زور دے کر کہا کہ بھارت پرو خود کفیل بھارت کے جذبے کی عکاسی کرتا ہے۔

یومِ جمہوریہ کی اہمیت کا ذکر کرتے ہوئے، جناب برلا نے کہا کہ بھارت کی طاقت اس کے آئین میں پنہاں ہے — خاص طور پر جمہوریت، انصاف، آزادی، مساوات اور بھائی چارے کے ستونوں میں۔ انہوں نے تبصرہ کیا کہ بھارت پرو ان نظریات اور عوام کے درمیان ایک رابطہ کا کام کرتا ہے، جو روایات اور مشترکہ جشن کے ذریعے آئینی اقدار کو عوام تک پہنچاتا ہے۔ فن، دستکاری، لذیذ پکوانوں اور موسیقی کی نمائش کے ذریعے، یہ تہوار ایک بھارت، شریسٹھ بھارت کا ایک عملی تجربہ فراہم کرتا ہے اور اس تصور کو تقویت دیتا ہے کہ جمہوریت تب ہی پروان چڑھتی ہے جب شہری اپنی وراثت اور ایک دوسرے سے جڑے ہوں۔

شہریوں کی شرکت، بالخصوص نوجوانوں کی شمولیت کو فروغ دینے میں بھارت پرو کے کردار کو اجاگر کرتے ہوئے، جناب برلا نے کہا کہ ثقافت سے جڑ کر بھارتی نوجوان اپنی جڑوں سے دوبارہ جڑتے ہیں اور ساتھ ہی قومی اقدار اور اختراع پر مبنی مستقبل کی تشکیل کرتے ہیں۔ انہوں نے یہ بھی نوٹ کیا کہ بھارت پرو جیسے فیسٹول سیاحت کو فروغ دیتے ہیں، مقامی معیشت کو مضبوط کرتے ہیں اور دستکاری کے نمونوں، ہتھ کرگھے اور مقامی پکوانوں کے ذریعے روزگار پیدا کر کے آتم نربھر بھارت کے وژن کو تقویت دیتے ہیں۔ انہوں نے کہا کہ ثقافت نہ صرف ہماری شناخت ہے — بلکہ یہ ایک موقع بھی ہے۔

انہوں نے اس بات پر زور دیا کہ بھارت پرو کی سب سے بڑی طاقت اس کے شمولیاتی ہونے میں پنہاں ہے۔ جناب برلا نے امید ظاہر کی کہ اس میلے میں آنے والے حاضرین یومِ جمہوریہ کی تقریبات کی شان و شوکت، دفاعی افواج کی شاندار کارکردگی، ملک کے ہر خطے کے ثقافتی مظاہر، دستکاری اور ہتھ کرگھے کی متحرک مارکیٹوں، کل ہند  فوڈ کورٹ اور لوک فن کے جاندار مظاہروں کا مشاہدہ کریں گے۔جناب برلا نے نوٹ کیا کہ یہ تمام عناصر مل کر بھارت کی کثیر جہتی شناخت کا ایک رنگین گلدستہ تیار کرتے ہیں — جو یہ ظاہر کرتا ہے کہ تنوع کوئی چیلنج نہیں ہے، بلکہ ملک کی سب سے بڑی طاقت ہے۔

اسپیکر نے فنکاروں، لوک فنکاروں، موسیقاروں اور دستکاروں کو خراجِ تحسین پیش کیا اور انہیں بھارت کی زندہ روایات کا پاسبان اور بھارت کی ثقافتی و اخلاقی طاقت کا ستون قرار دیا۔ انہوں نے اس بات پر زور دیا کہ ان کا کام محض تخلیقی اظہار نہیں ہے بلکہ یہ نسل در نسل علم، اقدار اور مہارتوں کی منتقلی کا ذریعہ ہے۔ بھارت پرو انہیں وقار، پہچان اور روزگار کا ایک پلیٹ فارم فراہم کرتا ہے۔ انہوں نے مسلح افواج کو بھی سلام پیش کیا، جن کی نظم و ضبط پر مبنی کارکردگی خدمت، قربانی اور حب الوطنی کی اقدار کی عکاسی کرتی ہے۔ انہوں نے کہا کہ جب ثقافت اور سکیورٹی ایک ہی مقام پر جمع ہوتے ہیں، تو قومی اعتماد اور اجتماعی عزم کو تقویت ملتی ہے۔

انہوں نے اس مقام — لال قلعہ — کو محض ایک تاریخی یادگار سے بڑھ کر قرار دیا جو بھارت کی اجتماعی یادوں کی عکاسی کرتا ہے۔ یہ وہی جگہ ہے جہاں سے کبھی آزادی کے خوابوں نے شکل اختیار کی تھی اور آج یہ ایک ایسے پلیٹ فارم کے طور پر کھڑا ہے جہاں بھارت کا ثقافتی اعتماد فخر کے ساتھ نظر آ رہا ہے۔ انہوں نے کہا کہ لال قلعہ پر تاریخ اور جدیدیت کا یہ ملاپ ملک کو اپنی تہذیبی اقدار میں گہرائی تک جڑے رہتے ہوئے آگے بڑھنے کی ترغیب دیتا ہے۔

اسپیکر نے شہریوں سے بھارت کے ثقافتی ورثے کے تحفظ اور اس کے فروغ کی اپیل کی۔ انہوں نے زور دے کر کہا کہ تحفظ صرف حکومت کی ذمہ داری نہیں ہے بلکہ ایک مشترکہ سماجی عزم ہے — جس کی بھارت پرو بھرپور طریقے سے توثیق کرتا ہے۔ انہوں نے وزارتِ ثقافت اور وزارتِ سیاحت، ریاستی حکومتوں، شراکت دار اداروں، فنکاروں، رضاکاروں اور تمام متعلقہ فریقوں  کا شکریہ ادا کرتے ہوئے اس یقین کا اظہار کیا کہ بھارت پرو ملک اور دنیا بھر سے آنے والے لوگوں کو ایک یادگار تجربہ فراہم کرے گا۔

اپنے خطاب کا اختتام کرتے ہوئے، اسپیکر نے اس کا ذکر کیا کہ بھارت پرو ایک ایسا تجربہ ہے جو جوڑتا ہے، حوصلہ دیتا ہے اور فخر کا احساس پیدا کرتا ہے۔ انہوں نے شہریوں پر زور دیا کہ وہ — مقامی فن کی حمایت کر کے، دستکاروں کا احترام کر کے، زبانوں اور روایات کا تحفظ کر کے اور روزمرہ کی زندگی میں جمہوری اقدار کو اپنا کر سال بھر اس کے جذبے کو برقرار رکھیں ۔

اس موقع پر حکومتِ ہند کے سیاحت اور ثقافت کے وزیرجناب گجیندر سنگھ شیخاوت اور دیگر معززین بھی موجود تھے۔

पर्यटन मंत्रालय, भारत सरकार द्वारा आयोजित छह दिवसीय ‘भारत पर्व 2026’ के उद्घाटन समारोह में सम्मिलित हुआ। लाल किले के ऐतिहासिक प्रांगण में भारत की विविध परंपराएँ, लोक-कलाएँ, शिल्प और लोक-स्मृतियाँ जिस रूप में उभरकर सामने आईं, वह मन को स्पर्श करने वाला दृश्य था।
इस वर्ष हम अपने… pic.twitter.com/M9E6ujl8X0

— Om Birla (@ombirlakota) January 26, 2026

*****

ش ح۔ ک ح

U. No. 7713

(ریلیز آئی ڈی: 2266619) وزیٹر کاؤنٹر : 17