U Myntri Sorkar Pdeng ba dei peit ia ka Tnad Youth Affairs and Sports u Dr. Mansukh Mandaviya un wan jngoh ia ka nongbah Shillong ha ka jingwan kaba lai sngi naduh ka 29 haduh 31 tarik Jymmang 2026, ban iashim bynta ha ki prokram kiba iadei bad ki kam jong ki samla, ka jingkyntiew ia ki jingdon jingem ba iadei bad ka kam ialehkai, bad ban peit bniah ia ki skhim ba la bei tyngka da ka sorkar pdeng ha ka jylla.

Ha kane ka jingwan jngoh, u Myntri ka sorkar pdeng un iashim bynta ha ka Chintan Shivir ba la pynlong da ka Tnad Youth Affairs.

Ha kane ka sngi yn iadonlang ruh u Myntri ba dei peit ia ka Tnad Sports and Youth Affairs jong ka jylla Meghalaya u Bah Wailadmiki Shylla lem bad kiwei kiwei ki heh ophisar.

U Dr. Mandaviya un plie paidbah ruh ia ka Integrated Multipurpose Indoor Sports Complex ha nongbah Shillong ha ka 30 tarik Jymmang ha ryngkat u Myntri Rangbah ka Jylla Meghalaya u Conrad K. Sangma.

Ka Integrated Multipurpose Indoor Sports Complex, kaba dang shna ha ka jinglut kaba T.132.9 klur, la saindur kum ka jaka ïalehkai ha kaba lah ban pynlong ïa ki jait jingïalehkai kum ka basketball, badminton bad volleyball, nalor kiwei pat ki jingïalehkai hapoh ïing.

Ia kane ka jaka la thmu ruh kum ka jaka ba kongsan na ka bynta ka lympung ialehkai National Games bad kan kynthup ia ki jingdon jingem ba la pyniasoh lang kum ki hall ba lah ban pyndonkam ha ki rukom bapher bapher, ka auditorium, ki jaka ai bam, bad kiwei kiwei.

Ïa ka Host State Contract na ka bynta ka 39th National Games 2026 yn ïasoi ruh bad ka Meghalaya ha ka jingïadonlang ki kynrem ki lyndan bad ki nongmihkhmat jong ka Indian Olympic Association.

U Myntri ka sorkar pdeng un sa pynïaid ruh ïa ka jingïalang peit bniah na ka bynta ki jingpynkhreh kiba ïadei bad ka 39th National Games 2026.

Ha kane ka jingialang yn kynthup ia ki jingbatai bad ki jingiakren kiba iadon bynta lang ki ophisar na ka jylla Meghalaya bad ki nongmihkhmat na kiwei pat ki jylla ka thain shatei lammihngi.

Kum shi bynta jong kane ka jingwan jngoh, u Dr. Mandaviya un leit jurip ruh ïa ka Umsawli Sports Complex ha Shillong, kynthup ïa ki jaka ïalehkai Aquatics bad Tennis, ban peit bniah ïa ki jingdon jingem ba iadei bad ka kam ialehkai kiba dang ïaid shakhmat ha ka jylla.

U Myntri Sorkar Pdeng un peit bniah ruh ia ka jingpyntreikam bad ka jingiaid shaphrang jong ki skhim ba la bei tyngka da ka sorkar pdeng ha Ri-Bhoi district jong ka jylla Meghalaya hapoh ka sienjam Poorvottar Sampark Setu ha ka 31 tarik Jymmang.

Ka jingwan jngoh kaba 3 sngi jong u Myntri Sorkar Pdeng ba dei peit ia ka Tnad Youth Affairs and Sports ia ka thaiñ Shatei Lammihngi ka pyni ïa ka jingkut jingmut jong ka Sorkar India ban pynkhlain ïa ka jingïadei bad ki samla, ban kyntiew ïa ki jingdon jingem ba iadei bad ka kam ïalehkai bad ban kyrshan ïa ka roi ka par ba pura ha ka thaiñ Shatei Lammihngi.

*****

(Release ID: 2266409) visitor counter : 2