കേന്ദ്ര സൂക്ഷ്മ, ചെറുകിട, ഇടത്തരം സംരംഭകത്വ മന്ത്രാലയത്തിന് കീഴിലുള്ള ഖാദി ​ഗ്രാമ വ്യവസായ കമ്മീഷൻ (കെവിഐസി) 'ലോക തേനീച്ച ദിനം-2026' നോടനുബന്ധിച്ച് വെർച്വലായി പരിപാടികൾ സംഘടിപ്പിച്ചു. ന്യൂഡൽഹിയിലെ കെവിഐസിയുടെ ഗാന്ധി ദർശൻ ഓഫീസിൽ നിന്ന്, കെവിഐസി ചെയർമാൻ ശ്രീ മനോജ് കുമാർ രാജ്യത്തുടനീളമുള്ള കെവിഐസി ഓഫീസുകൾ, തേനീച്ച കർഷകർ, ഗുണഭോക്താക്കൾ, ശാസ്ത്രജ്ഞർ, വിദ്യാർത്ഥികൾ, ഉദ്യോഗസ്ഥർ, ജീവനക്കാർ എന്നിവരെ വെർച്വൽ ആയി അഭിസംബോധന ചെയ്തു.  പ്രധാനമന്ത്രി ശ്രീ നരേന്ദ്ര മോദിയുടെ ദർശനത്തിൽ നിന്ന് പ്രചോദനം ഉൾക്കൊണ്ട് 'തേൻ ദൗത്യം' പ്രകാരം, 2017-18 നും 2025-26 നും ഇടയിൽ രാജ്യത്തുടനീളം 246,099 തേനീച്ചപ്പെട്ടികളും തേനീച്ച കോളനികളും കെവിഐസി വിതരണം ചെയ്തതായും അതുവഴി തേൻ ഉത്പാദനം 24,269 മെട്രിക് ടൺ വർദ്ധിപ്പിച്ചതായും കെവിഐസി ചെയർമാൻ പറഞ്ഞു. 2025-26 വർഷത്തിൽ ഏകദേശം 5,512 മെട്രിക് ടൺ തേൻ ഉല്പാദനം നടന്നതായി കണക്കാക്കപ്പെടുന്നു. കൂടാതെ, കെവിഐസിയുമായി ബന്ധപ്പെട്ട തേനീച്ച വളർത്തുന്നവർ 2025-26 സാമ്പത്തിക വർഷത്തിൽ ഏകദേശം 31 കോടി രൂപയുടെ തേൻ കയറ്റുമതി ചെയ്തു. യുഎസ്എ, കാനഡ, യുഎഇ, ഇസ്രായേൽ, സൗദി അറേബ്യ, ഒമാൻ, സിംഗപ്പൂർ, ഓസ്‌ട്രേലിയ, ഖത്തർ, റിപ്പബ്ലിക് ഓഫ് കൊറിയ തുടങ്ങിയ നിരവധി രാജ്യങ്ങൾ തേൻ കയറ്റുമതിയുടെ പ്രധാന ലക്ഷ്യസ്ഥാനങ്ങളിൽ ഉൾപ്പെടുന്നു, ഇത് ഇന്ത്യൻ തേനിന്റെ വർദ്ധിച്ചുവരുന്ന ആഗോള സ്വീകാര്യതയെ പ്രതിഫലിപ്പിക്കുന്നതായും അദ്ദേഹം അഭിപ്രായപ്പെട്ടു.

തേനീച്ചകൾ പ്രകൃതിയുടെയും കാർഷിക ആവാസവ്യവസ്ഥയുടെയും സുപ്രധാന സംരക്ഷകരാണെന്നും, "ധവള വിപ്ലവം മധുര വിപ്ലവമാക്കി" മാറ്റാനുള്ള പ്രധാനമന്ത്രി നരേന്ദ്ര മോദിയുടെ ദർശനം ഗ്രാമങ്ങളിൽ സ്വയം തൊഴിലും സ്വാശ്രയത്വവും ത്വരിതപ്പെടുത്തിയിട്ടുണ്ടെന്നും അദ്ദേഹം പറഞ്ഞു. ഇന്ന്, കൃഷി, പരിസ്ഥിതി, ഗ്രാമീണ സമ്പദ്‌വ്യവസ്ഥ എന്നിവ ശക്തിപ്പെടുത്തുന്നതിനുള്ള ശക്തമായ ഒരു മാധ്യമമായി തേനീച്ച വളർത്തൽ മാറിയിരിക്കുന്നു. തേനീച്ചകളുടെ സംരക്ഷണത്തെക്കുറിച്ച് ലോകം മുഴുവൻ ആശങ്കാകുലരായിരിക്കുന്ന സമയത്ത്, ഇന്ത്യ ഈ ദിശയിൽ നല്ല സംരംഭങ്ങൾ സ്വീകരിച്ചിട്ടുണ്ടെന്ന് അദ്ദേഹം അഭിപ്രായപ്പെട്ടു. 2016-ൽ ഗുജറാത്തിലെ ബനസ്‌കന്തയിൽ "മധുര വിപ്ലവം" ഉദ്ഘാടനം ചെയ്യവേ, "ധവള വിപ്ലവം നടന്നിടത്ത് ഇനി മധുര വിപ്ലവവും ഉണ്ടാകും" എന്ന പ്രധാനമന്ത്രിയുടെ വാക്കുകൾ അദ്ദേഹം ആവർത്തിച്ചു. ഇത് വെറുമൊരു മുദ്രാവാക്യമല്ലെന്നും, ഗ്രാമങ്ങൾക്കും കർഷകർക്കും ഒരു സ്വയം പര്യാപ്ത ഇന്ത്യ  (ആത്മനിർഭർ ഭാരത്) കെട്ടിപ്പടുക്കുന്നതിനുമുള്ള സമഗ്രമായ ഒരു ദർശനമാണെന്നും അദ്ദേഹം കൂട്ടിച്ചേർത്തു. 

തേനീച്ച വളർത്തലിനെ തേൻ ഉൽപ്പാദനത്തിനുള്ള ഒരു മാർഗമായി മാത്രം കാണരുതെന്നും പ്രകൃതി സംരക്ഷണത്തിനും കാർഷിക വളർച്ചയ്ക്കും ഗ്രാമീണ അഭിവൃദ്ധിക്കും ഇത് ശക്തമായ ഒരു ഉപകരണം കൂടിയാണെന്നും രാജ്യത്തുടനീളമുള്ള തേനീച്ച കർഷകരെ ചെയർമാൻ ഓർമിപ്പിച്ചു. തേനീച്ചകളെ സംരക്ഷിക്കുന്നതിനും, കൂടുതൽ ആളുകളെ തേനീച്ച വളർത്തലുമായി ബന്ധിപ്പിക്കുന്നതിനും, പ്രധാനമന്ത്രിയുടെ "മധുര വിപ്ലവം" രാജ്യത്തെ എല്ലാ ഗ്രാമങ്ങളിലേക്കും എത്തിക്കുന്നതിനുമായി ലോക തേനീച്ച ദിനത്തിൽ എല്ലാവരും പ്രതിജ്ഞയെടുക്കണമെന്ന് അദ്ദേഹം ആഹ്വാനം ചെയ്തു.

പൂനെയിലെ സെൻട്രൽ തേനീച്ച ഗവേഷണ പരിശീലന ഇൻസ്റ്റിറ്റ്യൂട്ടി (സിബിആർടിഐയി) ൽ സംഘടിപ്പിച്ച 'തേൻ പ്രദർശനം' കെവിഐസി ചെയർമാൻ വെർച്വൽ ആയി ഉദ്ഘാടനം ചെയ്തു. പരിസ്ഥിതി സംരക്ഷണം, കാർഷിക ഉല്പാദനക്ഷമത, ജൈവവൈവിധ്യം ശക്തിപ്പെടുത്തൽ എന്നിവയിൽ തേനീച്ചകളുടെ പ്രധാന പങ്ക് ഈ പരിപാടികൾ എടുത്തുകാണിച്ചു.

പരിപാടിയിൽ, രാജ്യത്തിന്റെ വിവിധ ഭാഗങ്ങളിൽ നിന്നുള്ള പങ്കാളികൾ ഡിജിറ്റൽ പ്ലാറ്റ്‌ഫോമുകളിലൂടെ തേനീച്ച വളർത്തലുമായി ബന്ധപ്പെട്ട അവരുടെ അനുഭവങ്ങളും വിജയഗാഥകളും പങ്കിട്ടു. കെവിഐസി ജോയിന്റ് ചീഫ് എക്സിക്യൂട്ടീവ് ഓഫീസർ, മറ്റ് ഉദ്യോഗസ്ഥർ, ജീവനക്കാർ, വിവിധ മേഖലകളിൽ നിന്നുള്ള വിദഗ്ധർ, ഖാദി സ്ഥാപനങ്ങളുടെ പ്രതിനിധികൾ എന്നിവർ പരിപാടിയിൽ പങ്കെടുത്തു.

പ്രധാനമന്ത്രി ശ്രീ നരേന്ദ്ര മോദിയുടെ ഊർജ്ജ സംരക്ഷണം, വിഭവങ്ങളുടെ വിവേകപൂർണ്ണമായ ഉപയോഗം, കുറഞ്ഞ ചെലവിൽ ഫലപ്രദമായ മാനേജ്മെന്റ് എന്നിവയെക്കുറിച്ചുള്ള ദർശനത്തിന് അനുസൃതമായാണ് ഇത്തവണത്തെ ലോക തേനീച്ച ദിന പരിപാടികൾ വെർച്വൽ രീതിയിൽ സംഘടിപ്പിച്ചത്.

***

SK

( റിലീസ് ഐ.ഡി: 2264028) സന്ദര്‍ശക കൗണ്ടര്‍ : 29