ہاؤسنگ اور شہری امور کی وزارت نے 19 اور 20 مئی 2026 کو نئی دہلی کے وگیان بھون میں سووَچھ  بھارت مشن-شہری 2.0 کے دو روزہ قومی جائزہ اجلاس کا انعقاد کیا۔ اجلاس کی صدارت مرکزی وزیر برائے ہاؤسنگ اور شہری امور منوہر لال کھٹر نے کی۔

سووچھ بھارت مشن-شہری کے تحت نمایاں پیش رفت درج کی گئی ہے، جہاں اب 97 فیصد وارڈز میں گھر گھر سے کچرا جمع کرنے کی سہولت دستیاب ہے، جبکہ عوام دو ڈبہ، چار ڈبہ اور حتیٰ کہ چھ ڈبہ نظام کے ذریعے کچرے کی علیحدگی کو اپنا رہے ہیں۔

کچرے کی پروسیسنگ میں بھی نمایاں بہتری آئی ہے، جو 2014 میں 16 فیصد سے بڑھ کر 2026 میں 81 فیصد تک پہنچ گئی ہے۔

پرانے کچرے کے ڈھیروں کی صفائی کے عمل میں بھی تیزی آئی ہے، جہاں 2,482 ڈمپ سائٹس پر موجود 26 کروڑ میٹرک ٹن کچرے میں سے 65 فیصد کا ازالہ کیا جا چکا ہے، جس سے تقریباً 9 ہزار ایکڑ قیمتی شہری زمین دوبارہ قابل استعمال بن گئی ہے۔

دو روزہ قومی جائزہ اجلاس کے اہم نکات بیان کرتے ہوئے منوہر لال کھٹر نے کہا، ’’ہمیں ان امور پر توجہ مرکوز کرنی ہوگی جن میں تبدیلی ضروری ہے، چاہے وہ مالیاتی چیلنجز ہوں، ریاستوں اور مرکز کے زیر انتظام علاقوں کے حصے کی فراہمی ہو، عمل درآمد میں رکاوٹیں جیسے ٹینڈر میں تاخیر، زمین کی الاٹمنٹ یا ادارہ جاتی صلاحیتوں میں اضافہ۔ ہمارے پاس ہدف کے مطابق منصوبہ تیار کرنے اور اہداف حاصل کرنے کیلئے صرف 10 ماہ باقی ہیں۔‘‘

انہوں نے کہا کہ مشن کی کامیابی کیلئے اعلیٰ سطحی ذمہ داری اور تفصیلی منصوبہ بندی ناگزیر ہے اور یاد رکھنا چاہیے کہ ’’زنجیر کی مضبوطی اس کی سب سے کمزور کڑی پر منحصر ہوتی ہے۔‘‘

مرکزی وزیر نے ریاست وار اہم مسائل اور چیلنجوں کی نشاندہی کی ضرورت پر زور دیا۔ ریاستوں کو ہدایت دی گئی کہ وہ ’’سووچھتم پورٹل‘‘ پر روزانہ پیش رفت اپ ڈیٹ کریں تاکہ وزارت کی جانب سے مسلسل جائزہ اور سخت نگرانی ممکن ہو سکے۔

انہوں نے رویے میں تبدیلی کی اہمیت اجاگر کرتے ہوئے کہا کہ ’’سوابھاؤ سووچھتا، سنسکار سووچھتا‘‘ کو نصاب کا حصہ بنایا جانا چاہیے۔

جناب منوہر لال کھٹر نے کہا کہ وزرائے اعلیٰ، مرکزی ترقیاتی وزراء اور دیگر سیاسی نمائندوں کی مضبوط سیاسی قیادت اور دلچسپی، خاص طور پر پرانے ڈمپ سائٹس کی صفائی کے عمل کو تیز کرنے میں کلیدی کردار ادا کرے گی۔

دو روزہ کانفرنس میں تلنگانہ کے نائب وزیر اعلیٰ ایم بھٹی وکرمارکا، مہاراشٹر کے نائب وزیر اعلیٰ ایکناتھ شنڈے اور چھتیس گڑھ کے نائب وزیر اعلیٰ ارون ساؤ سمیت 12 ریاستوں کے شہری ترقیاتی وزراء، پرنسپل سکریٹریوں اور سینئر افسران نے شرکت کی۔

اجلاس میں آندھرا پردیش، اروناچل پردیش، بہار، ہریانہ، مدھیہ پردیش، راجستھان، سکم، اتر پردیش، دہلی، مغربی بنگال، اتراکھنڈ اور جموں و کشمیر کے نمائندے بھی شریک ہوئے۔

اس کے علاوہ ماحولیات، جنگلات و موسمیاتی تبدیلی، پینے کے پانی و صفائی ستھرائی، سڑک ٹرانسپورٹ و شاہراہیں، پنچایتی راج، الیکٹرانکس و اطلاعاتی ٹیکنالوجی، دیہی ترقی اور بجلی سمیت 14 مرکزی وزارتوں کے نمائندوں نے بھی صفائی اور کچرا انتظامی نظام پر اشتراک اور تجاویز کیلئے اجلاس میں حصہ لیا۔

یہ کانفرنس موضوعاتی جائزہ اور معلومات کے تبادلے کا ایک اہم پلیٹ فارم ثابت ہوئی، جس میں سووچھ بھارت مشن کے مختلف پہلوؤں پر 11 خصوصی اجلاس منعقد کیے گئے۔

اجلاسوں میں ادارہ جاتی مضبوطی، نمایاں صفائی، سائنسی بنیادوں پر کچرے کی پروسیسنگ، کچرے کی علیحدگی، کچرے سے توانائی پیدا کرنے کے نظام، صفائی ستھرائی اور استعمال شدہ پانی کے انتظام، صفائی کارکنوں کی حفاظت اور خصوصی جغرافیائی علاقوں میں عمل درآمد جیسے موضوعات پر تبادلہ خیال کیا گیا۔

مشاورتی عمل اور مباحثوں کے دوران زمینی سطح پر کام میں تیزی، مربوط کمانڈ و کنٹرول مراکز کے ذریعے نگرانی، علاقائی منصوبہ بندی اور کلسٹر پر مبنی کچرا انتظامی حکمت عملی کو فروغ دینے، بڑے شہروں میں بنیادی ڈھانچے کی مضبوطی اور منصوبوں کی پائیداری کیلئے مستحکم مالیاتی ماڈلز تیار کرنے کی ضرورت پر زور دیا گیا۔

 

دو روزہ قومی جائزہ اجلاس، پراگتی — پیشگی فعال حکمرانی اور بروقت عمل درآمد جائزہ میکانزم سے قبل مرحلہ وار جائزہ نظام کا حصہ تھا، جسے زمینی سطح پر تفصیلی جانچ، بین الحکومتی مشاورت اور واضح عملی نکات کی معاونت حاصل تھی، تاکہ زیادہ مؤثر اور نتیجہ خیز تبادلہ خیال کو یقینی بنایا جا سکے۔

یکم اپریل 2026 سے نئے سالڈ ویسٹ مینجمنٹ قواعد نافذ ہونے کے بعد بدلتے ہوئے کچرا انتظامی نظام کیلئے ہر سطح پر اسٹریٹجک مداخلت اور مضبوط ادارہ جاتی ذمہ داریوں کی ضرورت ہوگی۔

اس کے تحت دو سطحی کچرا علیحدگی کے نظام سے آگے بڑھتے ہوئے چار سطحی لازمی کچرا علیحدگی نافذ کی جائے گی، جس میں گیلا، خشک، سینیٹری اور گھریلو خطرناک کچرا الگ الگ رکھا جائے گا۔

سیاسی نمائندوں کو چار سطحی کچرا علیحدگی کے مرکزی سہولت کار کے طور پر اہم ذمہ داری دی جائے گی، جبکہ بڑے پیمانے پر کچرا پیدا کرنے والے اداروں کی جوابدہی، ان کی فہرست سازی، بیداری اور تیاری کو بھی یقینی بنایا جائے گا۔

اس کے علاوہ ’’آلودگی پھیلانے والا قیمت ادا کرے‘‘ کے اصول کے تحت صارف فیس اور سخت نفاذ پر توجہ دی جائے گی، جبکہ مرکزی یکساں پورٹل کے ذریعے ڈیجیٹل نگرانی اور شفاف رپورٹنگ کو فروغ دیا جائے گا۔

ان نکات کو سپریم کورٹ کی ہدایات کے ذریعے بھی مزید مضبوط بنایا گیا ہے۔

مرکزی وزیر منوہر لال کھٹر نے ان قواعد کے مکمل اور مؤثر نفاذ پر زور دیا۔

قومی جائزہ اجلاس نے ’’پورے حکومتی نظام‘‘ کے نقطۂ نظر کو مزید مستحکم کیا، جس کے تحت مختلف وزارتوں اور ریاستوں کے درمیان اشتراک پر مبنی کارروائی کو فروغ دیتے ہوئے وکست بھارت 2047 کے وژن کے حصول کی سمت پیش رفت کو تقویت دی گئی۔

************

ش ح ۔   م  د ۔  م  ص

(U :  7350)

(ریلیز آئی ڈی: 2263497) وزیٹر کاؤنٹر : 5