મુંબઈ-અમદાવાદ બુલેટ ટ્રેન પ્રોજેક્ટ હેઠળ ગુજરાતના ભરૂચ જિલ્લાના ત્રાલસી ગામ નજીક ભારતીય રેલવે ટ્રેક ઉપર 330 મીટર લાંબા (100+130,100 મીટર) સ્ટીલ બ્રિજના 130 મીટર લાંબા સ્પાનનું સફળતાપૂર્વક લોન્ચિંગ પૂર્ણ કરવામાં આવ્યું છે. આ બ્રિજ વેસ્ટર્ન ડેડિકેટેડ ફ્રેટ કોરિડોરના સુરત-વડોદરા વિભાગ વચ્ચે આવેલા DFCC ટ્રેકને પાર કરે છે.

આ સ્ટીલ બ્રિજ ત્રણ સ્પાન ધરાવતો બ્રિજ છે, જેમાં 100+130 મીટરનો કન્ટિન્યુઅસ (Continuous) સ્પાન તથા 100 મીટરનો સિમ્પલી સપોર્ટેડ (Simply Supported) સ્પાન સમાવેશ થાય છે. તેમાંમાંથી 130 મીટર લાંબા સ્પાનનું લોન્ચિંગ કાર્ય 16 મે 2026ના રોજ પૂર્ણ કરવામાં આવ્યું હતું. આશરે 18 મીટર ઊંચાઈ અને 15.5 મીટર પહોળાઈ ધરાવતા આ સ્પાનનું વજન અંદાજે 2900 મેટ્રિક ટન છે.

100 મીટર લાંબા સિમ્પલી સપોર્ટેડ સ્પાન, જેનું વજન આશરે 1500 મેટ્રિક ટન છે, તેને માર્ચ 2026 દરમિયાન નિર્માણ સ્થળ પર જ (ઇન-સીટુ) સ્થાપિત કરવામાં આવ્યું હતું. બાકીના 100 મીટર લાંબા કન્ટિન્યુઅસ સ્પાન, જેનું વજન આશરે 1600 મેટ્રિક ટન છે, તેને પણ નિર્માણ સ્થળ પર જ સ્થાપિત કરવામાં આવશે.

બ્રિજની સંપૂર્ણ રચના (100+130 મીટર કન્ટિન્યુઅસ સ્પાન તથા 100 મીટર સિમ્પલી સપોર્ટેડ સ્પાન) પૂર્ણ થયા બાદ તેનું કુલ વજન અંદાજે 6100 મેટ્રિક ટન થશે. ગુજરાતના ઉમરગામ સ્થિત કાર્બન ફેક્ટરી વર્કશોપમાં નિર્માણ પામેલા આ સ્ટીલ બ્રિજોને 100 વર્ષની આયુષ્યને ધ્યાનમાં રાખીને ડિઝાઇન કરવામાં આવ્યા છે.

130 મીટર લાંબા આ સ્પાનના નિર્માણમાં આશરે 1,21,373 ટોર-શિયર પ્રકારના હાઈ સ્ટ્રેન્થ (TTHS) બોલ્ટ, C5 સિસ્ટમ પેઇન્ટિંગ તથા મેટાલિક બેરિંગનો ઉપયોગ કરવામાં આવ્યો છે. આ સ્પાનને જમીનથી આશરે 14 મીટરની ઊંચાઈએ અસ્થાયી ટ્રેસ્ટલ્સ પર એસેમ્બલ કરવામાં આવ્યો હતો અને બે સેમી-ઓટોમેટિક જેકની મદદથી સ્વચાલિત પદ્ધતિ દ્વારા આગળ ધપાવવામાં આવ્યો હતો. દરેક જેકમાં મેક-એલોય બાર્સ દ્વારા 250 ટન સુધીની પુશિંગ ક્ષમતા છે.

ફ્રેટ ટ્રેક પર અત્યંત સાવધાનીપૂર્વક સંકલિત ટ્રાફિક વ્યવસ્થાઓ હેઠળ લોન્ચિંગ કાર્ય સફળતાપૂર્વક પૂર્ણ કરવામાં આવ્યું. આ વ્યવસ્થાઓ દ્વારા તબક્કાવાર રીતે કાર્ય પૂર્ણ કરવામાં આવ્યું, જેના કારણે લોન્ચિંગની સલામતી અને ચોકસાઈ જળવાઈ રહી તથા માલગાડીઓની અવરજવરમાં ન્યૂનતમ વિક્ષેપ સુનિશ્ચિત થયો.

આયોજિત 17 સ્ટીલ પુલોમાંથી 14 ગુજરાતમાં પૂર્ણ થઈ ગયા છે. મુંબઈ-અમદાવાદ બુલેટ ટ્રેન કોરિડોર માટે 28 સ્ટીલ પુલોનું આયોજન છે.

 

(રીલીઝ આઈડી: 2263438) મુલાકાતી સંખ્યા : 13