اپنے تین روزہ سرکاری دورے کے دوسرے دن،خواتین اور بچوں کی ترقی کی مرکزی وزیر مملکت محترمہ ساوتری ٹھاکر نےآج سکم کے نامچی ضلع میں متعدد دورے کیے، جو ریاست کے ثقافتی ورثے، معاشی امکانات اور تعلیمی امنگوں کی عکاسی کرتے ہیں۔

وزیر موصوف نے روانگلا میں بدھ پارک کا دورہ کیا اور اسے امن ، خوبصورتی اور روحانی توانائی کا ایک قابل ذکر سنگم قرار دیا ۔ انہوں نے کہا کہ ہمالیہ کی گود میں واقع بھگوان بدھ کا شاندار مجسمہ ذہن کو سکون فراہم کرتا ہے اور روح کو نئی توانائی سے بھر دیتا ہے ۔

وزیرِ موصوف نے مشہور ٹیمی ٹی گارڈن اور ٹی فیکٹری کا بھی دورہ کیا۔ علاقے کی صاف اور قدرتی خوبصورتی کے درمیان انہوں نے چائے کی پیداوار کے عمل کا مشاہدہ کیا اور معیار کے اصولوں کے ساتھ ساتھ مقامی برادریوں کے اہم تعاون کے بارے میں براہِ راست معلومات حاصل کیں۔وزیرموصوف نے کہا کہ اعلیٰ معیار اور منفرد شناخت کی وجہ سے قومی و بین الاقوامی سطح پر معروف ٹیمی چائے نہ صرف سکم کے ثقافتی ورثے کی علامت ہے بلکہ یہ مقامی روزگار، سیاحت اور اقتصادی ترقی کا ایک اہم ذریعہ بھی ہے۔

بعد میں  وزیر موصوف نے نیشنل انسٹی ٹیوٹ آف ٹیکنالوجی ، سکم کا دورہ کیا ، جہاں انہوں نے تعلیمی ترقی ، طلباء کی فلاح و بہبود اور ادارہ جاتی اقدامات کے حوالےسے حکام کے ساتھ بات چیت کی ۔ بات چیت خطے میں تعلیم کو مضبوط بنانے ، ہنر مندی کے فروغ اور نوجوانوں کو بااختیار بنانے پر مرکوز رہی ۔ اس موقع پر سکم سے رکن پارلیمنٹ جناب اندرا ہینگ سبّا ، بارفنگ کے ایم ایل اے جناب رکسل دورجی بھوٹیا ، محترمہ.ضلع مجسٹریٹ نامچی  انوپا تملنگ ، ریاستی خواتین کمیشن کی چیئرپرسن محترمہ ٹینی ڈوما بھوٹیا ،  وزیر اعلی کے ایڈیشنل پولیٹیکل سکریٹری جناب بشنو شرما  اور دیگر سینئر انتظامی اور محکمہ جاتی افسران موجود تھے۔

ماحولیاتی تحفظ کے لیے اجتماعی عزم کا اعادہ کرتے ہوئے ، محترمہ ٹھاکر نے ‘‘ایک پیڑ ماں کے نام’’ مہم کے تحت ایک پودا بھی لگایا ، جو سبز اور زیادہ پائیدار مستقبل کے عہد کی علامت ہے ۔

مزید برآں ، وزیرموصوف نے اناج کے ذخیرے اور تقسیم کے نظام کا جائزہ لینے کے لیے نام تھانگ میں فوڈ گودام کا معائنہ کیا ۔  انہوں نے مشاہدہ کیا کہ یہ سہولت دور دراز کے علاقوں میں ضروری کھانے پینے کی اشیاء کی بلاتعطل فراہمی کو یقینی بنانے میں اہم کردار ادا کرتی ہے ۔  احاطے کی صفائی ، ذخیرہ اندوزی کے منظم انتظامات اور عہدیداروں اور عملے کی لگن کی تعریف کرتے ہوئے ، محترمہ ٹھاکر نے سپلائی چین کو مزید مضبوط کرنے کے لیے ضروری ہدایات جاری کیں ۔  انہوں نے اس بات پر زور دیا کہ دور دراز کے علاقوں میں شہریوں کے لیے بروقت غذائی تحفظ حکومت کی اولین ترجیح ہے ۔

محترمہ ٹھاکر نے نام تھانگ میں پردھان منتری آواس یوجنا کے مستفیدین کے ساتھ بھی بات چیت کی ۔  اپنی بات چیت میں ، مستفیدین نے بتایا کہ کس طرح اسکیم کے تحت تعاون نے ان کی زندگیوں میں مثبت تبدیلیاں لائی ہیں ۔

وزیر موصوف نے کہا کہ وزیر اعظم جناب نریندر مودی کی قیادت  میں یہ اسکیم غریب کنبوں کے تحفظ ، وقار اور بہتر مستقبل کی بنیاد بن گئی ہے ۔  انہوں نے اس بات کا اعادہ کیا کہ فلاحی اسکیموں کے فوائد آخری شخص تک پہنچنا یقینی بنانا حکومت کی اولین ترجیح ہے ۔

***

 

 

ش ح۔ک ا۔ ع د

UR-7095

 

 

(ریلیز آئی ڈی: 2261324) وزیٹر کاؤنٹر : 4