وزارتِ اقلیتی امور (MoMA) نے ’’بھاگیداری سے بھاگیودے‘‘ (اشتراک سے خوش حالی) کے رہنمایانہ موضوع کے تحت، ’’اقلیتی فلاح – وکست بھارت کے لیے مصنوعی ذہانت کے ذریعے شمولی ترقی‘‘ کے موضوع پر قومی کانکلیو کا کام یابی سے انعقاد کیا۔ اس کانکلیو میں ملک بھر سے ریاستوں اور مرکز کے زیرِ انتظام علاقوں کے سیکرٹریوں اور نمائندوں سمیت اعلیٰ حکام یکجا ہوئے، تاکہ شراکتی طرزِ حکمرانی، امدادی وفاقیت، اور ٹیکنالوجی پر مبنی عوامی خدمات کی فراہمی کے ذریعے اقلیتی بہبود میں انقلاب لانے کا لائحہ عمل مرتب کیا جا سکے۔

یہ تقریب ایک ترقی یافتہ، شمولیت پر مبنی، اور مساوی بھارت کے  وژن، ’وکست بھارت@2047‘  کی حمایت میں پالیسی سطح کے مکالمے، شراکت داروں کی مشاورت، اور باہمی تعاون کے لیے ایک اعلیٰ سطحی پلیٹ فارم ثابت ہوئی۔ اے آئی سمٹ کے بعد، محترم وزیرِ اعظم جناب نریندر مودی اور محترم وزیر برائے اقلیتی امور جناب کرن رجیجو کے اس نقطہ نظر کو ملحوظ رکھتے ہوئے کہ ہر وزارت کے کام کاج میں جدید ترین ٹیکنالوجیز کو شامل کیا جائے، وزارتِ اقلیتی امور نے اقلیتوں کی زیادہ مؤثر انداز میں خدمت کے لیے بات چیت کرنے والے اے آئی بوٹس تیار کرنے میں سبقت حاصل کی ہے۔

شرکا سے خطاب کرتے ہوئے، وزارتِ اقلیتی امور کے سیکرٹری ڈاکٹر سریوتسا کرشنا نے اس کانکلیو کو مرکز اور ریاستوں/مرکز کے زیرِ انتظام علاقوں کے درمیان بامقصد مکالمے، مسائل کے حل، اور اختراعی خیالات کے تبادلے کے لیے ایک کھلا فورم قرار دیا۔ وزارت نے اقلیتی برادریوں کے لیے فلاحی اسکیموں کے زمینی سطح پر مؤثر نفاذ کو یقینی بنانے کی خاطر مسلسل ادارہ جاتی روابط اور مربوط کارروائی کی اہمیت پر زور دیا۔

وزارت کے خطاب کا ایک کلیدی محور طرزِ حکمرانی اور عوامی انتظام و انصرام کو جدید بنانے میں مصنوعی ذہانت کا انقلابی کردار تھا۔ وزارت نے نمایاں کیا کہ نگرانی کے فریم ورکس کو مضبوط بنانے، شکایات کے ازالے کے طریقہ کار کو بہتر کرنے، ڈیٹا پر مبنی فیصلہ سازی کو ممکن بنانے، اور نچلی سطح پر نفاذ کے چیلنجوں کے بروقت حل کو یقینی بنانے میں مصنوعی ذہانت سے لیس ٹولز مرکزی حیثیت کے حامل ہوں گے۔

کلیدی مباحثے

کانکلیو میں وسیع تر مشاورت کی گئی جس میں شریک ریاستوں اور مرکز کے زیرِ انتظام علاقوں نے وزارت کی مختلف اسکیموں اور پروگراموں سے متعلق نفاذ کے چیلنجوں، عملی خدشات، اور میدانی سطح کے مسائل کو نمایاں کیا۔ وزارت کے اعلیٰ حکام نے ریاستوں اور مرکز کے زیرِ انتظام علاقوں کے نمائندوں کے ساتھ تفصیلی گفت و شنید کی، اور فلاحی اقدامات کے ہموار نفاذ، بہتر ہم آہنگی، اور وسیع تر رسائی میں معاونت کے لیے ضروری وضاحتیں اور قابلِ عمل تجاویز فراہم کیں۔

ہنر مندی کا فروغ اور ہم آہنگی

ہنر مندی اور استعداد کار بڑھانے میں ادارہ جاتی ہم آہنگی پر توجہ مرکوز کرنے والے ایک خصوصی سیشن کی قیادت وزارتِ اسکل ڈیولپمنٹ اینڈ انٹرپرینیورشپ کے حکام نے کی۔ مباحثوں میں اقلیتی نوجوانوں کے لیے روزگار کے حصول اور ذرائع آمدن کے مواقع بڑھانے کے مشترکہ ہدف کے ساتھ، وزارتِ اسکل ڈیولپمنٹ کی مہارتی پہل کاریوں اور وزارتِ اقلیتی امور کے فلاحی پروگراموں کے مابین اشتراک اور یکجہتی کے پہلوؤں کا جائزہ لیا گیا۔

شمولی  حکمرانی کے لیے مصنوعی ذہانت اور ٹیکنالوجی

جنریشن انڈیا نے ہنر مندی، تربیت، اور روزگار کے مواقع پیدا کرنے کے لیے مصنوعی ذہانت اور ٹیکنالوجی پر مبنی حلوں پر ایک جامع سیشن پیش کیا، جس میں افرادی قوت کی تیاری، روزگار کی نقشہ سازی، اور نتائج پر مبنی نفاذ کے فریم ورکس کے حوالے سے عالمی سطح پر مروجہ بہترین طریقوں کو نمایاں کیا گیا۔

مصنوعی ذہانت کی صفِ اول کی تنظیموں – ایک سٹیپ فاؤنڈیشن ، گیانی (Gnani)، اور سروَم (Sarvam) – نے عوامی خدمات کی فراہمی کے لیے قابلِ توسیع ڈیجیٹل مداخلتوں اور مصنوعی ذہانت سے لیس گورننس ٹولز پر تکنیکی پریزنٹیشنز پیش کیں۔ ان سیشنز میں اسٹریٹجک منصوبہ بندی، مستحقین کے تعین، بلاتعطل نگرانی، شکایات کے انتظام، اور شہریوں پر مرکوز فلاحی خدمات کی فراہمی پر محیط عملی اور فوری استعمال کے لیے تیار حلوں کا عملی مظاہرہ کیا گیا۔

خاص طور پر حج سیزن 2027 کے لیے، وزارت کا نقطہ نظر یہ ہے کہ اس مقدس سفر کو مزید محفوظ اور ہموار بنانے کے لیے بڑے پیمانے پر مصنوعی ذہانت کا استعمال کیا جائے۔

کانکلیو کا اختتام جامع ترقی اور جوابدہ طرزِ حکمرانی کے لیے مصنوعی ذہانت اور ڈیجیٹل ٹولز کو بروئے کار لانے کے مشترکہ عزم کے ساتھ ہوا۔ توقع ہے کہ کانکلیو کی سفارشات اور مباحثے ٹیکنالوجی پر مبنی اقلیتی بہبود کے لیے ایک دور اندیش لائحہ عمل تشکیل دیں گے، جس سے ’وکست بھارت@2047‘ کے سفر میں جامع ترقی اور شراکتی پیش رفت کو یقینی بنانے کے حکومتی عزم کو تقویت ملے گی۔

***

ش ح – ع ا

U. No. 7084

(ریلیز آئی ڈی: 2261198) وزیٹر کاؤنٹر : 9