வருமான வரிச் சட்டம், 2025, ஏப்ரல் 1, 2026 முதல் அமலுக்கு வந்தது. இதன் விளைவாக, பல்வேறு சட்டப்பூர்வ விதிகளில் உள்ள மற்ற மாற்றங்களுடன், காலாண்டு TDS/TCS படிவங்கள், தணிக்கை அறிக்கைகள், PAN/TAN விண்ணப்பங்கள், வெளிநாட்டுப் பணப் பரிமாற்றங்கள், இலாப நோக்கற்ற நிறுவனங்களின் பதிவிற்கான தற்காலிக/ஒப்புதல் போன்றவை தொடர்பான பல வருமான வரிப் படிவங்களிலும் மாற்றங்கள் செய்யப்பட்டுள்ளன. இது தொடர்பாக, புதிய விதிகள், புதிய படிவங்கள் போன்றவை குறித்து வரி செலுத்துவோர் மற்றும் வரிப்பிடித்தம் செய்வோருக்கு விழிப்புணர்வை ஏற்படுத்தவும், உணர்த்தவும், தமிழ்நாடு மற்றும் புதுச்சேரி, வருமான வரி முதன்மை தலைமை ஆணையர் அலுவலகத்தால்,  மே 12,  2026 அன்று, சென்னை, நுங்கம்பாக்கத்தில் உள்ள வருமான வரி அலுவலகத்தில், வருமான வரிச் சட்டம், 2025 குறித்த  விழிப்புணர்வு நிகழ்ச்சியான “ப்ராரம்ப்  2026, சென்னை” நடத்தப்பட்டது. சென்னை, வருமான வரி தலைமை இயக்குநர் திரு. அருண் சி. பாரத், இ.வ.ப. (புலனாய்வு)  அவர்கள் வரவேற்புரை வழங்கினார்.  சிறப்பு விருந்தினரான, தமிழ்நாடு மற்றும் புதுச்சேரி, வருமான வரி முதன்மைத் தலைமை ஆணையர் திரு. சுனில் பாஜ்பாய், இ.வ.ப. அவர்கள் இந்நிகழ்ச்சிக்குத் தலைமையேற்று சிறப்புரையாற்றினார்.  வரி செலுத்துவோர், வரிப் பிடித்தம் செய்பவர்கள் மற்றும் CII, FICCI, CREDAI, SIRC-ICAI மற்றும் பல்வேறு வர்த்தக சங்கங்களின் உறுப்பினர்கள் உள்ளிட்ட ஏராளமானோர் இந்நிகழ்ச்சியில் கலந்துகொண்டனர். இந்த நிகழ்வின் போது, ​​வருமான வரிச் சட்டம், 2025-இன் சிறப்பம்சங்கள் பவர்பாயிண்ட் விளக்கக்காட்சி மூலம் வழங்கப்பட்டன, மேலும், பல்வேறு அத்தியாயங்கள் குறித்த அடிக்கடி கேட்கப்படும் கேள்விகளின் தொகுப்பான 'கர் சேது' மற்றும் 'கர் சாத்தி' உரையாடல் மென்பொருள் ஆகியவற்றைப் பற்றி செயல்விளக்கம் அளிக்கப்பட்டது. வருமான வரிச் சட்டம், 2025-இன் சிறப்பம்சங்களில், பழைய சட்டத்தில் 5.12 லட்சம் வார்த்தைகளாக இருந்த மொத்த வார்த்தைகளின் எண்ணிக்கை, புதிய சட்டத்தில் 2.6 லட்சம் வார்த்தைகளாகக் குறைக்கப்பட்டுள்ளது; மேலும் பல எளிமைப்படுத்தல்களுக்கு மத்தியில், 'வரி ஆண்டு' என்ற கருத்து அறிமுகப்படுத்தப்பட்டுள்ளது, இது 'முந்தைய ஆண்டு' மற்றும் 'மதிப்பீட்டு ஆண்டு' போன்ற சொற்களின் தற்போதைய பயன்பாட்டை நீக்குகிறது.  வருமான வரிச் சட்டம், 2025-இன் ஒட்டுமொத்த அணுகுமுறையானது, சட்டத்தை எளிமைப்படுத்துதல், எளிதாகப் படிப்பதற்காக அட்டவணைகள் மற்றும் சூத்திரங்களைப் பயன்படுத்துதல், எளிமைப்படுத்தப்பட்ட மேற்கோள் காட்டும் முறை, கடினமான சட்டச் சொற்களுக்குப் பதிலாக புதிய சொற்களைப் பயன்படுத்துதல் போன்றவை ஆகும்.  வருமான வரிச் சட்டம், 2025 குறித்து வரி செலுத்துவோர் மற்றும் வரிப்பிடித்தம் செய்வோரிடையே விழிப்புணர்வை மேம்படுத்தும் வகையில், துறையால் ஒரு விரிவான பரப்புரை மற்றும் கல்விப் பொருட்களின் தொகுப்பு உருவாக்கப்பட்டுள்ளது. மேலும், PAN விண்ணப்பம், TDS அறிக்கைகள் போன்ற பல்வேறு விஷயங்களுக்குப் பயன்படுத்த வேண்டிய படிவங்கள்; வரும் மாதங்களில் வரிக் கணக்குகளைத் தாக்கல் செய்யப் பயன்படுத்த வேண்டிய வருமான வரி அறிக்கை (ITR); முன்கூட்டி செலுத்து வரி மற்றும் பிற வரிகளைச் செலுத்த வேண்டிய பிரிவுகள் மற்றும் செலுத்துசீட்டு போன்ற வருமான வரிச் சட்டம், 2025 தொடர்பான அடிப்படைக் கேள்விகளுக்கு வரி செலுத்துவோரின் உடனடிக் கையேடாக, துறை கணிசமான மற்றும் பயனுள்ள ஆதாரப் பொருட்களை வழங்கியுள்ளது என்று தெரிவிக்கப்பட்டது. அவை பின்வருமாறு:

I.   கர் சாத்தி:

  இது, 2026-27 மதிப்பீட்டு ஆண்டிற்கான வருமான வரி அறிக்கைகளைத் (ITR) தாக்கல் செய்வதில் வரி செலுத்துவோருக்கு உதவுவதற்காக உருவாக்கப்பட்ட ஒரு செயற்கை நுண்ணறிவு (AI) மூலம் இயங்கும் உரையாடல் மென்பொருள் (chatbot) ஆகும். இது, புதிய வருமான வரிச் சட்டம், 2025 குறித்து 24/7, நிகழ்நேர வழிகாட்டுதலை வழங்குவதற்காக வருமான வரித் துறையின் அதிகாரப்பூர்வ இணையதளத்தில் ஒருங்கிணைக்கப்பட்டுள்ளது. வரி அறிவிப்புகள், வரியைத் திரும்பப்பெறுதல், தாக்கல் செய்ய வேண்டிய வருமான வரிக் கணக்கு வகை ஆகியவை குறித்த கேள்விகளுக்கு வரி செலுத்துவோருக்கு வழிகாட்டுவதும், வருமான வரி தொடர்பான அடிப்படைக் கேள்விகளுக்கு உதவுவதும் இதன் நோக்கமாகும். இது படிப்படியான வழிகாட்டுதலை வழங்குகிறது, சிக்கலான வரிச் சொற்களை விளக்குகிறது, மேலும் வரி தாக்கல்களில் ஏற்படும் தவறுகளைக் குறைப்பதற்காக சாத்தியமான பிழைகளைச் சுட்டிக்காட்டுகிறது.

II. கர் சேது:

  இது, 1961 ஆம் ஆண்டு வருமான வரிச் சட்டத்திலிருந்து 2025 ஆம் ஆண்டு வருமான வரிச் சட்டத்திற்கு மாறும் காலகட்டத்தில், வரிப்பிடித்தம் செய்வோர், வரி செலுத்துவோர், தொழில் வல்லுநர்கள் மற்றும் அதிகாரிகளுக்கு உதவும் வகையில், அடிக்கடி கேட்கப்படும் கேள்விகளின் (FAQs) தொகுப்பாக வடிவமைக்கப்பட்ட ஒரு முன்முயற்சியாகும்.  இந்த ஆவணத்தில் வரி செலுத்துதல், வசூலித்தல் மற்றும் வரியைத் திரும்பப் பெறுதல்; வருமான வரிக் கணக்குகளைச் சமர்ப்பித்தல், TDS இணக்கம் போன்ற பல்வேறு அத்தியாயங்கள் உள்ளன. இதனை கீழே கொடுக்கப்பட்டுள்ள இணைப்பில் உள் நுழைவதன் மூலம் அணுகலாம்:

https://www.incometaxindia.gov.in/documents/20117/43120/Updated-FQAs-on-Interplay%26Transitions.pdf/dda21cfd-28be-d931-ad5c-6459ecbd2ea7?version=2.0&t=1775128133037

III. மதுகர் சித்திரக்கதை புத்தகம்:

  சட்டத்தை எளிதில் புரிந்துகொள்வதற்காக, இது பொதுமக்களுக்கும் குறிப்பாகப் பள்ளி மாணவர்களுக்கும் அறிமுகப்படுத்தப்பட்டுள்ளது. தேசத்தைக் கட்டியெழுப்புதல் மற்றும் வரி எழுத்தறிவு போன்ற சிக்கலான தலைப்புகளை விளக்க, இந்த சித்திரக்கதை கதை சொல்லும் முறையைப் பயன்படுத்துகிறது.  இதை வருமான வரித் துறையின் அதிகாரப்பூர்வ இணையதளத்தில் உள் நுழைவதன் மூலம் அணுகலாம்: https://www.incometaxindia.gov.in/comic-books

 

IV. சிற்றேடுகள்:

  பல்வேறு படிவங்களை நன்கு புரிந்துகொள்வதற்காகவும், புதிய வருமான வரிச் சட்டம், 2025-இன் முக்கிய அம்சங்கள் மற்றும் புதிய வருமான வரி விதிகள், 2026-க்கு மேற்கொள்ளப்பட்ட மாற்றத்தை விவரிக்கும் திருத்தப்பட்ட படிவங்கள் குறித்தும்  சிற்றேடுகள் தயாரிக்கப்பட்டுள்ளன. இவற்றை வருமான வரித் துறையின் அதிகாரப்பூர்வ இணையதளத்தில் அணுகலாம்.

https://www.incometaxindia.gov.in/pamphlets

     விழிப்புணர்வு நிகழ்ச்சியில் பங்கேற்றவர்களுக்கு, 'கர் சாத்தி' உரையாடல் மென்பொருள் பற்றிய செயல்முறை விளக்கம் மற்றும் அனுபவத்தை வழங்கும் ஒரு மின்னணு கையேடும் (kiosk)  வழங்கப்பட்டது. மேலும், தமிழ்நாடு மற்றும் புதுச்சேரியில் உள்ள வரி செலுத்துவோர் மற்றும் வரிப்பிடித்தம் செய்வோரிடையே விழிப்புணர்வை ஏற்படுத்துவதற்காக, தமிழ்நாடு மற்றும் புதுச்சேரி முழுவதும் உள்ள அதிகார வரம்புக்குட்பட்ட வருமான வரி முதன்மை ஆணையர்கள் மற்றும் வருமான வரி ஆணையர்கள் (TDS) ஆகியோரால் நடத்தப்படும் நேரடி விழிப்புணர்வு நிகழ்ச்சிகள் பின்வரும் அட்டவணைப்படி நடத்தப்பட  உள்ளன:

 

                             

****

TV/SH

(வெளியீட்டு அடையாள எண்: 2260395) வருகையாளர் எண்ணிக்கை : 30