صنعت و داخلی تجارت کے فروغ کے محکمہ کے سکریٹری جناب امردیپ سنگھ بھاٹیہ نے قومی صنعتی راہداری پروگرام کے تحت جاری منصوبوں کی پیش رفت کا جائزہ لینے  اور صنعتی شعبے کے متعلقہ فریقوں سے ملاقات کرنے کے واسطے  ہریانہ اور راجستھان میں اہم صنعتی منصوبوں کے  مقامات کا دورہ کیا۔

دورے کا آغاز ہریانہ کے ضلع مہندر گڑھ میں نانگل چودھری میں واقع مربوط کثیر جہتی لاجسٹک مرکز   (آئی ایم ایل ایچ) کے جائزے سے ہوا۔ تقریباً آٹھ سو چھیاسی ایکڑ پر پھیلا  ہوا یہ منصوبہ مانیسر، باول، دھروہیرا، مشرقی راجستھان اور قومی راجدھانی خطے کے مغربی و شمالی ہریانہ کے بڑے صنعتی علاقوں سے مال برداری کے لیے تیار کیا جا رہا ہے۔

اس منصوبے کو حکومتِ ہند نے 1,029  کروڑ روپے کی تخمینی لاگت سے منظوری دی ہے اور اسے سرکاری و نجی شراکت داری ماڈل پر خصوصی کمپنی کے ذریعے تیار کیا جا رہا ہے، جس میں قومی صنعتی راہداری ترقیاتی ادارہ اور ہریانہ اسٹیٹ انڈسٹریل اینڈ انفراسٹرکچر ڈیولپمنٹ کارپوریشن کی مساوی شراکت ہے۔سکریٹری نے پہلے مرحلے کی ترقیاتی پیش رفت، بیرونی رابطہ  کے کاموں، اندرونی ریلوے ڈھانچے اور مجوزہ لاجسٹک سہولیات جیسے برآمد و درآمد زون، گودام، کنٹینر اسٹوریج، نقل و حمل کا  زون اور تجارتی علاقوں کا جائزہ لیا۔

قومی صنعتی راہداری ترقیاتی کارپوریشن کے چیف ایگزیکٹو افسر اور منیجنگ ڈائریکٹر جناب رجت کمار سینی بھی اس دورے میں ان کے ہمراہ تھے۔ ہریانہ میں ہریانہ اسٹیٹ انڈسٹریل اینڈ انفراسٹرکچر ڈیولپمنٹ کارپوریشن کے منیجنگ ڈائریکٹر جناب سشیل سروان، مہندر گڑھ کی ڈپٹی کمشنر محترمہ انوپما انجلی، نارنول کے سب ڈویژنل افسر جناب انیرودھ یادو اور دیگر سینئر افسران موجود تھے۔

اس کے بعد وفد نے راجستھان کے نیمرانا کا دورہ کیا، جہاں صنعتی نمائندوں کے ساتھ اجلاس منعقد ہوا اور قومی صنعتی راہداری ترقیاتی کارپوریشن کے نیمرانا شمسی توانائی منصوبے کا بھی معائنہ کیا گیا۔ ہند۔جاپان اشتراک سے تیار کیا جانے والا  یہ منصوبہ صنعتی استعمال کے لیے شمسی توانائی کو جدید برقی نظام کے ساتھ جوڑنے کی عمدہ مثال ہے۔ اس میں چھ میگاواٹ شمسی توانائی تنصیب شامل ہے، جس میں شمسی فوٹو وولٹائک بجلی کی پیداوار بھی شامل ہے، اور یہ صنعتی علاقوں کے لیے صاف توانائی کے ایک اہم پائلٹ منصوبے کے طور پر کام کر رہا ہے۔صنعت و داخلی تجارت کے فروغ کے محکمہ کے سکریٹری نے قومی صنعتی راہداری ترقیاتی کارپوریشن نیمرانا شمسی توانائی منصوبے کے پانچ میگاواٹ پلانٹ میں نگرانی و کنٹرول نظام کا افتتاح بھی کیا۔

جناب سریش کمار اولا، آئی اے ایس، منیجنگ ڈائریکٹر ریکو نے ریکو کے سینئر افسران کے ہمراہ جودھپور۔پالی۔مارواڑ صنعتی علاقے کے جائزے اور متعلقہ تبادلۂ خیال کے اجلاس میں شرکت کی۔

نیمرانا میں سکریٹری نے راجستھان میں قومی صنعتی راہداری پروگرام کے تحت تیار کیے جانے والے  جودھپور۔پالی۔مارواڑ صنعتی علاقے کی پیش رفت کا بھی جائزہ لیا۔ یہ مرکز تقریباً 1,578  ایکڑ پر محیط ہے اور جودھپور و پالی کے درمیان نہایت اہم مقام پر واقع ہے، جو دونوں شہروں سے تقریباً تیس کلومیٹر کے فاصلے پر ہے۔اس علاقے کو قومی شاہراہ  62  اور ریاستی شاہراہ 64  کے ذریعے مضبوط علاقائی رابطہ حاصل ہے، جبکہ قومی شاہراہ 25  اور ریاستی شاہراہ 68  تک بھی اضافی رسائی موجود ہے۔ یہ منصوبہ مغربی راجستھان کے اہم صنعتی اور لاجسٹک بازاروں کی ضروریات پوری کرنے کے لیے موزوں مقام رکھتا ہے۔

جودھپور۔پالی۔مارواڑ صنعتی علاقہ راجستھان صنعتی راہداری ترقیاتی کارپوریشن کے ذریعے نافذ کیا جا رہا ہے، جو ایک خصوصی مقصد کا  ادارہ ہے، جس میں ریکو اور قومی صنعتی راہداری ترقیاتی کارپوریشن کی شراکت داری ہے۔اس منصوبے سے تقریباً سات ہزار پانچ سو کروڑ روپے کی سرمایہ کاری متوقع ہے اور لگ بھگ چالیس ہزار روزگار کے مواقع پیدا ہوں گے۔منصوبے کے ہدف کے شعبوں میں ٹیکسٹائل و ملبوسات، زراعتی و غذائی پروسیسنگ، انجینئرنگ مصنوعات، گاڑیاں، دستکاری اور تعمیراتی سامان شامل ہیں۔سکریٹری نے بنیادی ڈھانچے کے مرکزی کاموں، منصوبہ جاتی انتظامات اور نفاذ کے اوقات کار کا جائزہ لیا اور بروقت تکمیل اور سرمایہ کاروں کی سہولت کے لیے مربوط اقدامات پر زور دیا۔

وفد نے بعد ازاں ہریانہ میں آئی ایم ٹی باول اور آئی ایم ٹی سوہنا کا دورہ کیا، جس میں ٹی ڈی کے بیٹری مینوفیکچرنگ پلانٹ بھی شامل تھا، اس کے بعد صنعتی نمائندوں کے ساتھ مزید تبادلۂ خیال کیا گیا۔

متعلقہ فریقوں سے مشاورتی اجلاسوں سے حکومت اور صنعت کے درمیان مثبت مکالمے کے لیے مؤثر پلیٹ فارم فراہم ہوا۔ صنعتی نمائندوں نے عملی اور بنیادی ڈھانچے سے متعلق مسائل کے حل میں مسلسل تعاون، کاروبار میں آسانی بہتر بنانے اور صنعتی مسابقت کو مضبوط کرنے کی ضرورت پر زور دیا۔بات چیت کے دوران صنعتی مراکز میں اختراع، تحقیق و ترقی اور ٹیکنالوجی کے تجارتی استعمال کو فروغ دینے کی اہمیت بھی اجاگر ہوئی۔

دورے کی مناسبت سے گفتگو کرتے ہوئے جناب امردیپ سنگھ بھاٹیہ نے کہا کہ صنعت و داخلی تجارت کے فروغ کا محکمہ، قومی صنعتی راہداری ترقیاتی کارپوریشن اور ریاستی حکومتیں باہمی تال میل کے ساتھ کام کر رہی ہیں تاکہ صنعتی راہداری منصوبے صنعت کی ضروریات اور نفاذ کے چیلنجوں کو نمٹایا جاسکے۔

انہوں نے کہا کہ باقاعدہ زمینی سطح کے دورے اور متعلقہ فریقوں سے مشاورت رکاوٹوں کی نشاندہی، مسائل کے فوری حل اور سرمایہ کاروں کے اعتماد کو مضبوط بنانے کے لیے نہایت ضروری ہیں۔جناب رجت کمار سینی نے اس عزم کا اعادہ کیا کہ قومی صنعتی راہداری ترقیاتی کارپوریشن عالمی معیار کا صنعتی بنیادی ڈھانچہ تیار کرنے، سرمایہ کاری میں سہولت فراہم کرنے اور پائیدار صنعتی شہر بسانے کے لیے پابند عہد ہے، جن سے اقتصادی ترقی، روزگار کے مواقع اور ہندوستانی مینوفیکچرنگ کی مسابقت میں اضافہ ہو گا۔

******

(ش ح۔ م ش ع ۔ م ا)

Urdu No-6560

 

(ریلیز آئی ڈی: 2257401) وزیٹر کاؤنٹر : 11