بھارت-مصر مشترکہ دفاعی کمیٹی (جے ڈی سی) کا 11واں اجلاس 20 سے 22 اپریل 2026 تک قاہرہ میں منعقد ہوا، جس میں دوطرفہ دفاعی تعاون کو فروغ دینے کے حوالے سے نتیجہ خیز تبادلۂ خیال کیا گیا۔ بھارتی وفد کی قیادت جوائنٹ سکریٹری (بین الاقوامی تعاون) جناب امیتابھ پرساد نے کی، جس میں وزارتِ دفاع اور مسلح افواج کے سینئر نمائندے شامل تھے۔ مصری وفد کی سربراہی دفاعی افواج اور وزارتِ دفاع کے اعلیٰ حکام نے کی۔

دونوں فریقوں نے گزشتہ جے ڈی سی اجلاس کے بعد ہونے والی پیش رفت کا جامع جائزہ لیا اور دفاعی روابط کے لیے ایک مستقبل پر مبنی لائحہ عمل تیار کیا۔ انہوں نے 27-2026 کے لیے دوطرفہ دفاعی تعاون کے منصوبے پر اتفاق کیا، جس میں منظم عسکری روابط کے طریقہ کار کو وسعت دینا، مشترکہ تربیتی تبادلوں کو مضبوط بنانا، بحری سلامتی میں تعاون کو بڑھانا، فوجی مشقوں کے دائرہ کار اورسخت ترین مشقوں میں اضافہ کرنا، اور دفاعی پیداوار و ٹیکنالوجی میں اشتراک کو فروغ دینا شامل ہے۔

بھارتی وفد نے بھارتی دفاعی صنعت کی تیزی سے بڑھتی ہوئی مینوفیکچرنگ صلاحیتوں پر ایک پریزنٹیشن دی، جس میں اس بات کو اجاگر کیا گیا کہ اس کی پیداوار 20 ارب امریکی ڈالر سے تجاوز کر چکی ہے اور بھارت 100 سے زائد ممالک کو تقریباً 4 ارب امریکی ڈالر مالیت کی برآمدات کر رہا ہے۔ دونوں فریقوں نے دفاعی صنعت میں تعاون کے ایک منصوبے کو تیار کرنے کے لیے مل کر کام کرنے پر اتفاق کیا۔ دفاعی صنعت میں اشتراک اب بھارت-مصر دفاعی تعلقات کا ایک اہم ستون بن کر ابھر رہا ہے، جہاں دونوں ممالک دفاعی مینوفیکچرنگ کے شعبے میں مشترکہ ترقی  اور مشترکہ پیداوار کے مواقع تلاش کر رہے ہیں۔اجلاس کے موقع پر پہلی بار بحریہ سے بحریہ اسٹاف مذاکرات بھی منعقد ہوئے۔ بحرِ ہند کے خطے میں نیویگیشن کی آزادی کو فروغ دینے میں بھارتی بحریہ کے نمایاں کردار کو پیش کیا گیا، اور سمندری سلامتی کو بہتر بنانے میں بھارت کے انفارمیشن فیوژن سینٹر کے اہم کردار کو بھی اجاگر کیا گیا۔

بھارتی وفد نے مصری فضائیہ کے کمانڈر لیفٹیننٹ جنرل عمر عبد الرحمان سقر سے بھی ملاقات کی۔ وفد نے دونوں ممالک کی فضائی افواج کے درمیان قریبی تعاون پر مصری فضائیہ کے کمانڈر کا شکریہ ادا کیا۔

بھارتی وفد نے ہیلیو پولس وار میموریل پر بھی پھول چڑھائے اور ان بھارتی بہادروں کو خراجِ عقیدت پیش کیا جنہوں نے پہلی اور دوسری عالمی جنگ کے دوران اپنی جانوں کا نذرانہ پیش کیا۔

بھارت اور مصر کے دفاعی شراکت داری میں ایک اہم سنگِ میل ستمبر 2022 میں دفاعی تعاون کے شعبے میں مفاہمت کی یادداشت (ایم او یو) پر دستخط تھے، جو وزیرِ دفاع کے مصر کے دورے کے دوران طے پائے۔ 2023 میں دونوں ممالک کے تعلقات کو اسٹریٹجک شراکت داری تک  وسعت دی گئی۔ 11ویں اجلاس نے دونوں ممالک کے درمیان قریبی تعلقات کی دوبارہ توثیق کی اور علاقائی سلامتی اور استحکام کے لیے ان کے باہمی عزم کو مزیدمستحکم کیا۔

**********

ش ح۔ ع و۔ ج ا

 (U: 6207)