ہندوستان کا شعبہ ماہی گیری  سال2047 تک ترقی یافتہ ہندوستان بنانے کے وزیر اعظم کے وژن کو آگے بڑھانے میں بدستور  اہم کردار ادا  کر رہا ہے۔ روزی روٹی کے تحفظ اور قومی ترقی میں اس شعبے کے کردار پر زور دیتے ہوئے وزیر اعظم نے کہا کہ "حکومت مچھلی کے کسانوں کا معیار زندگی بہتر بنانے پر زور دے کر ماہی گیری کے متحرک شعبے کی سمت میں کام جاری رکھے گی۔" اس وژن کے تحت، حکومت ہند کی طرف سے  ماہی گیری اور آبی زراعت کے شعبوں کو مضبوط بنانے، ویلیو چین کو جدید بنانے اور سمندری خوراک کی برآمدات کو بڑھانے کے مقصد سے متعدد اقدامات شروع کیے گئے ہیں۔

ماہی پروری، حیوانات اور دودھ کی پیداوار (ایم او ایف اے ایچ اینڈ ڈی) اور پنچایتی راج کی وزارت (ایم او پی آر)  کے مرکزی وزیر جناب راجیو رنجن سنگھ کی قیادت میں،محکمہ ماہی پروری نے ماہی پروری کے شعبے کو مضبوط کرنے اور سمندری خوراک کی برآمدات کو فروغ دینے کے لیے متعدد اہم  اقدامات کیے ہیں۔

ان اقدامات میں 39 ممالک کے سفارت کاروں اور اے ڈی بی، اے ایف ڈی، ایف اے او، جے آئی سی اے اور بی او بی پی-آئی جی او سمیت سرکردہ بین الاقوامی تنظیموں کی شرکت سے سمندری خوراک کی برآمدات پر گول میز کا اہتمام کرنا شامل ہے۔ گول میز کانفرنس کے ذریعہ سمندری خوراک کی برآمدات، ویلیو ایڈیشن، پائیداری، ٹیکنالوجی کی منتقلی، اور ابھرتے ہوئے شعبوں جیسے آرائشی ماہی پروری اور سمندری ادوات  پر توجہ مرکوز کی گئی۔ انڈمان اور نکوبار جزائر اور لکشدیپ میں ماہی گیری اور اس سے منسلکہ سرگرمیوں میں نجی شعبے کی دلچسپی کو فروغ دینے کے لیے سرمایہ کاروں کی  کانفرنس کا انعقاد کیا گیا۔ مزید برآں، نئی دہلی میں منعقدہ سی فوڈ ایکسپورٹرز سمٹ 2026 میں، سمندری برآمداتی ماحولیاتی نظام کو مضبوط بنانے، ویلیو ایڈیشن، اور عالمی منڈیوں تک رسائی میں اضافہ کرنے  پر توجہ مرکوز کی گئی ہے۔

مزید برآں، برآمداتی رجحانات اور منڈیوں کے حالات کی مسلسل نگرانی، اور برآمد کنندگان، ریاستی حکومتوں اور دیگر متعلقہ فریقوں کے ساتھ تال میل کے ذریعے مارکیٹ کے تنوع اور برآمداتی توسیع کی حمایت کے لیے مربوط اقدامات کیے گئے ہیں۔ یورپی یونین، برطانیہ، چین، روس اور برازیل سمیت اہم عالمی منڈیوں میں 211 نئے برآمداتی اداروں کی منظوری کے ساتھ مارکیٹ تک رسائی کو بہتر کیا  گیا ہے۔ سفارتی اور تجارتی رابطوں سے متبادل منڈیوں میں داخلے کو فروغ ملا ہے۔ متوازی طور پر، پائیدار اور برآمد پر مبنی ماہی گیری کی حمایت کے واسطے، انضباطی اور تعمیلی فریم ورک کو امریکہ سے میرین میمل پروٹیکشن ایکٹ (ایم ایم پی اے) کی سطح پر منظوری، جھینگوں کے ٹرول نیٹ میں ٹرٹل ڈیٹرنٹ ڈیوائسز (ٹی ای ڈی) کا لازمی استعمال، اینٹی بائیوٹکس اور باقیات کا بہتر کنٹرول، فریم2 کے اجراء اور نیشنل ٹریس 2 کے اجراء ، ایس ای زیڈ رولز، 2025 کے ذریعے مضبوط کیا گیا ہے۔

ایم پی ای ڈی اے کے جاری کردہ عارضی اعداد و شمار کے مطابق، ان کوششوں کے نتیجے میں، مالی سال 2025-26 میں ہندوستان کی سمندری خوراک کی برآمدات ریکارڈ 72,325.82 کروڑ روپے (8.28 ارب  امریکی ڈالر) تک پہنچ گئی،ں جس کا حجم 19.32 لاکھ میٹرک ٹن تک پہنچ گیا۔

منجمد جھینگا اس ترقی کا کلیدی محرک رہا ہے، جس کا حصہ 47,973.13 کروڑ روپے (5.51  ارب امریکی ڈالر) کا ہے، جو کل برآمداتی آمدنی کا دو تہائی سے زیادہ ہے۔ جھینگے کی برآمدات میں حجم کے لحاظ سے 4.6 فیصد اور  مالیت کے لحاظ سے 6.35 فیصد اضافہ ہوا، جس سے ہندوستان کی سمندری مصنوعات کی برآمدات میں اس کا دبدبہ  مضبوط ہوا۔

اس سلسلے میں امریکہ نے 2.32 ارب  امریکی ڈالر کی کل درآمدات کے ساتھ سب سے بڑے برآمداتی مقام کے طور پر اپنی پوزیشن برقرار رکھی۔ تاہم، امریکہ کو سپلائی میں حجم  کے لحاظ سے 19.8 فیصد اور مالیت کے لحاظ سے 14.5 فیصد کی کمی واقع ہوئی، جس سے بنیادی طور پر باہمی محصولات کے اثرات کی عکاسی ہوتی ہے۔

اس کمی  کی تلافی چین، یورپی یونین اور جنوب مشرقی ایشیائی ممالک جیسی متبادل منڈیوں میں مضبوط نمو سے ہوئی ہے۔ دوسری سب سے بڑی برآمداتی ملک  چین کو  ملنے والی برآمدات میں قدر کے لحاظ سے 22.7 فیصد اور حجم  کے لحاظ سے 20.1 فیصد اضافہ ہوا۔ یورپی یونین نے بھی مضبوط نمو درج کی، برآمدات میں قیمت کے لحاظ سے 37.9 فیصد اور حجم  کے لحاظ سے 35.2 فیصد اضافہ ہوا۔ جنوب مشرقی ایشیا میں بھی نمایاں توسیع دیکھی گئی، جس کی  برآمدات میں قیمت اور حجم  کے لحاظ سے بالترتیب 36.1 فیصد اور 28.2 فیصد سے زیادہ اضافہ ہوا۔ مالی سال کے اختتام پر خطے میں بدامنی کی وجہ سے جاپان کو  کی جانے والی برآمدات میں قیمت کے لحاظ سے 6.55 فیصد اضافہ ہوا، جبکہ مغربی ایشیا کو ہونے والی  برآمدات میں 0.55 فیصد کی معمولی کمی واقع ہوئی۔

مختلف منڈیوں میں مضبوط دوہرے ہندسے کی نمو درج کی گئی، جو روایتی منڈیوں میں درپیش تجارتی چیلنجوں کے درمیان تنوع کی طرف واضح تبدیلی کی عکاسی کرتی ہے۔

مصنوعات کے لحاظ سے، منجمد مچھلی، اسکویڈ، کٹل فش، خشک مصنوعات اور زندہ مچھلیوں کی برآمدات میں مثبت اضافہ دیکھا گیا، جبکہ  منجمد مصنوعات کی برآمدات میں کمی ہوئی۔ سورمی، مچھلی کی خوراک اور مچھلی کے تیل کی برآمدات میں اضافہ ہوا ہے۔

 

لاجسٹکس کے لحاظ سے، سرفہرست پانچ بندرگاہوں - وشاکھاپٹنم، جے این پی ٹی، کوچی، کولکاتہ، اور چنئی - میں کل برآمداتی قیمت کا تقریباً 64 فیصد ریکارڈ کیا گیا، جو ہندوستان کی سمندری خوراک کی برآمداتی سپلائی چین میں ان کی مسلسل اہمیت کو اجاگر کرتی ہے۔

 

 

*****

 (ش ح ۔  م ش ع۔ت ا)

U. No. 6151

(ریلیز آئی ڈی: 2254384) وزیٹر کاؤنٹر : 5