ہند –آسٹریا بزنس فورم نئی دہلی کے وانجیہ بھون میں آسٹریا کے وفاقی چانسلر عزت مآب ڈاکٹر کرسچن اسٹاکر کے دورۂ ہند کے موقع پر منعقد ہوا۔ آسٹریا کے وفاقی وزیر برائے معیشت، توانائی اور سیاحت عزت مآب وولف گانگ ہاٹمینز ڈورفر نے بھی فورم میں شرکت کی۔ بھارتی وفد کی قیادت مرکزی وزیر برائے تجارت و صنعت جناب پیوش گوئل نے کی۔ اس فورم میں اعلیٰ سرکاری نمائندوں، پالیسی سازوں اور صنعت کے قائدین نے شرکت کی، جہاں تجارت، سرمایہ کاری اور اسٹریٹجک تعاون کو فروغ دینے کے امکانات کا جائزہ لیا گیا۔

فورم کے دوران ایک دو طرفہ فاسٹ ٹریک میکانزم (ایف ٹی ایم) پر دستخط کیے گئے اور اسے فعال کیا گیا۔  ایف ٹی ایم آسٹریا کی کمپنیوں اور ہندوستان میں سرمایہ کاروں کے ساتھ ساتھ آسٹریا میں ہندوستانی کمپنیوں اور سرمایہ کاروں کو سرمایہ کاری کی سہولت ، مسائل کو حل کرنے اور ان کے بروقت حل کو یقینی بنانے کے لیے ایک وقف پلیٹ فارم فراہم کرتا ہے۔  یہ دونوں ممالک میں کاروبار کرنے میں آسانی کو مزید بہتر بنانے کے لیے تجاویز کے اشتراک کے لیے ایک فورم کے طور پر بھی کام کرے گا ، جو سرمایہ کاروں کے اعتماد کو مستحکم کرنے کے لیے مشترکہ عزم کی عکاسی کرتا ہے۔

بزنس فورم نے ہندوستان اور آسٹریا کے درمیان دو طرفہ اقتصادی تعلقات کو مستحکم کرنے کی سمت میں ایک اہم قدم اٹھایا ۔  یہ دورہ چار دہائیوں میں کسی آسٹریا کے چانسلر کا ہندوستان کا پہلا سرکاری دورہ ہے، جو وسیع تر ہندوستان-یورپی یونین کے اقتصادی فریم ورک کے اندر ہندوستان-آسٹریا کے تعلقات کی بڑھتی ہوئی اہمیت کو واضح کرتا ہے۔  دونوں فریقوں نے دو طرفہ تجارت کو موجودہ سطح سے آگے بڑھانے اور صنعتی صلاحیتوں، ٹیکنالوجی اور اختراعی ماحولیاتی نظام میں تکمیل کا فائدہ اٹھانے کے ارادے کا اظہار کیا۔

فورم میں ہونے والی بات چیت میں تجارت کو بڑھانے ، رکاوٹوں کو کم کرنے اور سرمایہ کاری کی آمد کو آسان بنانے کے لیے ایک کلیدی معاون کے طور پر مجوزہ ہند -یوروپی یونین آزاد تجارتی معاہدے (ایف ٹی اے) کی اہمیت پر روشنی ڈالی گئی۔  فورم نے مستقبل کے تعاون کے لیے ترجیحی شعبوں کے طور پر پائیدار ترقی، جدید مینوفیکچرنگ اور گرین ٹیکنالوجیز کی بھی نشان دہی کی۔  توقع ہے کہ ایف ٹی اے مارکیٹ تک بہتر رسائی اور بہتر ریگولیٹری فریم ورک کے ذریعے محنت کش شعبوں اور ایم ایس ایم ایز کے لیے مواقع پیدا کرے گا۔

حکومت اور صنعت کے متعلقین دونوں نے مجوزہ معاہدے کے فوائد کو مکمل طور پر سمجھنے کے لیے کاروباری اداروں کے ذریعے فعال مشغولیت کی اہمیت پر زور دیا۔  صنعت کے نمائندوں کی حوصلہ افزائی کی گئی کہ وہ ایم ایس ایم ای اور اختراع پر مبنی کاروباری اداروں سمیت وسیع تر شرکت کو یقینی بنانے کے لیے اس کے نفاذ کی تیاری کریں۔

تجارت اور صنعت کے مرکزی وزیر جناب پیوش گوئل نے ہندوستانی معیشت کے مضبوط میکرو اکنامک بنیادی اصولوں اور عالمی چیلنجوں کے درمیان اس کی مضبوطی پر روشنی ڈالی۔  انہوں نے ترقی کے کلیدی محرکات کے طور پر اصلاحات کے کردار پر زور دیا ، جس میں دوبارہ صنعت کاری اور جدید مینوفیکچرنگ اور اسمارٹ ٹیکنالوجیز کو فروغ دینا شامل ہے۔  انہوں نے دو طرفہ تجارت کو بڑھانے، محنت کش شعبوں میں مواقع تلاش کرنے اور پائیدار مشغولیت کے لیے بزنس فورم کو ادارہ جاتی بنانے کی ضرورت پر بھی زور دیا۔

آسٹریا کے وفاقی چانسلر  عالی جناب ڈاکٹر کرسچن اسٹاکر نے اس دورے کو دو طرفہ تعلقات میں ایک سنگ میل قرار دیا اور دونوں ممالک کے درمیان اقتصادی روابط میں مستحکم ترقی پر روشنی ڈالی۔  انہوں نے کہا کہ تجارت تقریبا 3 ارب یورو تک پہنچ گئی ہے اور آسٹریا کی تقریبا 160 کمپنیاں ہندوستان میں کام کر رہی ہیں۔  انہوں نے ہندوستان کی ترقی کی رفتار اور اسٹریٹجک پارٹنر کے طور پر اس کی اہمیت پر بھی زور دیا۔  انہوں نے اہم شعبوں میں برآمدات کو نمایاں طور پر بڑھانے کے لیے ہند - یورپی یونین ایف ٹی اے کی صلاحیت پر روشنی ڈالی۔

ہند -آسٹریا بزنس فورم نے دو طرفہ تعلقات کی مضبوط بنیاد اور مستقبل کی صلاحیت کا اعادہ کیا۔  مربوط ترجیحات، تکمیلی طاقتوں اور پائیدار ترقی کے لیے مشترکہ عزم کے ساتھ، دونوں ممالک اپنی اقتصادی شراکت داری کو مزید گہرا کرنے کے لیے اچھی پوزیشن میں ہیں۔

 

******

ش ح۔ م م۔ م ر

U-NO. 5991

(ریلیز آئی ڈی: 2253158) وزیٹر کاؤنٹر : 8