ایک تاریخی پہل میں، ڈیولپمنٹ کمشنر کے دفتر(ہینڈلوم)، وزارتِ ٹیکسٹائل، حکومتِ ہند نے پہلی بار فیمینا مس انڈیا پلیٹ فارم کے ساتھ تعاون کیا ہے تاکہ عالمی سطح پر ہندوستانی ہینڈلوم کی دولت اور تنوع کو اجاگر کیا جا سکے۔

موضوعاتی پہل "وشو سوترا—ویوز آف انڈیا فار دی ورلڈ" کے تحت فیمینا مس انڈیا کے گرینڈ فائنل کے دوران ایک خصوصی ہینڈلوم کلیکشن کی نقاب کشائی کی جائے گی۔ یہ مجموعہ ہندوستانی بنکروں کی فن کاری کا جشن مناتا ہے اور ہینڈلوم سیکٹر کی پائیداری اور ثقافتی گہرائی کو نمایاں کرتا ہے۔

اس پہل کی ایک منفرد خصوصیت ریاستوں اور مرکز کے زیرِ انتظام علاقوں کے فاتحین کی شرکت ہے، جن میں سے ہر ایک اپنے خطے کی بنائی کی روایت سے متاثر ہینڈلوم کے ملبوسات کی نمائش کرتا ہے اور کسی منتخب ملک کی ثقافتی خوبصورتی کی عکاسی کے لیے تخلیقی انداز میں اس کی تشریح کرتا ہے۔ یہ نقطۂ نظر علامتی طور پر ہندوستان کے ٹیکسٹائل ورثے کو عالمی فیشن بیانیے سے جوڑتا ہے۔

یہ ملبوسات وارانسی بروکیڈ، لیپچا، کانچی پورم، کوٹا ڈوریا، مہیشوری، پٹولا، اکت، کاساو، پیٹھانی، پھولکاری، جامدانی، کلو شال، اپادا، کھن، پشمینہ، موگا ریشم، الکل اور دیگر ممتاز علاقائی روایات سمیت ہندوستان کی معروف بنائی سے متاثر ہیں۔

ڈویلپمنٹ کمشنر (ہینڈلومز) ڈاکٹر ایم بینا نے کہا کہ اس تعاون کا مقصد نوجوان سامعین، فیشن کے اسٹیک ہولڈرز اور بین الاقوامی صارفین کے درمیان ہندوستانی ہینڈلوم کی مرئیت کو بڑھانا ہے۔ یہ "ہینڈلوم بطور ورثہ، ہینڈلوم بطور مستقبل" کے بیانیے کو تقویت دیتا ہے اور اورنج اکانومی، ثقافتی ورثے اور تخلیقی صنعت کاری کو فروغ دینے کے حکومت کے وژن سے ہم آہنگ ہے۔

ہندوستان دنیا کی امیر ترین ہینڈلوم روایات کا حامل ہے، جو زراعت کے بعد 35 لاکھ سے زائد بنکروں اور متعلقہ کارکنوں کو پائیدار روزگار فراہم کرتی ہیں۔ ماحول دوست مصنوعات کی بڑھتی ہوئی مانگ نے ملکی اور بین الاقوامی منڈیوں میں ہینڈلوم ٹیکسٹائل کے لیے نئی دلچسپی پیدا کی ہے۔

یہ پہل "ووکل فار لوکل ٹو گلوبل" اور وزیرِ اعظم کے 5 ایف فریم ورک—فارم ٹو فائبر ٹو فیکٹری ٹو فیشن ٹو فارن—کے وژن کے تحت روایتی صنعتوں کو عالمی سطح پر مسابقتی شعبوں میں تبدیل کرنے کے حکومتِ ہند کے عزم کی عکاسی کرتی ہے۔ یہ ثقافتی صنعتوں کو مضبوط بنانے، پائیدار روزگار پیدا کرنے اور عالمی ٹیکسٹائل و فیشن مارکیٹوں میں ہندوستان کی موجودگی کو بڑھانے میں ہینڈلوم کے اسٹریٹجک کردار کو نمایاں کرتی ہے۔

"وشو سوترا: ہندوستان کی ہینڈلوم میراث کو مقامی لومز سے عالمی رن وے تک لے جانا"۔

***

(ش ح۔اس ک  )

UR-5931

(ریلیز آئی ڈی: 2252749) وزیٹر کاؤنٹر : 12