دو روزہ قومی سیمینار "رن سمواد"، جس کا موضوع "ملٹی ڈومین آپریشنز (ایم ڈی او): روایتی اور بے قاعدہ خطرات سے نمٹنے کے لیے ایک ناگزیر تقاضا" تھا، 10 اپریل 2026 کو ایئر فورس ٹریننگ کمانڈ، بنگلورو میں اختتام پذیر ہوا۔ چیف آف ڈیفنس اسٹاف (سی ڈی ایس) جنرل انیل چوہان نے اختتامی خطاب میں اس بات پر زور دیا کہ ملٹی ڈومین آپریشنز کے لیے جسمانی، مصنوعی اور ادراکی میدانوں میں ہم آہنگی ناگزیر ہے۔

اپنے خطاب میں سی ڈی ایس نے مصنوعی ذہانت (اے آئی) سے چلنے والے میدانِ جنگ میں تیز اور مؤثر فیصلہ سازی کی فوری ضرورت پر روشنی ڈالی۔ انہوں نے کہا کہ موجودہ دور میں جنگ وقت، سائبر اسپیس، الیکٹرو میگنیٹک (ای ایم) اسپیکٹرم اور ادراک سمیت متعدد جہتوں میں پھیل چکی ہے، جو سہ فریقی انضمام اور اختراعی سوچ کا تقاضا کرتی ہے۔ انہوں نے مزید کہا کہ اب توجہ محض ہم آہنگی سے آگے بڑھ کر ہندوستانی دفاعی افواج کے حقیقی انضمام کی طرف منتقل ہو چکی ہے۔

جنرل چوہان نے اعلان کیا کہ رن سمواد 2027 کا موضوع ہوگا:"ایک شفاف اور توسیع شدہ میدانِ جنگ میں اعلیٰ شدت کی کارروائیاں: قوت کے استعمال اور تحفظ کے چیلنجز"۔اپنے خطاب کے بعد انہوں نے میڈیا نمائندگان سے ملاقات کی اور قوم کی تعمیر اور اسٹریٹجک ثقافت کے فروغ میں ان کے کردار کو سراہا۔

رن سمواد کے دوسرے دن تینوں افواج کے سینئر افسران نے مختلف موضوعات پر تفصیلی تبادلۂ خیال کیا، جن میں ملٹی ڈومین آپریشنز کے لیے نظریاتی ہم آہنگی، تربیت اور آپریشنل حکمتِ عملی کی نئی تشکیل، آئی ایس آر (انٹیلی جنس، نگرانی اور جاسوسی) کے انضمام کے ذریعے معلوماتی برتری کا حصول، اور مشترکہ منصوبہ بندی شامل تھے۔

سیمینار روایتی اور بے قاعدہ دونوں طرح کے خطرات سے نمٹنے کے چیلنجز کی مشترکہ تفہیم کو فروغ دینے میں کامیاب رہا۔ اس دوران باہمی تعاون پر مبنی روڈ میپ تیار کیا گیا اور جنگ و جدل کی پیچیدگیوں پر بامعنی گفتگو ہوئی۔ دو روزہ اجلاس کے دوران نمایاں ہونے والا اشتراکی جذبہ اس بات کی عکاسی کرتا ہے کہ ہندوستانی دفاعی افواج کثیر جہتی میدانِ جنگ میں فیصلہ سازی کی برتری اور آپریشنل مہارت کے حصول کے لیے پُرعزم ہیں۔

 

***

UR-5714

(ش ح۔اس ک  )

(ریلیز آئی ڈی: 2251028) وزیٹر کاؤنٹر : 16