کامرس و صنعت کی وزارت کے تحت ڈائریکٹوریٹ جنرل آف فارن ٹریڈ (ڈی جی ایف ٹی) نے ایڈوانس اتھورائزیشن (اے اے) اور ایکسپورٹ پروموشن کیپیٹل گڈز (ای پی سی جی) اسکیموں کے تحت ایکسپورٹ اوبلیگیشن ڈسچارج سرٹیفکیٹس (ای او ڈی سی) کے تیز رفتار اجرا کے لیے مقررہ مدت پر مشتمل ایک خصوصی مہم کامیابی کے ساتھ مکمل کر لی ہے۔ یہ مہم یکم مارچ 2026 سے 31 مارچ 2026 تک جاری رہی، جس کی نگرانی ڈی جی ایف ٹی کے سینئر عہدیداران کی صدارت میں منعقد ہونے والی روزانہ جائزہ میٹنگوں کے ذریعے کی گئی۔

ای او ڈی سی برآمدی ذمہ داریوں کے باضابطہ اختتام کے لیے نہایت اہم دستاویزات ہیں۔ یہ بینک گارنٹیوں اور بانڈز کے اجراء میں سہولت فراہم کرتے ہیں، برآمد کنندگان پر شکایات کے بوجھ کو کم کرتے ہیں اور ہندوستان کے تجارتی سہولت کے فریم ورک کے تحت تعمیل کی مؤثر نگرانی کو یقینی بناتے ہیں۔ اس مہم کے نتیجے میں نپٹارے کے عمل میں نمایاں تیزی آئی ہے، جس سے ملک بھر کے برآمد کنندگان کو فائدہ پہنچے گا۔

مارچ 2026 کے دوران ای او ڈی سی منظوریوں میں فروری 2026 کے مقابلے میں نمایاں اضافہ ریکارڈ کیا گیا۔ ایڈوانس اتھورائزیشن اسکیم کے تحت 242 فیصد اور ای پی سی جی اسکیم کے تحت 234 فیصد اضافہ ہوا۔ فروری میں 3,747 منظوریوں کے مقابلے میں مارچ میں مجموعی طور پر 12,690 ای او ڈی سی جاری کیے گئے، جو تقریباً 3.39 گنا اضافے کی عکاسی کرتا ہے۔ یہ پیش رفت ڈی جی ایف ٹی کے علاقائی دفاتر کی مربوط اور مؤثر کاوشوں کا مظہر ہے۔

اس مہم کے دوران مارچ 2026 میں اے اے اسکیم کے تحت زیرِ التواء معاملات کے 59 فیصد اور ای پی سی جی اسکیم کے تحت 54 فیصد معاملات کو نمٹایا گیا، جس سے بیک لاگ میں خاطر خواہ کمی واقع ہوئی۔

مزید برآں، اپریل 2025 سے فروری 2026 تک کے گیارہ مہینوں میں مجموعی طور پر 44,018 منظوریوں کے مقابلے میں صرف ایک ماہ (مارچ 2026) کے دوران 12,690 ای او ڈی سیز کا اجرا اس امر کی واضح نشاندہی کرتا ہے کہ مرکوز انتظامی اقدامات تجارتی سہولت کو فروغ دینے میں کس قدر مؤثر ثابت ہو سکتے ہیں۔

مارچ 2026 کے دوران 13,627 دستیاب اے اے ای او ڈی سی معاملات میں سے 13,238 کو نمٹایا گیا، جس سے 97 فیصد کی پروسیسنگ شرح حاصل ہوئی۔ اسی طرح ای پی سی جی اسکیم کے تحت 8,473 دستیاب معاملات میں سے 8,281 کو نمٹایا گیا، جو 98 فیصد کی شاندار پروسیسنگ شرح کی عکاسی کرتا ہے۔

خصوصی مہم کے براہِ راست نتیجے کے طور پر یکم مارچ 2026 کو زیرِ التواء معاملات کی تعداد 15,360 سے کم ہو کر یکم اپریل 2026 کو 3,966 رہ گئی۔ یہ نمایاں کمی مارچ 2026 کے دوران 6,740 نئے ای او ڈی سی معاملات کے اضافے کے باوجود حاصل کی گئی۔ مجموعی طور پر 74 فیصد کمی اس بات کا ثبوت ہے کہ مہم نے بیک لاگ کے خاتمے اور کیسوں کے فوری تصفیے میں غیر معمولی کامیابی حاصل کی۔

مہم کی کامیابی کے پیشِ نظر ای او ڈی سیز کے تیز رفتار اجرا کے لیے اس خصوصی مہم کو یکم اپریل 2026 سے 31 مئی 2026 تک مزید دو ماہ کے لیے توسیع دے دی گئی ہے۔ اس توسیع سے متعلق تفصیلی رہنما اصول 30 مارچ 2026 کو جاری کیے جا چکے ہیں۔

برآمدی ذمہ داریوں کے بروقت اختتام، منجمد بینک گارنٹیوں کے اجراء میں سہولت اور برآمد کنندگان پر شکایات کے بوجھ میں کمی کے ذریعے یہ اقدام حکومت کے اس عزم کا مظہر ہے کہ ایک برآمد کنندگان دوست ماحول کو فروغ دیا جائے اور کاروبار کرنے میں آسانی کو مزید بہتر بنایا جائے۔

***

(ش ح۔اس ک  )

UR-5258

(ریلیز آئی ڈی: 2248044) وزیٹر کاؤنٹر : 12