بایوٹیکنالوجی ریسرچ اینڈ انوویشن کونسل (بی آر آئی سی) ایک خود مختار ادارہ ہے جو ایک رجسٹرڈ سوسائٹی کے طور پر قائم کیا گیا ہے، اور محکمہ بایوٹیکنالوجیکے 14 خود مختار اداروں کو ضم کر کے تشکیل دیا گیا ہے۔ بی آر آئی سی کی تحقیقی سرگرمیوں کی مؤثر نگرانی کے لیے ایک ریسرچ ایڈوائزری بورڈ تشکیل دیا گیا ہے، جس کی سربراہی پروفیسر کے وجے راگھون کر رہے ہیں، جو ڈی اے ای ہومی بھابھا پروفیسر، حکومت ہند کے سابق پرنسپل سائنٹفک ایڈوائزر اور سابق سیکریٹری، ڈی بی ٹی رہ چکے ہیں۔ بی آر آئی سی -آر اے بی، برک کے اداروں میں ہونے والی تحقیقی سرگرمیوں کی رہنمائی، جائزہ اور نگرانی کا ذمہ دار ہے اور نئی مشن اور ہدفی پروگرام کی تیاری کے لیے مشاورت کو فروغ دیتا ہے۔

بی آر آئی سی-ریسرچ ایڈوائزری بورڈ کی افتتاحی میٹنگ 27 تا 28 مارچ 2026 کو ریجنل سینٹر فار بایو ٹیکنالوجی، فرید آباد میں منعقد ہوئی۔ اس دو روزہ اجلاس میں ماہرین کی ایک متحرک نشست ہوئی، جس میں جرات مندانہ قومی اقدامات، مشترکہ انفراسٹرکچر کی ترجیحات اور گورننس اصلاحات پر غور کیا گیا تاکہ بی آر آئی سی کو ایک مربوط اور غیر مرکزی قومی بایوٹیکنالوجی لیبارٹری میں تبدیل کیا جا سکے۔ اس کا مقصد بی آر آئی سی کو عالمی سطح پر بایوٹیکنالوجی تحقیق میں ایک مضبوط رہنما کے طور پر قائم کرنا ہے، جو اس شعبے میں جدید ترقی کی راہ ہموار کرے گا۔

ڈاکٹر راجیش ایس گوکھلے، سیکریٹری ڈی بی ٹی اور ڈائریکٹر جنرل بی آر آئی سی نے ’بی آر آئی سی فریم ورک کے ذریعے بھارت کی بایوٹیک تبدیلی کے اگلے مرحلے کی مشترکہ تشکیل‘ کے موضوع پر ایک جامع خطاب پیش کیا۔ انہوں نے واضح کیا کہ برک-آر اے بی کے اراکین بی آر آئی سی کی تبدیلی کے شریک معمار کے طور پر ایک منفرد کردار ادا کرتے ہیں۔ آر اے بی کی توجہ ایسے جرات مندانہ، مستقبل بین اور مشن پر مبنی اہداف کی تشکیل اور رہنمائی پر ہونی چاہیے جو ابھرتی ہوئی بایو اکانومی کے مطابق ہوں۔ بصیرت افروز اہداف کے تعین کے ساتھ ساتھ جدید حکمت عملی اور طریقہ کار اس ماحولیاتی نظام کو خوشحال مستقبل کی طرف لے جائیں گے اور پائیدار ترقی کو فروغ دیں گے۔

پروفیسر کے وجے راگھون نے بی آر آئی سی کے متحرک اور جامع ماحولیاتی نظام میں اشتراکِ عمل کے فروغ کے جاری اقدامات کو سراہا۔ انہوں نے اس بات پر قیمتی خیالات پیش کیے کہ کس طرح بی آر آئی سی کو انقلابی سائنسی دریافتوں اور جدت طرازی میں ایک رہنما کے طور پر تصور کیا جا سکتا ہے۔ انہوں نے کثیر شعبہ جاتی ٹیموں کی اہمیت پر زور دیا اور کہا کہ یہ ایسی جدید لیبارٹریوں کی تشکیل کے لیے ناگزیر ہیں جو آج کے پیچیدہ سائنسی چیلنجوں کا مؤثر طور پر مقابلہ کر سکیں۔ انہوں نے مزید کہا کہ جیسے جیسے ہم بایو انقلاب کے اس نئے دور میں داخل ہو رہے ہیں، ہمیں درپیش سوالات نہ صرف وسعت میں بڑے ہو چکے ہیں بلکہ ان کے حل کے لیے کی جانے والی کوششیں بڑی مقدار میں پیچیدہ اور کثیف ڈیٹا بھی پیدا کر رہی ہیں۔ اس پیچیدگی کے پیش نظر ایک اجتماعی نقطۂ نظر کی ضرورت ہے، جو کھلے علم کے تبادلے، وسائل کے مؤثر استعمال، مشترکہ انفراسٹرکچر اور ٹیکنالوجی کی ترقی کے ساتھ ہم آہنگ مسلسل اور تدریجی تخلیقی عمل کے اصولوں پر مبنی ہو۔

بایوٹیکنالوجی کے شعبے میں جرات مندانہ قومی مشن پر مباحثے کی رہنمائی کے لیے ماہر اراکین نے ایک آئیڈییشن سیشن منعقد کیا، جس میں اس بات پر غور کیا گیا کہ iBRIC+ کے بنیادی بجٹ کو کس طرح بہترین طور پر استعمال کیا جائے تاکہ ٹیکنالوجی میں قیادت حاصل کی جا سکے، صنعت کے ساتھ مضبوط روابط قائم کیے جائیں تاکہ ایک مستحکم بایو اکانومی تشکیل دی جا سکے، اور مستقبل کے مضبوط بایوٹیک قائدین تیار کیے جا سکیں۔

کم لاگت جدت طرازی سے متعلق گفتگو میں ڈیزائن انٹیلیجنس کے تصور کو نمایاں اہمیت حاصل رہی، جس میں مقامی وسائل کے استعمال اور اہم شعبوں کے لیے حسبِ ضرورت طریقہ کار اپنانے پر زور دیا گیا۔ اجلاس کا ایک اہم موضوع خود مختار ٹیکنالوجیز کی ترقی کی ضرورت تھا، جو ”وکست بھارت“ کے وژن کو تقویت دے سکے۔ ماہرین نے اس بات پر زور دیا کہ ملک کی آبادیاتی برتری، حیاتیاتی تنوع اور وسیع ڈیٹا وسائل سے فائدہ اٹھایا جائے۔ اس حکمت عملی کا مقصد بھارت کو محض ٹیکنالوجی کے صارف سے ایک عالمی سطح کے جدت طراز رہنما میں تبدیل کرنا ہے۔

اجلاس کا اختتام ایک اوپن ویبینار اور پینل ڈسکشن کے ساتھ ہوا، جس نے iBRIC کے فیکلٹی اراکین کو ریسرچ ایڈوائزری بورڈ کے اراکین کے ساتھ تبادلہ خیال کا قیمتی موقع فراہم کیا۔ اس باہمی سیشن میں مختلف خیالات اور مواقع پر گفتگو ہوئی، جس کا مقصد بھارت کی بایو اکانومی کو آگے بڑھانے میں بی آر آئی سی کے کلیدی کردار کو مزید مضبوط بنانا تھا۔ شرکا نے مختلف حکمت عملیوں اور اہم اقدامات پر تبادلہ خیال کیا جو ملک کے بایو اکانومک منظرنامے کو انقلابی تحقیق اور جدت طرازی کی نئی بلندیوں تک لے جا سکتے ہیں۔

 

 

***********

ش ح۔ ف ش ع

                                                                                                                                       U: 5081

(ریلیز آئی ڈی: 2246564) وزیٹر کاؤنٹر : 4