نیشنل گرین ٹریبونل کی ہدایات کے مطابق، نیشنل بایو ڈائیورسٹی اتھارٹی (این بی اے) نے ملک بھر میں ایسی انواع سے پیدا ہونے والے بڑھتے ہوئے ماحولیاتی اور سماجی و معاشی خطرات سے نمٹنے کے لیے حملہ آور غیر ملکی انواع پر ایک ماہر کمیٹی تشکیل دی ہے۔

یہ فیصلہ این جی ٹی کی جانب سے از خود نوٹس (سو موٹو) کارروائی (O.A. No. 162/2023) کے بعد کیا گیا، جس میں مقامی حیاتیاتی تنوع، اہم ماحولیاتی نظام، زراعت، غذائی تحفظ، اور انسانی و جنگلی حیات کی صحت کے لیے حملہ آور اجنبی انواع کے سنگین خطرات کی نشاندہی کی گئی، اور این بی اے کو ایک جامع مطالعہ کرنے کی ہدایت دی گئی۔ اس اقدام کو ایم او ای ایف سی سی کی جانب سے ایک خصوصی ماہر ادارہ قائم کرنے کی ایڈوائزری کے ذریعے مزید تقویت ملی۔

اس کے مطابق، حیاتیاتی تنوع ایکٹ، 2002 (جیسا کہ 2023 میں ترمیم کی گئی) کے تحت اپنے اختیارات استعمال کرتے ہوئے این بی اے نے اس مسئلے پر اسٹریٹجک رہنمائی فراہم کرنے کے لیے ایک کثیر شعبہ جاتی کمیٹی قائم کی ہے۔ کمیٹی کو ریاستی سطح کے ان پٹس کی بنیاد پر حملہ آور اجنبی انواع کی ایک مربوط قومی فہرست تیار کرنے، زیادہ خطرے والی انواع کی نشاندہی اور ترجیح طے کرنے، اور ان کی روک تھام، کنٹرول اور خاتمے کے لیے سائنسی بنیادوں پر انتظامی حکمت عملیوں، ماحولیاتی بحالی کے اقدامات اور قومی رہنما خطوط تجویز کرنے کا اختیار دیا گیا ہے۔ یہ کمیٹی بہترین طریقۂ کار کی دستاویز سازی اور تشہیر، اہم علمی خلا کی نشاندہی، اور طویل مدتی انتظام و پالیسی ردعمل کو مضبوط بنانے کے لیے تحقیق اور ڈیٹا جنریشن پروگراموں کی سفارش بھی کرے گی۔

کمیٹی کی صدارت آئی ایف ایس (ریٹائرڈ) جناب دھننجے موہن (سابق پی سی سی ایف اور چیف آف فاریسٹ فورس، اتراکھنڈ) کر رہے ہیں، جبکہ پروفیسر (ڈاکٹر) اے۔ بیجو کمار (وائس چانسلر، کیرالہ یونیورسٹی آف فشریز اینڈ اوشین اسٹڈیز) شریک صدر ہیں۔ کمیٹی میں زولوجیکل سروے آف انڈیا، بوٹینیکل سروے آف انڈیا، آئی سی اے آر کے تحقیقی بیورو برائے نباتات، مچھلی اور حشرات کے جینیاتی وسائل، انڈین کونسل آف فاریسٹری ریسرچ اینڈ ایجوکیشن، وائلڈ لائف انسٹی ٹیوٹ آف انڈیا، فاریسٹ سروے آف انڈیا اور تمل ناڈو، اڈیشہ، مہاراشٹر اور آسام کے ریاستی جنگلاتی محکموں کے نمائندوں سمیت مختلف وزارتوں اور ممتاز سائنسی اداروں کے سینئر افسران اور ماہرین شامل ہیں۔

یہ ساخت ماحولیات، جنگلات، زراعت، ماہی گیری، سمندری علوم اور حیاتیاتی تنوع کے تحفظ جیسے شعبوں میں وسیع مہارت کی عکاسی کرتی ہے، جو حملہ آور اجنبی انواع سے نمٹنے کے لیے ایک مربوط، سائنسی اور کُل حکومتی نقطۂ نظر کو یقینی بناتی ہے۔

یہ کمیٹی دو سال کی مدت کے لیے کام کرے گی اور توقع ہے کہ یہ ہندوستان میں حیاتیاتی تنوع کے تحفظ، ماحولیاتی نظام کی لچک میں اضافہ اور قومی و عالمی حیاتیاتی تنوع کے وعدوں کی تکمیل میں اہم کردار ادا کرے گی۔

 

***

 

UR-4592

(ش ح۔اس ک  )

(ریلیز آئی ڈی: 2243296) وزیٹر کاؤنٹر : 21