آیوش کی وزارت کے تحت کام کرنے والا ادارہ فارماکوپیا کمیشن فار انڈین میڈیسن اینڈ ہومیوپیتھی (پی سی آئی ایم اینڈ ایچ) آیوروید، سدھا، یونانی اور ہومیوپیتھی (اے ایس یو اینڈ ایچ) ادویات کے لئے فارمولری وضاحتیں اور فارماکوپیل معیارات مقرر کرتا ہے، جو ان ادویات کی شناخت، خالص ہونے اور طاقت کے تعین کے لئے سرکاری حوالہ کے طور پر استعمال ہوتے ہیں۔ ڈرگس اینڈ کاسمیٹکس ایکٹ 1940 اور ادویات کے قانون 1945 کے مطابق ان معیارات کی پابندی ادویات کی تیاری کے لئے لازمی ہے۔ پی سی آئی ایم اینڈ ایچ انڈین میڈیسن اور ہومیوپیتھی کے لئے مرکزی ادویہ تجربہ گاہ کے طور پر بھی کام کرتا ہے اور ادویات کے معیار کو برقرار رکھنے کے لئے ضابطہ کاری اداروں اور ریاستی ادویاتی تجزیہ کاروں کو تربیت بھی فراہم کرتا ہے۔

ڈرگس اینڈ کاسمیٹکس ایکٹ 1940 اور اس کے تحت بنائے گئے قواعد میں آیوروید، سدھا، سووا رگپا، یونانی اور ہومیوپیتھی ادویات کے لئے الگ ضابطہ جاتی دفعات موجود ہیں۔ آیوروید، سدھا، سووا رگپا اور یونانی ادویات سے متعلق دفعات ایکٹ کے باب چہارم اے اور شیڈول-I میں شامل ہیں، جبکہ ادویات کے قانون 1945 کے رول 151 تا 169 اور شیڈول ای (I)، ٹی اور ٹی اے میں ان کی تفصیل دی گئی ہے۔ ہومیوپیتھی ادویات کے لئے رول 2dd، 30AA، 67 (C-H)، 85 (A-I)، 106-A، شیڈول کے اور شیڈول ایم-I لاگو ہوتے ہیں۔

ادویات تیار کرنے والے اداروں کے لئے یہ لازمی ہے کہ وہ لائسنس کے تقاضوں، حفاظت اور افادیت کے ثبوت، اور گڈ مینوفیکچرنگ پریکٹسز (جی ایم پی) کی پابندی کریں، جیسا کہ ڈرگس رولز 1945 کے شیڈول ٹی اور ایم-I میں درج ہے، اور متعلقہ فارماکوپیا کے معیار پر عمل کریں۔

ڈرگس رولز 1945 کے رول 160 (A تا J) کے تحت ادویات کی شناخت، خالصیت اور معیار کی جانچ کے لئے لیبارٹریوں کو منظوری دی جاتی ہے۔ فی الحال 108 نجی لیبارٹریاں منظور یا لائسنس یافتہ ہیں، جبکہ ریاستوں اور مرکز کے زیر انتظام علاقوں کی 34 لیبارٹریاں قانونی نمونوں کی جانچ کر رہی ہیں۔

ڈرگ انسپکٹرز باقاعدگی سے ادویات کے نمونے حاصل کرکے انہیں جانچ کے لئے لیبارٹریوں میں بھیجتے ہیں۔ اگر کوئی نمونہ معیار کے مطابق نہ ہو تو اس کی فروخت پر پابندی لگانے اور قانونی کارروائی جیسے اقدامات کئے جاتے ہیں۔

آیوش کی وزارت ادویات کے معیار کو بہتر بنانے کے لئے مختلف سرٹیفیکیشن کو فروغ دے رہی ہے۔ سینٹرل ڈرگس اسٹینڈرڈ کنٹرول آرگنائزیشن (سی ڈی ایس سی او) میں آیوش ونگ قائم کیا گیا ہے، جو معیاری ادویات کے لئے عالمی ادارہ صحت کا سرٹیفکیٹ (ڈبلیو ایچ او-کو پی پی) جاری کرتا ہے۔ کوالٹی کونسل آف انڈیا کے تحت معیار سرٹیفیکیشن اسکیم کے ذریعے آیوش مصنوعات کو معیاری اور پریمیم نشان دیئے جاتے ہیں۔ دسمبر 2025 میں عالمی معیار کے مطابق آیوش کوالٹی مارک بھی متعارف کرایا گیا، جس سے صارفین کا اعتماد مضبوط ہوا ہے۔

آیوش کی وزارت نے تحقیق کے فروغ کے لئے سنٹرل کونسل فار ریسرچ ان آیورویدک سائنسز، یونانی، ہومیوپیتھی، سدھا اور یوگا و نیچروپیتھی کے تحقیقی ادارے قائم کئے ہیں، جو ادویاتی پودوں، معیاری سازی، کلینیکل تحقیق اور قبائلی صحت جیسے شعبوں میں کام کر رہے ہیں۔

مزید برآں، آیوش کی وزارت آیورگیان اسکیم نافذ کر رہی ہے، جس کے تحت تحقیق و اختراع اور آیوروید بایولوجی مربوط صحت تحقیق کے لئے اداروں کو مالی معاونت فراہم کی جا رہی ہے، تاکہ آیوش نظامِ طب میں سائنسی بنیادوں پر تحقیق کو فروغ دیا جا سکے۔

یہ معلومات وزیر مملکت (آزادانہ چارج) برائے آیوش جناب پرتاپ راؤ جادھو نے 17 مارچ 2026 کو راجیہ سبھا میں ایک سوال کے تحریری جواب میں فراہم کی۔

 

************

ش ح ۔   م    د۔  م  ص

(U :  4366  )

(ریلیز آئی ڈی: 2242066) وزیٹر کاؤنٹر : 6