نیشنل ڈیفنس انڈسٹریز کانکلیو (این ڈی آئی سی) 2026، جس کا اہتمام محکمۂ دفاعی پیداوار (ڈی ڈی پی) کی جانب سے ’’جدید مینوفیکچرنگ ٹیکنالوجیز‘‘ کے موضوع پر کیا جا رہا ہے، 19 اور 20 مارچ 2026 کو نئی دہلی کے مانیک شا سینٹر میں منعقد ہوگا۔ اس دو روزہ تقریب کا افتتاح وزیرِ دفاع جناب راج ناتھ سنگھ کریں گے۔

اس کانکلیو کا مقصد مائیکرو، چھوٹے اور درمیانے درجے کے کاروباری اداروں (ایم ایس ایم ایز) کو بھارت کے دفاعی مینوفیکچرنگ نظام سے مزید مضبوطی کے ساتھ جوڑنا ہے، ساتھ ہی آٹومیشن، مصنوعی ذہانت، روبوٹکس، ایڈیٹو مینوفیکچرنگ، ڈیجیٹل ٹوئنز اور اسمارٹ میٹریلز جیسی جدید ٹیکنالوجیز کے استعمال کو فروغ دینا بھی اس کا اہم ہدف ہے۔ یہ پہل حکومت کے دفاع کے شعبے میں خود انحصاری (آتم نربھرتا) کے وژن کے مطابق ہے اور اس کا مقصد بھارت کی تکنیکی صلاحیت اور عالمی مسابقت کو مزید بہتر بنانا ہے۔

اس کانکلیو میں ایم ایس ایم ایز، اسٹارٹ اپس، دفاعی سرکاری ادارے (ڈی پی ایس یوز)، نجی دفاعی کمپنیاں، موجدین، پالیسی ساز، تعلیمی ادارے اور ٹیکنالوجی فراہم کرنے والے شریک ہوں گے، تاکہ پالیسی سطح پر مکالمہ ممکن ہو، جدت کو فروغ ملے اور دفاعی سپلائی چین میں زیادہ سے زیادہ شرکت کو یقینی بنایا جا سکے۔ یہ تقریب غیر دفاعی شعبوں کی صنعتوں کو بھی دفاعی پیداوار کے مواقع تلاش کرنے کی ترغیب دے گی اور صنعت و تعلیمی اداروں کے درمیان اشتراک اور مشترکہ تحقیق و ترقی کو فروغ دے گی۔

تقریب کے دوران وزیرِ دفاع جدید مینوفیکچرنگ ٹیکنالوجیز اور دفاعی جدتوں پر مبنی ایک نمائش کا افتتاح بھی کریں گے۔ اس کے علاوہ وہ دفاعی افواج اور دفاعی سرکاری اداروں کی جانب سے اسٹارٹ اپس اور ایم ایس ایم ایز کے لیے نئے چیلنجز کا بھی اعلان کریں گے۔ دفاعی پیداوار اور پالیسی اصلاحات سے متعلق کئی اہم اشاعتیں بھی اس موقع پر جاری کی جائیں گی۔

نمائش (Exhibition)

اس نمائش میں نجی اور سرکاری شعبے کی بڑی دفاعی کمپنیاں اپنے اسٹالز قائم کریں گی، جہاں وہ دفاعی مینوفیکچرنگ میں ایم ایس ایم ایز کو شراکت دار اور سپلائر کے طور پر شامل کرنے کے لیے اپنی اسکیموں اور پروگرامز کو پیش کریں گی۔ اس کے علاوہ 24 بھارتی اور غیر ملکی کمپنیاں جدید مینوفیکچرنگ ٹیکنالوجیز کی نمائش کریں گی۔ توقع ہے کہ یہ نمائش بڑی نجی دفاعی کمپنیوں، ڈی پی ایس یوز، ٹیکنالوجی فراہم کرنے والوں اور ایم ایس ایم ایز کے درمیان بامعنی شراکت داری کو فروغ دے گی، جو ایک خود کفیل اور عالمی سطح پر مسابقتی دفاعی مینوفیکچرنگ نظام کے قومی ہدف میں معاون ثابت ہوگی۔

 

اجلاس (Sessions)

اس تقریب میں مختلف موضوعاتی اور شعبہ جاتی اجلاس منعقد ہوں گے، جن میں دفاعی مینوفیکچرنگ کے اہم شعبوں کا احاطہ کیا جائے گا۔ یہ اجلاس پالیسی سازوں، صنعت کے ماہرین، اسٹارٹ اپس اور ٹیکنالوجی کے ماہرین کو ایک پلیٹ فارم فراہم کریں گے تاکہ وہ خیالات کا تبادلہ کریں اور اس شعبے میں ابھرتے مواقع پر گفتگو کر سکیں۔ ان مباحثوں میں مقامی سطح پر پیداوار (انڈیجینائزیشن)، جدت طرازی اور ٹیکنالوجی کی ترقی جیسے اہم موضوعات شامل ہوں گے، خصوصاً ایرو اسپیس، بحری نظام، دفاعی الیکٹرانکس، جدید مواد اور دفاعی پلیٹ فارمز کے شعبوں میں۔

یہ کانکلیو اس سال محکمۂ دفاعی پیداوار کی جانب سے منعقد کیے گئے 12 ریاستی سطح کے ایم ایس ایم ای کانکلیوز اور دیگر مشاورتی نشستوں سے پیدا ہونے والی پیش رفت کو آگے بڑھاتا ہے۔ توقع ہے کہ یہ تقریب جدت کو فروغ دینے، صنعت کی شمولیت کو مضبوط بنانے اور دفاعی مینوفیکچرنگ میں بھارت کی خود انحصاری کے سفر کو تیز کرنے کے لیے ایک اہم پلیٹ فارم ثابت ہوگی۔

****

ش ح۔ ش ت۔ ج

Uno-4293

(ریلیز آئی ڈی: 2241458) وزیٹر کاؤنٹر : 17