ہاؤسنگ و شہری امور اور بجلی کے مرکزی وزیر جناب منوہر لال نے کل وزارت ہاؤسنگ و شہری امور کی پارلیمانی مشاورتی کمیٹی کی میٹنگ کی صدارت کی، جس میں نیشنل بلڈنگس کنسٹرکشن کارپوریشن اور سنٹرل پبلک ورکس ڈپارٹمنٹ کی کارکردگی اور جاری اقدامات کا جائزہ لیا گیا۔

اس میٹنگ میں وزارت ہاؤسنگ و شہری امور کے سکریٹری جناب سرینواس کٹیکتھالا، وزارت کے سینئر افسران اور راجیہ سبھا و لوک سبھا کے اراکین پارلیمنٹ نے شرکت کی۔

میٹنگ کے دوران سرکاری بنیادی ڈھانچے کے پروجیکٹوں میں استعمال ہونے والی جدید تعمیراتی ٹیکنالوجیز پر ایک مفصل پریزنٹیشن پیش کی گئی۔ اس بحث میں اس بات کو اجاگر کیا گیا کہ جدید تعمیراتی تکنیکوں کے بڑھتے ہوئے استعمال سے منصوبوں کی تکمیل کی رفتار میں اضافہ، ڈھانچے کے معیار میں بہتری اور عوامی بنیادی ڈھانچے کی ترقی میں کارکردگی میں اضافہ ممکن ہو رہا ہے۔

 

کمیٹی نے جنرل پول رہائشی مکانات (جی پی آر اے) کالونیوں اور دیگر سرکاری عمارتوں کے لیے نافذ کیے جا رہے جدید ری ڈیولپمنٹ ماڈلز کا بھی جائزہ لیا۔ ان تعمیر نو اقدامات کا مقصد قیمتی شہری زمین کے مؤثر استعمال کو یقینی بنانا، جدید اور پائیدار رہائشی بنیادی ڈھانچہ فراہم کرنا اور سرکاری ملازمین کے رہائشی حالات کو بہتر بنانا ہے۔

اپنے خیالات کا اظہار کرتے ہوئے مرکزی وزیر جناب منوہر لال نے مؤثر تعمیراتی طریقوں کو اپنانے اور ٹیکنالوجی سے فائدہ اٹھانے کی اہمیت پر زور دیا تاکہ پروجیکٹوں کے معیار، شفافیت اور بروقت تکمیل کو یقینی بنایا جا سکے۔ انہوں نے کہا کہ جدید ٹیکنالوجی کے استعمال اور بہتر منصوبہ جاتی نظم و نسق کے طریقوں کے باعث ملک بھر میں عوامی بنیادی ڈھانچے کی فراہمی کے نظام میں نمایاں تبدیلی آ رہی ہے۔

مشاورتی کمیٹی کے اراکین نے تعمیراتی طریقوں کو مضبوط بنانے، منصوبوں کی نگرانی کے نظام کو بہتر بنانے اور سرکاری بنیادی ڈھانچے کے پروجیکٹوں کے معیار اور پائیداری کو مزید بڑھانے کے حوالے سے اپنے خیالات اور تجاویز پیش کیں۔

مرکزی وزیر جناب منوہر لال نے اراکین پارلیمنٹ کی جانب سے پیش کی گئی تجاویز کا خیرمقدم کیا اور یقین دہانی کرائی کہ ان کی قیمتی آراء کو نیشنل بلڈنگس کنسٹرکشن کارپوریشن اور سنٹرل پبلک ورکس ڈپارٹمنٹ کے کام کاج کو بہتر بنانے اور ملک بھر میں بنیادی ڈھانچے کی ترقی کو مزید مضبوط بنانے کے لیے زیر غور لایا جائے گا۔

************

ش ح ۔   م    ع ۔  م  ص 

(U :4012)

(ریلیز آئی ڈی: 2239893) وزیٹر کاؤنٹر : 4