Gangtok, Lber 12: Kum shi bynta ka media exposure sha ka jylla Sikkim kaba dang iaid mynta, ka kynhun ki nongthoh khubor na Meghalaya mynta ka sngi ka la leit jngoh ïa ka shnong Tingda kaba don ha North Sikkim, kawei na ki shnong kaba hap hapoh ka prokram Vibrant Villages jong ka Sorkar India. Ka jingleit jngoh ka la plie lad ia ki nongthoh khubor ban sakhi dalade ia ki kam pynroi ba la shim ban pynkhlain ia ki jingdon jingem, ka jingpyniasoh bad ki lad kamai kajih ha ki shnong khappud kiba jngai.

Ha kane ka jingleit jngoh, u Prashant Kumar Sinha, Deputy Commandant, 13th Battalion jong ka Indo-Tibetan Border Police (ITBP), u la batai bniah ia ka kynhun shaphang ki jingthmu bad ka jingpyntreikam ïa kane ka prokram bad ka bynta ba ka ITBP ka leh ha kaba kyrshan ïa ki kam pynroi bad ka jingïatreilang jong ki paidbah ha ki thaiñ khappud.

Ia ka Vibrant Villages Programme la plie paidbah da u Myntri kam pohiing jong ka sorkar pdeng u Amit Shah ha u snem 2023, bad ia ka shnong Tingda la pynrung ha ka Bynta I jong ka prokram, kaba phaikhmat halor ka roi ka par ba pura jong ki shnong kiba don ha khappud shatei lammihngi.

U Sinha u la batai ba ka prokram ka ialeh ban pynkylla ïa ki shnong khappud sha ki shnong kiba khlain bad kiba lah ban kyrshan dalade da kaba pynthikna ïa ka jingpyntreikam pura ia ki skhim jong ka sorkar pdeng bad sorkar jylla bad kyntiew ïa ka roi ka par ha kylleng ki kam kum ka jingpynïasoh surok, ka jingshna ïing, ka bording, ka kam telecommunication, ka kam jngohkai pyrthei, ka jingkyntiew ïa ki sap bad ki lad kamai jakpoh.

U Assistant Director na ka Tnad Rural Development, Sorkar Sikkim, u la ai jingtip ruh ia ki nongthoh khubor kiba wan jngoh shaphang ki prokram bapher bapher ba iadei bad ki kam pynroi bad ki sienjam ba iadei bad ka bha ka miat ba la pyntreikam da ka Sorkar Jylla ban kyntiew ïa ki jingdon jingem ha ki jaka nongkyndong, ban pynkhlain ïa ki lad kamai kajih bad ban pynthikna ïa ka jingpynpoi ïa ki skhim jong ka sorkar ha kylleng ki shnong ha ka jylla.

U la ong shuh shuh ba kane ka sienjam ka pynshlur ïa ka jingkyntiew ïa ki kam ka ioh ka kot kiba lah ban iaineh kum ka rep ka riang, kam horticulture, kam shna tiar da ka kti bad ka kam jngohkai pyrthei, katba ka pynkupbor ruh ïa ki nongshong shnong jong ka thain lyngba ka jingkyntiew ïa ki sap bad ka jingseng kam seng jam.

U Sinha u la bynrap ba ka jingkyntiew ïa ki vibrant village kiba seisoh bha ha ka ioh ka kot ha shilynter ka thain khappud ka long kaba kongsan ym tang na ka liang ka roi ka par hynrei wat na ka liang ka buit treikam, namar ka pynshlur ïa ki briew ban bteng ban shong ban sah ha kine ki jaka bad pynkhlain ïa ka jingdon jong ka India ha ki thaiñ khappud.

Ha kane ka jingleit jngoh, u President jong ka Gram Panchayat jong ka shnong Tingda u la iathuh ia ka kynhun shaphang kane ka shnong bad ka jingktah jong ka Vibrant Villages Programme ïa ki nongshong shnong jong ka thaiñ. U la pyntip ba ka shnong Tingda ka don kumba 213 tylli ki longïing bad ka jingbun briew ka long haduh 1,000 ngut ki nongshong shnong, bad katto katne ki sienjam ba iadei bad ka roi ka par ki la ïarap ban kyntiew ïa ki jingdon jingem, ka jingpyniasoh bad ki lad kamai jakpoh jong ki nongshong shnong.

Ki nongthoh khubor ki la ïakren ruh bad ki nongshong shnong, ki nongmihkhmat na ka thaiñ bad ki dkhot jong ka shnong, kiba la ïathuh ïa ki jingshem jong ki haba ki sah ha ka shnong khappud bad ki la kren shaphang ki jingkylla ba la wanrah da ki sienjam bapher bapher jong ka sorkar hapoh ka Vibrant Villages Programme. Ki nongshong shnong ki la ban jur ïa ki jingkyntiew ha ka jingpyniasoh, ka jingïoh ïa ki skhim sorkar bad ki lad kamai, katba ki pynpaw ruh ïa ka jingkyrmen shaphang ka jingpynroi shuh shuh ha ka thaiñ.

****

(Release ID: 2239886) visitor counter : 3