لوک سبھا میں پوچھے گئے *نشان زد سوال نمبر 211 کے جواب میں، جسے دنیش بھائی مکوانا اور بِبھو پرساد ترائی نے اٹھایا تھا، مرکزی وزیر برائے کیمیکلز و فرٹیلائزرز جناب جگت پرکاش نڈا نے پی ایم-پرنام  (زراعت کے انتظام کے لیے متبادل غذائی اجزاء کا فروغ) اسکیم کے بارے میں تفصیلات پیش کیں۔

جناب جگت پرکاش نڈا نے بتایا کہ پی ایم-پرنام  اسکیم کے تحت ریاستوں اور مرکز کے زیر انتظام علاقوں کو کیمیائی کھادوں جیسے یوریا، ڈی اے پی، این پی کے اور ایم او پی کے استعمال میں کمی لانے پر مالی ترغیب دینے کا انتظام ہے۔ اگر کوئی ریاست یا مرکز کے زیر انتظام علاقہ کسی مالی سال میں گزشتہ تین برسوں کی اوسط کھپت کے مقابلے میں کیمیاوی کھادوں کے استعمال میں کمی کرتا ہے تو اسے اس کے بدلے مالی مراعات دی جائیں گی۔ یہ ترغیبی رقم اس کھاد سبسڈی کی 50 فیصد کے برابر ہوگی جو کیمیائی کھادوں کے کم استعمال کی وجہ سے بچت کی صورت میں حاصل ہوگی۔

وزیر موصوف نے مزید بتایا کہ کل ترغیبی گرانٹ میں سے 95 فیصد متعلقہ ریاست یا مرکز کے زیر انتظام علاقے کو دیا جائے گا، جبکہ باقی 5 فیصد رقم نگرانی، معلومات، تعلیم اور ترسیل، تحقیق، صلاحیت سازی اور انعامات کے مقاصد کے لیے استعمال کی جائے گی۔

انہوں نے بتایا کہ پی ایم-پرنام  اسکیم کی مالی اعانت کھاد سبسڈی میں ہونے والی اس بچت سے کی جاتی ہے جو کیمیاوی کھادوں کے کم استعمال کے نتیجے میں حاصل ہوتی ہے۔ اسکیم کے رہنما اصولوں کے مطابق ریاستوں اور مرکز کے زیر انتظام علاقوں کو ہر مالی سال کے آغاز میں ایکشن پلان پیش کرنا ہوتا ہے جس میں گرانٹس کے مجوزہ استعمال کی تفصیل شامل ہوتی ہے۔ مالی سال کے اختتام پر استعمال کے سرٹیفکیٹ جمع کرانا ضروری ہوتا ہے اور اگلے برسوں کے لیے گرانٹس کا اجراء پچھلی گرانٹس کے درست استعمال پر منحصر ہوتا ہے۔

وزیر موصوف نے یہ بھی بتایا کہ اب تک پی ایم-پرنام  اسکیم کے تحت کسی بھی ریاست یا مرکز کے زیر انتظام علاقے کو کوئی مالی ترغیب جاری نہیں کی گئی ہے۔

اسکیم کے مقاصد بیان کرتے ہوئے وزیر موصوف نے کہا کہ پی ایم-پرنام  ریاستوں اور مرکز کے زیر انتظام علاقوں کو کیمیاوی کھادوں کے استعمال میں کمی اور متبادل و پائیدار زرعی طور طریقوں کو فروغ دینے کے لیے مختلف اقدامات کے ذریعے ترغیب دیتی ہے، جن میں شامل ہیں:

• ماحول دوست زراعت کے لیے نامیاتی، بایو اور نینو کھادوں جیسے متبادل کھادوں کے استعمال کی حوصلہ افزائی۔
• قدرتی اور نامیاتی کاشتکاری کے طریقوں کو فروغ دینے کے لیے معاونت۔
• وسائل کے تحفظ سے متعلق ٹیکنالوجیز جیسے مائیکرو آبپاشی اور زیرو ٹلج کو فروغ دینا۔
• انٹیگریٹڈ نیوٹرینٹ مینجمنٹ (غذائی اجزاء کے مربوط انتظام) کے طریقوں کو اپنانے کی ترغیب تاکہ مٹی کی زرخیزی برقرار رہے اور پودوں کو مناسب غذائی اجزا کی فراہمی یقینی ہو۔
• حکومتِ ہندوستان کی موجودہ اسکیموں جیسے پرمپراگت کرشی وکاس یوجنا (پی کے وی وائی) اور شمال مشرقی خطے کے لئے مشن آرگینک ویلیو چین ڈیولپمنٹ (ایم او وی سی ڈی این ای آر) کے ذریعے نامیاتی کاشتکاری کو فروغ دینا اور قدرتی کاشتکاری کے قومی مشن (این ایم این ایف) کے ذریعے قدرتی کاشتکاری کو بڑھاوا دینا۔

محکمہ زراعت و کسان بہبود کے مطابق ان اسکیموں کے تحت نمایاں پیش رفت ہوئی ہے۔ پرمپراگت کرشی وکاس یوجنا (پی کے وی وائی) کے تحت (31 دسمبر 2025 تک) 18.84 لاکھ ہیکٹیئر رقبہ احاطہ میں آ چکا ہے اور 16-2015 میں آغاز کے بعد سے 33.93 لاکھ کسانوں کو فائدہ پہنچا ہے۔

اسی طرح شمال مشرقی خطے کے لئے مشن آرگینک ویلیو چین ڈیولپمنٹ (ایم او وی سی ڈی این ای آر) کے تحت (31 دسمبر 2025 تک) 2.36 لاکھ ہیکٹیئر رقبہ احاطہ میں آیا ہے اور 2.70 لاکھ کسانوں کو فائدہ حاصل ہوا ہے۔

مزید برآں، قدرتی کاشتکاری کے قومی مشن (این ایم این ایف) کے تحت (9 فروری 2026 تک) 8.57 لاکھ ہیکٹیئر رقبہ احاطہ میں آ چکا ہے اور 17.45 لاکھ کسانوں کا اندراج کیا جا چکا ہے۔

اس اسکیم کے تحت ریاستوں اور مرکز کے زیر انتظام علاقوں کے لحاظ سے احاطہ کیے گئے رقبے اور شامل کسانوں کی تعداد کی تفصیلات (9 فروری 2026 تک) ضمیمہ میں فراہم کی گئی ہیں۔

ضمیمہ

لوک سبھا کے نشان زد سوال نمبر 211 کے حصہ (د) کے جواب کے سلسلے میں حوالہ دیا گیا ضمیمہ، جس کا جواب 13 فروری-2026 کو دیا گیا۔

  

 

Sl. No.	States/UTs	Farmer Enrolment	Area covered (in Ha)
1	Andaman & Nicobar Islands	250	100
2	Andhra Pradesh	407373	272847.47
3	Arunachal Pradesh	453	130.68
4	Assam	3721	2581.68
5	Bihar	50008	21253.51
6	Chhattisgarh	55061	23574.91
7	Dadra & Nagar Haveli and Daman & Diu	0	0
8	Delhi	375	150
9	Goa	1545	607.33
10	Gujarat	86862	42155.09
11	Haryana	10325	9098.19
12	Himachal Pradesh	61752	21981.62
13	Jammu & Kashmir	19387	6619.25
14	Jharkhand	11201	4498.67
15	Karnataka	122731	65072.1
16	Kerala	16530	6162.97
17	Ladakh	563	208.86
18	Madhya Pradesh	142676	82933.59
19	Maharashtra	136085	37901.21
20	Manipur	6316	2680.87
21	Meghalaya	5902	2066.62
22	Mizoram	13016	8361.46
23	Nagaland	7212	3158.72
24	Odisha	60415	24044.91
25	Puducherry	747	249.25
26	Punjab	5104	1768.24
27	Rajasthan	206492	90242.67
28	Tamil Nadu	5819	2613.23
29	Telangana	61173	35774.89
30	Tripura	13604	5218.94
31	Uttar Pradesh	210774	73732.32
32	Uttarakhand	22481	9522.03
33	West Bengal	0	0
Total		1745953	857311.28

******

ش ح ۔   م    ع ۔  م  ص

(U :  4009  )

(ریلیز آئی ڈی: 2239852) وزیٹر کاؤنٹر : 11