کامرس اور صنعت کی وزارت کے تحت محکمہ برائے فروغ صنعت و داخلی تجارت (ڈی پی آئی آئی ٹی) نے کولنگ اور اسمارٹ آلات کے ماحولیاتی نظام میں صنعت اور اسٹارٹ اپس کے درمیان تعاون کو فروغ دینے کے لیے ٹاٹا انٹرپرائز وولٹاس لمیٹڈ کے ساتھ ایک مفاہمت نامے پر دستخط کیے ہیں۔

یہ تعاون ہیٹنگ، وینٹیلیشن اور ایئر کنڈیشنگ (ایچ وی اے سی) کے جدید کنٹرول سسٹمز، پاور الیکٹرانکس، مصنوعی ذہانت اور مشین لرننگ پر مبنی تشخیصی نظام، آئی او ٹی سے چلنے والے اسمارٹ آلات، اور مینوفیکچرنگ و سروس آپریشنز میں ڈیجیٹلائزیشن جیسے شعبوں میں کام کرنے والے اسٹارٹ اپس کو شامل کرنے کی کوشش کرتا ہے۔

اس پہل کے تحت ڈی پی آئی آئی ٹی اور وولٹاس لمیٹڈ، اسٹارٹ اپ انڈیا پروگرام کے ذریعے بھارت اسٹارٹ اپ گرینڈ چیلنج کے تحت اختراعی چیلنجز کا انعقاد کریں گے اور صنعت سے متعلق مسائل کے بیانات پر مبنی ہیکاتھون بھی منعقد کیے جائیں گے۔

اس موقع پر خطاب کرتے ہوئے ڈی پی آئی آئی ٹی کے جوائنٹ سکریٹری جناب سنجیو نے کہا کہ یہ تعاون صنعت اور اسٹارٹ اپس کے درمیان زیادہ سے زیادہ شمولیت کو فروغ دینے کے لیے حکومت کی کوششوں کے عین مطابق ہے، خصوصاً ابھرتی ہوئی ٹیکنالوجی اور جدید مینوفیکچرنگ کے شعبوں میں۔ انہوں نے کہا کہ اس طرح کی شراکت داری اسٹارٹ اپس کو صنعت کی ضروریات سے ہم آہنگ حل تیار کرنے اور ان کی جانچ کے مواقع فراہم کرنے میں مددگار ثابت ہو سکتی ہے۔

اس شراکت داری کے تحت ڈی پی آئی آئی ٹی، اسٹارٹ اپ انڈیا اقدام کے ذریعے وولٹاس لمیٹڈ کے ساتھ مل کر ابھرتی ہوئی صنعتی ضروریات کے مطابق اسٹارٹ اپس کی شناخت کرے گا۔ منتخب اسٹارٹ اپس کو سرپرستی، تکنیکی رہنمائی، جانچ کے بنیادی ڈھانچے تک رسائی اور مصنوعات کی ترقی کے لیے بازار سے روابط کے مواقع فراہم کیے جا سکتے ہیں۔

توجہ کے اہم شعبوں میں توانائی سے مؤثر کولنگ سسٹمز، ہوا کے معیار کی نگرانی اور فلٹریشن ٹیکنالوجیز، جدید انورٹر کنٹرول، پیش گوئی پر مبنی دیکھ بھال کے حل، ریفریجریٹر سیفٹی سسٹمز، اور تنصیب و خدمات کے لیے ڈیجیٹل ٹولز شامل ہو سکتے ہیں۔

منتخب اسٹارٹ اپس مصنوعات کی توثیق اور ٹیکنالوجی کے انضمام کے لیے وولٹاس کی انجینئرنگ ٹیموں کے ساتھ منظم پروف آف کانسیپٹ (PoC) پروگراموں میں بھی حصہ لے سکیں گے۔ یہ تعاون حل کی جانچ اور بہتری کے لیے وولٹاس کے سروس نیٹ ورک کے ذریعے فیلڈ ٹرائلز کی سہولت بھی فراہم کر سکتا ہے۔

اس مفاہمت نامے پر ڈی پی آئی آئی ٹی کے ڈائریکٹر ڈاکٹر سمیت کمار جارنگل اور وولٹاس لمیٹڈ کے منیجنگ ڈائریکٹر جناب مکندن مینن نے دونوں اداروں کے سینئر عہدیداروں کی موجودگی میں دستخط کیے۔

***

UR-3741

(ش ح۔اس ک  )

(ریلیز آئی ڈی: 2238563) وزیٹر کاؤنٹر : 5