حکومت ہند کی کارپوریٹ امور کی وزارت کے تحت انویسٹر ایجوکیشن اینڈ پروٹیکشن فنڈ اتھارٹی (آئی ای پی ایف اے) نے نیشنل کونسل آف اپلائیڈ اکنامک ریسرچ (این سی اے ای آر) اور سیفائر انٹرنیشنل اسکول کے اشتراک سے عالمی یوم خواتین کے موقع پر ایک سرمایہ کار تعلیم و تحفظ ورکشاپ کا انعقاد کیا۔

اس پروگرام کا مقصد نوجوان طلبا اور خواتین کے درمیان مالیاتی خواندگی، سرمایہ کاروں کے شعور اور ڈیجیٹل تحفظ کو فروغ دینا تھا، تاکہ مالی طور پر بااختیار اور جامع معاشرے کے وژن کو تقویت دی جا سکے۔

ورکشاپ کا موضوع “مستقبل ابھی ہے: جین-الفا کے لیے مالیاتی تعلیم اور وِکست بھارت کے لیے صنفی خلا کو کم کرنا” تھا۔ اس پروگرام میں پالیسی سازوں، مالیاتی ماہرین اور ماہرین تعلیم نے شرکت کی اور بھارت کی تیزی سے ترقی کرتی ڈیجیٹل معیشت میں ذمہ دارانہ مالیاتی رویّوں اور صنفی طور پر جامع مالیاتی شرکت کی اہمیت پر تبادلہ خیال کیا۔

شرکا کا خیرمقدم کرتے ہوئے سیفائر انٹرنیشنل اسکول کی پرنسپل محترمہ ایکتا سونی نے نوجوان طلبا، خصوصاً لڑکیوں کو مالیاتی معلومات سے آراستہ کرنے کی اہمیت پر زور دیا تاکہ ان میں اعتماد اور خودمختاری پیدا ہو سکے۔

اپنے کلیدی خطاب میں محترمہ انیتا شاہ اکیلا، سی ای او، انویسٹر ایجوکیشن اینڈ پروٹیکشن فنڈ اتھارٹی اور جوائنٹ سکریٹری، وزارت کارپوریٹ امور نے اس بات پر زور دیا کہ جب بھارت میں ڈیجیٹل ادائیگیوں میں تیزی سے اضافہ ہو رہا ہے تو نوجوان شہریوں میں محفوظ مالیاتی عادات پیدا کرنے اور سائبر فراڈ سے بچنے کے لیے ابتدائی مرحلے سے ہی مالیاتی تعلیم نہایت ضروری ہے۔ انہوں نے خواتین اور لڑکیوں کو مالیاتی آگاہی اور باخبر فیصلہ سازی کے ذریعے بااختیار بنانے کی اہمیت کو بھی اجاگر کیا۔

 

 

پینل مباحثہ، جس کی نظامت ڈاکٹر سی ایس مہاپاترا، آئی ای پی ایف چیئر پروفیسر، نیشنل کونسل آف اپلائیڈ اکنامک ریسرچ (این سی اے ای آر) نے کی، اس بات پر مرکوز تھا کہ مالیاتی تعلیم کو بھارت کی ڈیجیٹل تبدیلی کے ساتھ ہم آہنگ کیا جائے اور مالیاتی اعتماد و رسائی میں موجود صنفی فرق کو دور کیا جائے۔ ڈاکٹر سونل ٹیکو، محترمہ ہمانی لاتھ اور سی ایس شیوم شرما پر مشتمل ماہرین نے سائبر تحفظ، مالیاتی منصوبہ بندی، اخلاقی مالیاتی طرز عمل اور ضابطہ جاتی آگاہی سے متعلق اپنے خیالات اور تجربات پیش کیے۔

 

 

آؤٹ ریچ اقدام کے تحت ورکشاپ میں ہاؤس کیپنگ عملے کو بھی شامل کیا گیا، جہاں ماہرین نے بچت، سرمایہ کاری اور محفوظ مالیاتی طریقوں کے بنیادی تصورات کو نہایت سادہ اور عملی انداز میں سمجھایا۔ ایک تعاملی سوال و جواب کے سیشن میں شرکا کو ڈیجیٹل تحفظ اور مالیاتی منصوبہ بندی سے متعلق رہنمائی حاصل کرنے کا موقع بھی ملا۔

ورکشاپ کا اختتام کوئز کے فاتحین اور شرکا میں سرٹیفکیٹس کی تقسیم کے ساتھ ہوا، جس کے ذریعے انویسٹر ایجوکیشن اینڈ پروٹیکشن فنڈ اتھارٹی اور نیشنل کونسل آف اپلائیڈ اکنامک ریسرچ کے مالیاتی خواندگی کے فروغ اور نوجوانوں و کمیونٹیز کو بااختیار بنانے کے عزم کو تقویت دی گئی، جو وکست بھارت کے وژن کے مطابق ہے۔

***********

ش ح۔ ف ش ع

                                                                                                                                       U: 3612

(ریلیز آئی ڈی: 2237282) وزیٹر کاؤنٹر : 5