ملک کے ہر دیہی گھرانے کو مقررہ معیار کے مطابق مناسب مقدار میں محفوظ پینے کا پانی باقاعدہ اور طویل مدتی بنیاد پر نل کے کنکشن کے ذریعے فراہم کرنے کے مقصد سے حکومتِ ہند ریاستوں کے اشتراک سے اگست 2019 سے جل جیون مشن (جے جے ایم) — ہر گھر جل — نافذ کر رہی ہے۔

مشن کے آغاز کے وقت صرف 3.23 کروڑ (16.7 فیصد) دیہی گھرانوں کے پاس نل کے پانی کا کنکشن موجود تھا۔ ریاستوں اور مرکز کے زیر انتظام علاقوں کی جانب سے 03-03-2026 تک فراہم کردہ معلومات کے مطابق جل جیون مشن کے تحت اب تک 12.58 کروڑ سے زیادہ اضافی دیہی گھرانوں کو نل کے پانی کے کنکشن فراہم کیے جا چکے ہیں۔ اس طرح 03-03-2026 تک ملک کے تقریباً 19.36 کروڑ دیہی گھرانوں میں سے تقریباً 15.82 کروڑ (81.71 فیصد) گھرانوں کو گھروں میں نل کے ذریعے پانی کی فراہمی حاصل ہو چکی ہے۔

اس کے علاوہ ریاست، ضلع اور گاؤں کی سطح پر دیہی علاقوں میں مشن کے تحت فراہم کیے گئے نل کے پانی کے کنکشن کی تفصیلات عوامی ڈومین میں دستیاب ہیں اور جل جیون مشن کے ڈیش بورڈ پر دیکھی جا سکتی ہیں:
https://ejalshakti.gov.in/jjmreport/JJMIndia.aspx

چونکہ پینے کے پانی کا معاملہ ریاستی دائرہ اختیار میں آتا ہے، اس لیے جل جیون مشن کے تحت منصوبہ بندی، منظوری، نفاذ، آپریشن اور دیکھ بھال کی ذمہ داری ریاستی اور مرکز کے زیر انتظام علاقائی حکومتوں پر عائد ہوتی ہے۔ حکومتِ ہند تکنیکی اور مالی معاونت فراہم کرکے ریاستی حکومتوں کی کوششوں کو تقویت دیتی ہے۔ ٹینکروں کے ذریعے پینے کے پانی کی فراہمی والے دیہات کی تفصیلات ریاستی حکومتوں کے پاس محفوظ رکھی جاتی ہیں۔

جل جیون مشن دیہی گھرانوں کی ہمہ گیر رسائی کے اصول پر عمل کرتا ہے۔ سال 2019 سے فنڈز کی تقسیم کے وقت مشکل جغرافیائی علاقوں کے لیے 30 فیصد حصہ رکھا گیا ہے، جن میں صحرائی ترقیاتی پروگرام (ڈی ڈی پی) اور قحط زدہ علاقوں کے پروگرام (ڈی پی اے پی) شامل ہیں، جبکہ درج فہرست ذاتوں اور درج فہرست قبائل کے غالب علاقوں کی آبادی کے لیے 10 فیصد حصہ مقرر کیا گیا ہے تاکہ ان علاقوں میں ترجیحی بنیاد پر کوریج کو یقینی بنایا جا سکے۔

مزید برآں جل جیون مشن کے تحت پینے کے پانی کے ذرائع کی ترقی، مضبوطی اور توسیع کے ساتھ ساتھ پانی کی بڑی مقدار کی منتقلی، پانی کی صفائی اور تقسیم کے نظام کے بنیادی ڈھانچے کی فراہمی کے لیے بھی انتظامات کیے گئے ہیں، خصوصاً ان قحط زدہ اور صحرائی علاقوں میں جہاں زیرِ زمین پانی کے قابلِ اعتماد ذرائع دستیاب نہیں ہیں، اس کے علاوہ دیہات کے اندر پانی کی فراہمی کے بنیادی ڈھانچے کی تعمیر بھی شامل ہے۔

یہ معلومات آج راجیہ سبھا میں ایک سوال کے تحریری جواب میں جل شکتی کے وزیر مملکت جناب وی سومنا نے فراہم کیں۔

 

************

 

ش ح ۔   م  د ۔  م  ص

(U :3587    )

(ریلیز آئی ڈی: 2237178) وزیٹر کاؤنٹر : 6