قومی ہینڈلوم ترقیاتی کارپوریشن (این ایچ ڈی سی) وزارتِ ٹیکسٹائل کے تعاون سے “خصوصی ہینڈلوم ایکسپو – وراثت شکتی” کا انعقاد کر رہی ہے، جو ہندوستان کی بھرپور ہینڈلوم روایت کو اجاگر کرنے کے ساتھ ساتھ ہینڈلوم شعبے میں خواتین کے کردار کو نمایاں کرنے کی ایک خصوصی پہل ہے۔اس ایکسپو کا افتتاح آج ڈاکٹر ایم بینا، ترقیاتی کمشنر برائے ہینڈلوم، نے کیا۔ اس موقع پر راجیو اشوک، منیجنگ ڈائریکٹر این ایچ ڈی سی، وزارتِ ٹیکسٹائل اور این ایچ ڈی سی کے دیگر عہدیدار بھی موجود تھے۔افتتاحی تقریب کے ساتھ عالمی یومِ خواتین کی تقریبات بھی منائی گئیں۔

 

 

خصوصی ہینڈلوم ایکسپو – وراثت شکتی کا مقصد ملک بھر کے ہنرمند بُنکروں اور دستکاروں کو ایک مؤثر تجارتی پلیٹ فارم فراہم کرنا ہے۔ یہ پروگرام ہینڈلوم شعبے کی حمایت اور ان خواتین دستکاروں کو بااختیار بنانے کے لیے حکومت کے مسلسل عزم کی عکاسی کرتا ہے جو ہندوستان کی روایتی بُنائی کی وراثت کو محفوظ رکھنے اور فروغ دینے میں اہم کردار ادا کر رہی ہیں۔

تقریبات کے ایک حصے کے طور پر مختلف ریاستوں سے تعلق رکھنے والی کئی خواتین ہینڈلوم بُنکروں کو ان کی لگن، مہارت اور ہندوستان کے ہینڈلوم شعبے کو مضبوط بنانے میں نمایاں خدمات کے اعتراف میں اعزازات سے نوازا گیا۔

 

یہ نمائش 7 مارچ سے 14 مارچ 2026 تک ہینڈلوم ہاٹ، جن پتھ، نئی دہلی میں منعقد کی جا رہی ہے۔ ایکسپو روزانہ صبح 11 بجے سے رات 8 بجے تک عوام کے لیے کھلی رہے گی، جہاں آنے والے افراد کو براہِ راست کاریگروں سے مستند ہینڈلوم اور دستکاری مصنوعات دیکھنے اور خریدنے کا موقع ملے گا۔ اس سال کے پروگرام میں ملک بھر سے 60 بُنکروں اور دستکاروں کی شرکت شامل ہے، جو ہینڈلوم کپڑوں اور دستکاری مصنوعات کا متنوع مجموعہ پیش کر رہے ہیں۔ یہ ایکسپو ہندوستان کے روایتی دستکاری شعبے کی تخلیقی صلاحیت، ثقافتی رنگا رنگی اور ہنرمندی کو اجاگر کرنے کے ساتھ ساتھ کاریگروں کی برادری کے لیے پائیدار روزگار کو فروغ دینے کا بھی ذریعہ بن رہی ہے۔ 

************

ش ح ۔   م  د ۔  م  ص

(U : 3528   )

(ریلیز آئی ڈی: 2236717) وزیٹر کاؤنٹر : 13