नागपूर ,5 मार्च 2026

भारतीय सैन्याकडून 8 मार्च 2026 रोजी नागपूर येथील रेशीमबाग मैदानावरील सुरेश भट सभागृहात माजी सैनिक सन्मान संपर्क मेळावा आयोजित करण्यात येणार आहे. हा कार्यक्रम उत्तर महाराष्ट्र आणि गुजरात उपक्षेत्र मुख्यालयाच्या मार्गदर्शनाखाली आयोजित केला जाणार आहे. या मेळाव्यात नागपूर, भंडारा, गोंदिया, चंद्रपूर, गडचिरोली, अमरावती आणि वर्धा या जिल्ह्यांतील माजी सैनिक सहभागी होणार आहेत.

माजी सैनिकांच्या अडचणी आणि तक्रारी जाणून घेणे तसेच सशस्त्र दलांद्वारे आणि केंद्र व राज्य सरकारकडून राबविण्यात येणाऱ्या कल्याणकारी योजनांची थेट माहिती त्यांना उपलब्ध करून देणे हा या मेळाव्याचा उद्देश आहे. या कार्यक्रमाला लष्करातील वरिष्ठ अधिकारी तसेच नागरी प्रशासनातील वरिष्ठ अधिकारी उपस्थित राहणार आहेत.

कार्यक्रमस्थळी विविध सेवा व सहाय्य केंद्रे उभारण्यात येणार असून त्यामध्ये तक्रार निवारण कक्ष, वैद्यकीय व दंतचिकित्सा सेवा, कॅन्टीन स्टोअर्स विभाग, नोंद कार्यालये, स्पर्श योजना कक्ष, प्रयागराज येथील संरक्षण लेखा नियंत्रक (निवृत्तीवेतन) कार्यालय, माजी सैनिक आरोग्य योजना कक्ष, सैन्य भरती कार्यालय, जिल्हा सैनिक कल्याण कार्यालय, सैन्य भरती केंद्र तसेच बँका आणि विविध खासगी संस्थांचे माहिती कक्ष यांचा समावेश असणार आहे.

कार्यक्रमात वीर नारी, विधवा माजी सैनिक आणि त्यांच्यावर अवलंबून असलेल्या पाल्यांना आर्थिक मदत देखील दिली जाणार आहे. तसेच गरजूंना व्हिलचेअर्स आणि श्रवण सहाय्यक उपकरणे उपलब्ध करून दिली जातील. सर्व माजी सैनिकांना या मेळाव्यात सहभागी होण्याचे आमंत्रण देण्यात आले असून त्यांना 8 मार्च 2026 रोजी सकाळी 9:30 वाजेपर्यंत कार्यक्रमात उपस्थित राहण्याची विनंती करण्यात आली आहे.

नितीन फुल्लुके /राज दळेकर/प्रिती मालंडकर
 

सोशल मिडियावर आम्हाला फॉलो करा:@PIBMumbai    /PIBMumbai    /pibmumbai  pibmumbai[at]gmail[dot]com  /PIBMumbai    /pibmumbai

 

(Release ID: 2235919) अभ्यागत कक्ष : 43