مشرقی اتر پردیش کے قلب سے بہنے والا دریائے تمسا نے— جو گنگا کا ایک قدیم اور اہم معاون دریا ہے — ضلع اعظم گڑھ میں ایک نمایاں تبدیلی کا مشاہدہ کیا ہے۔ اس دریا کو، جو کبھی گاد کے جمع ہونے، کچرے کے ڈھیروں اور تجاوزات جیسے چیلنجز کا شکار تھا، آج نمامی گنگے پروگرام کے تحت مربوط انتظامی کوششوں اور بھرپور عوامی شرکت کے ذریعے دوبارہ بحال کیاگیا ہے۔

تمسا ندی امبیڈکر نگر، ایودھیا اور اعظم گڑھ کے اضلاع سے گزرتی ہوئی گنگا میں شامل ہو جاتی ہے۔ اس کی ماحولیاتی اور ثقافتی اہمیت کو تسلیم کرتے ہوئے، ضلع گنگا کمیٹی اور مقامی آبادیوں کے فعال تعاون سے اعظم گڑھ میں تحفظ اور صفائی ستھرائی کی ایک خصوصی مہم شروع کی گئی تھی۔

111 گرام پنچایتوں میں عوامی قیادت میں منصوبہ بندی

ضلع اعظم گڑھ میں تمسا ندی کی بحالی کے لیے، جو تقریباً 89 کلومیٹر کے فاصلے پر محیط ہے اور 111 گرام پنچایتوں سے گزرتی ہے، نچلی سطح پر ایک منظم منصوبہ بندی کی ضرورت تھی۔

اعظم گڑھ کے ڈسٹرکٹ مجسٹریٹ جناب رویندر کمار نے بتایا کہ ضلع سطح پر تمام گرام پردھانوں کے ساتھ میٹنگز منعقد کی گئیں تاکہ انہیں دریا کی صفائی اور اس کے طویل مدتی ماحولیاتی و معاشی فوائد کے بارے میں آگاہ کیا جا سکے۔

اس سلسلے میں ایک واضح ایکشن پلان تیار کیا گیا، جس میں درج ذیل نکات پر توجہ مرکوز کی گئی:

• ندی کے کم گہرے حصوں سے گاد  نکالنا
• ندی کے کناروں سے کوڑا کرکٹ اور ملبہ ہٹانا
• ندی کے کنارے خالی پڑی زمین کی پیمائش اور غیر قانونی تجاوزات کا خاتمہ
• دستیاب اراضی  پر پھل دار درخت لگانا

شجرکاری کی اس مہم سے نہ صرف ماحولیاتی بحالی میں مدد مل رہی ہے بلکہ یہ معاشی لحاظ سے بھی فائدہ مند ہے، کیونکہ پھل دار درختوں کی پیداوار کو متعلقہ گرام پنچایتیں استعمال میں لا سکتی ہیں۔

شرم دان اور عوامی بیداری کے ذریعے تبدیلی

نمامی گنگے کے تحت، اسٹیٹ مشن فار کلین گنگا اور ضلع گنگا کمیٹی کے ساتھ مل کر مربوط کوششیں کی گئیں تاکہ اس مہم کے مستقل نفاذ کو یقینی بنایا جاسکے۔ صفائی ستھرائی کی مہمات اور آگاہی پروگراموں نے اسکولی بچوں، نوجوانوں، خواتین کے سیلف ہیلپ گروپس، گرام پنچایتوں، رضاکار تنظیموں اور مقامی لوگوں کو متحرک کیا۔

شرم دان  کے ذریعے دریا کے کناروں اور گھاٹوں سے پلاسٹک، پولی تھین اور دیگر ٹھوس فضلہ ہٹایا گیا۔ صفائی ستھرائی کے عملے کو تعینات کیا گیا، اہم مقامات پر ڈسٹ بن لگائے گئے اور گیلے و خشک کچرے کو الگ کرنے اور اسے دریا میں پھینکنے سے روکنے کے لیے آگاہی مہم چلائی گئی۔

اس اقدام نے دریا کے کناروں پر ہونے والی مذہبی اور ثقافتی سرگرمیوں پر بھی مثبت اثر ڈالا ہے، جس سے اس بات کو یقینی بنایا گیا ہے کہ رسومات اور پوتر اشنان کے لیے آنے والے عقیدت مندوں کو ایک صاف ستھرا اور زیادہ منظم ماحول میسر آئے۔

ماحولیاتی فوائد اور ذریعۂ معاش میں تعاون

حکام اس بات پر زور دیتے ہیں کہ گنگا کے ایک معاون دریا کے طور پر، تمسا کی صفائی کو برقرار رکھنا گنگا کی پاکیزگی اور اس کے بلا تعطل بہاؤ کو یقینی بنانے کے لیے انتہائی ضروری ہے۔ مسلسل کوششوں کے نتیجے میں پانی کے معیار میں بہتری آئی ہے، حیاتیاتی تنوع  بحال ہوا ہے اور قریبی زرعی علاقوں میں مٹی کی زرخیزی اور آبپاشی کی صلاحیت میں اضافہ ہوا ہے۔

اعظم گڑھ کے ڈپٹی کمشنر (محنت و روزگار)، جناب رام ادریج یادو نے گرام پنچایتوں کے نمایاں کردار اور منریگاکے ساتھ اشتراکِ عمل کو اجاگر کیا۔ منتخب نمائندوں، منریگا کارکنوں اور کمیونٹی کے رضاکاروں نے مشترکہ طور پر گاد نکالنے، صفائی ستھرائی اور شجرکاری کی سرگرمیوں میں حصہ لیا، جس سے دریا کی بحالی کے اس عوامی شراکت داری کے ماڈل کو مزید تقویت ملی۔

معاون دریاؤں کے تحفظ کے لیے ایک مثالی ماڈل

دریائے تمسا کی بحالی یہ ثابت کرتی ہے کہ مستقل انتظامی عزم اور فعال عوامی شرکت کے ملاپ سے دریاؤں کے ماحولیاتی نظام کو کامیابی کے ساتھ بحال کیا جا سکتا ہے۔ یہ اقدام گنگا طاس  کے دیگر معاون اور چھوٹے دریاؤں کے تحفظ کے لیے ایک قابلِ تقلید مثال کے طور پر موجود ہے۔

تمسا اور گنگا کے دیگر معاون دریاؤں کے تحفظ اور ان کی باقاعدہ صفائی کی کوششیں نمامی گنگے کے تحت مشن موڈ میں جاری رہیں گی، جس سے ایک صاف ستھرے، صحت مند اور پائیدار دریائی نظام کے تصور کو مزید تقویت ملے گی۔

****

ش ح۔ک ح۔ ن ع

U. No. 3393

(ریلیز آئی ڈی: 2235596) وزیٹر کاؤنٹر : 18