U Myntri Sorkar Pdeng ba dei peit ïa ka Tnad Social Justice and Empowerment Dr. Virendra Kumar, u la bteng ia ka jingleit jurip jong u ia ka jylla Meghalaya da ka jingleit jngoh ia ki jaka bad ka jingialang peit bniah ha ka District ha nongbah Shillong, East Khasi Hills district mynta ka sngi.

U Myntri u la sdang ïa kane ka sngi da ka jingleit jngoh ïa ka Government Girls’ Higher Secondary School (PM Shri School), Police Bazar, Shillong, ha kaba u la ïakren bad ki samla pule bad ki nonghikai bad peit bniah ïa ki jingdonkam ba la pynwandur hapoh ka sienjam jong ka PM Shri. Ha ka jingiakren, u la kylli ia ki samla pule shaphang ki jingthmu jong ki ha ka jingim bad ki jingeh kiba ki iakynduh ha kaba bud ia ki thong jong ki. U la pynshlur ia ki khynnah skul ban bud ia ka jingtbit ha ka jingpule ryngkat bad ka jingkyntiew ia ka sap bad u la ai jingiaroh ia ki sienjam jong ki nonghikai ha kaba kyntiew ia ka pule puthi kaba pura bad kaba kynthup lang ia baroh.

U la leit jngoh ia ka Urban Primary Health Centre (UPHC) ha Mawpat bad u la peit ia ki jingshakri ban ai jingsumar ia ki nongpang kiba wan ha kane ka jaka, ki jingshakri ia ki longkmie ba pun khun bad ki khynnah, ki prokram ai dawai tika, bad ki kam ban wad ia ki jingpang. Ha ka jingiakren bad ki nongtrei bad ki briew kiba ioh jingmyntoi na kane ka jaka, u la ban jur halor ki jingshakri ban iada na ki jingpang bad ka jingpynthikna ia ka jingbteng khlem jingthut ia ki jingai jingshakri.

Ha ka Anganwadi Centre ha Mawdiangdiang, u Dr. Kumar u la bishar bniah ïa ki jingshakri ba ïadei bad ka jingbam kaba tei bad ka jingsumar ïa ki khynnah rit, u la peit bniah ïa ki kam ba dang shu sdang ban leit skul, bad u la ïakren bad ki nongtrei ka Anganwadi, ki khynnah bad ki longkmie. U la ban jur ia ka jingdonkam ia ka jingbam kaba tei ia ki khynnah bad ka jingiashim bynta jong ki paidbah ha kaba kyntiew ia ki dak jong ka koit ka khiah jong ki khynnah.

Ha ka jingleit jngoh jong u ïa ka New Hope De-addiction-cum-Counselling Centre, u Myntri u la bishar bniah ïa ki jaka ai jingsumar bad u la ïakren bad ki nongtrei bad ki nongïoh jingmyntoi. U la ai jingiaroh ia ki prokram ai jinghikai ban ioh kam kum ka kam shna tiar bad kiwei kiwei ki kam kiba pynshong nongrim ha ka jingtbit kiba la pynlong ha kane ka centre, da kaba ong ba ka jingai jinghikai kaba pynshong nongrim ha ka kamai kajih ka long kaba donkam na ka bynta ka jingai jingsumar kaba iaineh bad ka jingpyniasoh biang ha ka imlang sahlang.

U Myntri u la leit jngoh ruh ïa ki jaka ai jingsumar ia ki khynnah bad ka De-addiction Campus ha Mawkasiang, ha kaba u la jurip ïa ki jaka sah bad ki jaka ai jingiasyllok. U la ai jingiaroh ia ka jingkhuid jong kane ka jaka bad u la iaroh ia ka jingsumar ba aiti lut ha kaba la peit ia ki khynnah ha ka jinglong kaba shngain bad kaba ioh jingsumar.

Ha ka shnong Mawkasiang, u Dr. Kumar u la bishar bniah ïa ka jingpyntreikam ïa ka projek Jal Jeevan Mission bad u la ïakren bad ki nongshong shnong ha kaba ïadei bad ka jingsumar bad ka jinglong trai jong ka imlang sahlang ïa ki jingdon jingem ba iadei bad ka umbam umdih. Ha ka jingïakren, u la kren shaphang ka sienjam ba la sdang hapoh ka jingïalam ba iohi jngai jong u Narendra Modi bad u la ong ba kane ka skhim ka la kyntiew shikatdei ïa ka jingïoh ïa ka umdih kaba khuid bad kaba biang ha ki longïing ha ki jaka nongkyndong. Ki nongshong shnong ki la ïathuh kumno kane ka sienjam ka la ktah bha ïa ka jingim jong ki kaba man la ka sngi, khamtam eh ka la ai jingmyntoi ïa ki longkmie bad ki khynnah da kaba pynduna ïa ka por bad ka bor ba la pynlut ha ka jingleit tong um.

Ha ka por shiteng sngi, u la leit jngoh ïa ka Old Age Home ha Demthring bad u la ïakren bad ki riewtymmen kiba sah ha kane ka jaka bad ki nongtrei. U la iaroh ïa ka jingkhuid jingsuba bad ki jaka ba la pynbha bad u la ïaroh ïa ka jingsumar ba la ai sha ki riew tymmen, da kaba ban biang ïa ka jingkut jingmut jong ka Sorkar ban pynthikna ïa ka burom bad ka bha ka miat jong ki riewtymmen.

La pynkut ïa kane ka sngi da ka jingïalang peit bniah ïa ka District ha ka State Guest House, Shillong. Ha kane ka jingialang, u myntri u la bishar bniah ia ka jingiaid shaphrang jong ki skhim bapher bapher jong ka sorkar pdeng hapoh ka district. Ki ophisar jong ka tnad ki la pynshai ia u halor ka jinglong jingman jong ka jingpyntreikam ïa ki skhim kiba kynthup ïa ka Pradhan Mantri Awas Yojana, Pradhan Mantri Gram Sadak Yojana, Pradhan Mantri Krishi Sinchayee Yojana, Jal Jeevan Mission bad kiwei kiwei ki sienjam.

U Dr. Kumar u la kren sani halor ka jingpynkhlaiñ ïa ki lad kamai kajuh ha ki jaka nongkyndong hapoh ka Viksit Bharat Gram bad u la ban jur ïa ka jingpynbha ïa ki mar ba la shna da ki Self-Help Group (SHG) ban kyntiew ïa ka ïoh ka kot bad ka jingïasoh bad ki ïew ki hat. U la pdiang ba watla ki jingjop jong ka Jylla ha kaba pynduna ïa ka Maternal Mortality Rate (MMR) bad ka Infant Mortality Rate (IMR) ki long kiba sngewtynnad, hynrei donkam ïa ki sienjam kiba iaibteng ban kyntiew shuh shuh. U la ban jur ba dei ban kyntiew ia ka jingpyndonkam ia ka pisa hapoh ki skhim bapher bapher khnang ban pynthikna ia ka jingpyntreikam ha ka por kaba biang bad ka jingmih kaba bha tam.

Haba phai sha ki jingeh ba ki katto katne ki shnong ha Meghalaya ki ïakynduh namar ka jinglong ki jaka bad ka jingeh ha ka jingpynïasoh, u Myntri u la ïakren halor ka jingdonkam ban pynkhlaiñ ïa ki surok ha ki jaka nongkyndong hapoh ka Pradhan Mantri Gram Sadak Yojana bad ban kyntiew ïa ka jingpynlang um ban kyntiew ïa ka jingseisoh ha ka rep ka riang. U la ban jur ruh ia ka jingdonkam ban iatreilang ban weng ia ki jingeh kiba iadei bad ki briew kiba don jingduna ha ki dkhot met, da kaba ong ba yn pynkhlain ia ka jingiatreilang ha ka imlang sahlang bad ka jingiatreilang hapdeng ki tnad ban pynthikna ia ka jingpynbeit kaba paka ia ki jingeh bad ban kyntiew ia ka jingshakri.

Haba jubab ïa ki jingkylli jong ki lad pathai khubor hadien ka jingïalang, u Dr. Kumar u la pynshai ba ïa ki skhim jong ka Sorkar India la saindur na ka bynta ka ri baroh kawei bad la pyntreikam ha kylleng ki Jylla ha ryngkat ka jingïatreilang bad ki Sorkar Jylla. Lada don kino kino ki jingeh kiba shipor kiba mih ha ka jingpyntreikam, kynthup ïa ki mat kiba ïadei bad ka jingpyniasoh Aadhaar, la shim ïa ki sienjam ba ïatreilang ban pynbeit ïa ki khnang ba ki nongïoh jingmyntoi kin ïoh ïa ki jingmyntoi kiba ïaryngkat bad ka ri baroh kawei.

Haba kren shaphang ki jingeh ha kaba ïadei bad ki jingdih pynbuaid, u Myntri u la ong ba ïa ka jingma jong u drok ym lah ban ïakhun tang da ki sorkar bad ka donkam ïa ka jingïashim bynta lang jong ki kynhun ha ka imlang sahlang, ki kynhun niam, bad ki sengbhalang. U la ban jur ia ka jingiaid shaphrang jong ka Nasha Mukt Bharat Abhiyan, da kaba ong ia ka jingai jingtip ia ki paidbah kaba heh kaba la leh ha kylleng ka ri bad u la pynpaw ia ka jingsngew skhem ba ki sienjam jong baroh ha ka imlang sahlang kin wanhan ia ki jingmih kiba bha.

Ka jingleit jngoh jong u Myntri kadei shi bynta jong ka jingpeit jong ka Sorkar Pdeng ia ki jylla jong ka thaiñ Shatei Lammihngi, ha kaba ki Myntri Sorkar Pdeng ki ju peit bniah man ka por ïa ka jingïaid shaphrang jong ki skhim ba la kyrshan da ka sorkar pdeng ha ka jaka ba pyntreikam.

Haba ban jur ïa ka jingïatreilang hapdeng ka sorkar Pdeng bad ka Jylla, u Kumar u la ong ba ka rukom treikam jong ka ‘Sorkar kaba don ar tylli ki enjin’, da kaba thew ia ka jingïahap hapdeng ka sorkar pdeng bad ki sorkar Jylla — ka ïarap ban pynsted ïa ki sienjam pynroi ha Meghalaya.

U la kubur ïa ki sienjam jong ka sorkar Jylla hapoh ka jingialam jong u Myntri Rangbah Conrad K Sangma, da kaba ong ba katto katne ki kam kiba dei ban ioh jingïaroh ki dang ïaid shakhmat.

****

(Release ID: 2234786) visitor counter : 17