ریلوے پروٹیکشن فورس کے ذریعے منعقد کی گئی گورنمنٹ پولیس چیف کی آل انڈیا کانفرنس آج نئی دہلی کے وگیان بھون میں کامیابی کے ساتھ اختتام پذیر ہو گئی۔ اس اعلیٰ سطحی کانفرنس کی صدارت ڈائریکٹر جنرل، آر پی ایف، محترمہ سونالی مشرا نے کی، جس میں مختلف ریاستوں اور مرکز زیر انتظام علاقوں کی گورنمنٹ ریلوے پولیس (جی آر پی) کے ڈی جی پی، اے ڈی جی پی اور سینئر افسران نے شرکت کی۔ کانفرنس میں چیئرمین کم سی ای او، ریلوے بورڈ، جناب ستیش کمار سمیت ریلوے بورڈ کے اراکین بھی شریک ہوئے۔

مسافروں اور ریلوے بنیادی ڈھانچے کی سلامتی کو مضبوط بنانے کے لیے ایک مربوط لائحہ عمل اور طریقہ کار کا فریم ورک وضع کرنے کے مقصد سے جامع اور تعمیری گفتگو کی گئی۔ غور و خوض کے دوران جی آر پی اہلکاروں کے لیے بنیادی ڈھانچے کی سہولیات کو بہتر بنانے پر بھی توجہ مرکوز کی گئی۔ کانفرنس میں زیر بحث آنے والے امور سے مؤثر طور پر نمٹنے کے لیے قریبی ہم آہنگی اور مشترکہ کاوشوں کو فروغ دینے پر زور دیا گیا۔

کانفرنس کا انعقاد ابھرتے ہوئے سکیورٹی چیلنجوں کے پیش نظر مسافروں، ریلوے بنیادی ڈھانچے اور آپریشنوں کی سلامتی کو بہتر بنانے کے اقدامات پر بات چیت کے لیے کیا گیا تھا۔ بات چیت کے دوران اس امر کو تسلیم کیا گیا کہ انڈین ریلوے اپنی وسیع جغرافیائی وسعت، مسافروں کی بڑی تعداد اور اوپن ایکسس نظام کے باعث منظم جرائم، منشیات کی اسمگلنگ، توڑ پھوڑ، پتھراؤ اور ممکنہ تخریب کاری سمیت مختلف نوعیت کے خطرات سے دوچار رہتی ہے۔ کانفرنس کا مقصد ایک جامع سکیورٹی فریم ورک تیار کرنا تھا، جس میں ٹیکنالوجی، انٹیلی جنس، فیلڈ کوآرڈینیشن اور کمیونٹی کی حصے داری شامل ہو۔

کانفرنس میں ایف آر ایس پر مبنی سی سی ٹی وی کیمروں، اے آئی سے فعال ویڈیو اینالیٹکس اور ڈرون نگرانی جیسی جدید ٹیکنالوجی کے مؤثر استعمال پر زور دیا گیا۔ ڈائریکٹر جنرل/ریلوے پروٹیکشن فورس نے ان نئی تکنیکی سہولیات پر روشنی ڈالی جنہیں آر پی ایف اپنی فیلڈ کارروائیوں میں مجرموں کی بہتر شناخت اور جرائم کی نشاندہی کے لیے اپنا رہی ہے۔

کانفرنس کی ایک خاص بات منشیات کی اسمگلنگ کے خطرے پر قابو پانے کے لیے روڈ میپ پر بات چیت کرنا اور اس کی تیاری تھی، کیونکہ ریلوے نیٹ ورک منشیات اور نشہ آور اشیا کی ترسیل کے لیے حساس سمجھا جاتا ہے۔ نارکوٹکس کنٹرول بیورو کے ایک سینیئر افسر نے پریزنٹیشن پیش کی، جس میں منشیات کی اسمگلنگ میں ملوث گروہوں کے خلاف کارروائی کے لیے فعال نگرانی اور ریئل ٹائم انٹیلی جنس شیئرنگ کی اہمیت کو اجاگر کیا گیا۔

ہنگامی حالات میں تیاری اور مربوط ردِعمل کو یقینی بنانے کے لیے باقاعدہ موک ڈرل کو نہایت اہم قرار دیا گیا۔ ابتدائی ردِعمل، انخلا، ہجوم پر قابو پانے اور واقعہ کے مؤثر انتظام پر مبنی منظرنامہ پر مبنی تربیتی ماڈیول کی سفارش کی گئی۔ پتھراؤ اور تخریب کاری کے واقعات پر بھی تفصیلی گفتگو کی گئی، کیونکہ یہ مسافروں کی سلامتی اور ریلوے آپریشنوں کو متاثر کرتے ہیں۔ ڈائریکٹر جنرل، ریلوے پروٹیکشن فورس نے حساس علاقوں میں کمیونٹی آؤٹ ریچ اور آگاہی پروگراموں کی اہمیت پر زور دیا اور خلاف ورزی کرنے والوں کے خلاف سخت قانونی کارروائی کرنے اور روک تھام کے اقدامات کی ضرورت پر زور دیا۔

کانفرنس انڈین ریلوے کے سکیورٹی ڈھانچے کو مزید مضبوط بنانے کی جانب ایک اہم پیش رفت ثابت ہوئی۔ اس نے ریاستی پولیس فورسز اور ریلوے پروٹیکشن فورس کو ایک مشترکہ پلیٹ فارم فراہم کیا، جہاں انہوں نے اپنی حکمتِ عملیوں میں ہم آہنگی پیدا کی، آپریشنل تجربات کا تبادلہ کیا اور ریلوے بنیادی ڈھانچے کے تحفظ اور مسافروں کی سلامتی و تحفظ کو یقینی بنانے کے لیے مربوط طرزِ عمل اپنانے کے عزم کا اعادہ کیا۔ کانفرنس کے نتائج سے توقع ہے کہ ایک زیادہ مضبوط، مؤثر ردِعمل دینے والی اور ٹیکنالوجی سے لیس ریلوے سکیورٹی نظام کی تشکیل میں مدد ملے گی۔

*********

ش ح۔ ف ش ع

                                                                                                                                       U: 3006

(ریلیز آئی ڈی: 2232431) وزیٹر کاؤنٹر : 10