1. അസമിൽ വരാനിരിക്കുന്ന നിയമസഭാ തിരഞ്ഞെടുപ്പിന്റെ മുന്നൊരുക്കങ്ങൾ കേന്ദ്ര മുഖ്യ തിരഞ്ഞെടുപ്പ് കമ്മീഷണർ ശ്രീ ജ്ഞാനേഷ് കുമാർ, തിരഞ്ഞെടുപ്പ് കമ്മീഷണർമാരായ ഡോ. സുഖ്ബീർ സിംഗ് സന്ധു, ഡോ. വിവേക് ​​ജോഷി എന്നിവർ ചേർന്ന് ഇന്ന് ഗുവാഹത്തിയിൽ വിശദമായി അവലോകനം ചെയ്തു.

2. ഫെബ്രുവരി 17, 18 തീയതികളിലായി നടക്കുന്ന സന്ദർശനത്തിന്റെ ആദ്യ ദിനം, അംഗീകൃത ദേശീയ-സംസ്ഥാന രാഷ്ട്രീയ പാർട്ടികളായ ആം ആദ്മി പാർട്ടി, ഭാരതീയ ജനതാ പാർട്ടി, കമ്മ്യൂണിസ്റ്റ് പാർട്ടി ഓഫ് ഇന്ത്യ (മാർക്സിസ്റ്റ്), ഇന്ത്യൻ നാഷണൽ കോൺഗ്രസ്, ഓൾ ഇന്ത്യ യുണൈറ്റഡ് ഡെമോക്രാറ്റിക് ഫ്രണ്ട്, അസം ഗണ പരിഷത്ത്, യുണൈറ്റഡ് പീപ്പിൾസ് പാർട്ടി ലിബറൽ, ബോഡോലാൻഡ് പീപ്പിൾസ് ഫ്രണ്ട് എന്നിവയുടെ പ്രതിനിധികളുമായി കമ്മീഷൻ സംവദിക്കുകയും നിർദ്ദേശങ്ങൾ ആരായുകയും ചെയ്തു.

3. സംസ്ഥാനത്ത് വരാനിരിക്കുന്ന തിരഞ്ഞെടുപ്പ് സുതാര്യവും നിഷ്പക്ഷവുമായ രീതിയിൽ നടക്കുന്നുണ്ടെന്ന് ഉറപ്പാക്കുന്നതിനായി  അഭിപ്രായങ്ങളും ആശങ്കകളും നിർദ്ദേശങ്ങളും അവതരിപ്പിക്കാൻ അവസരം നൽകിക്കൊണ്ട് കമ്മീഷൻ ഓരോ രാഷ്ട്രീയ പാർട്ടികളുമായും ആശയവിനിമയം നടത്തി.

4. തിരഞ്ഞെടുപ്പ് ഒറ്റഘട്ടമായോ പരമാവധി രണ്ട് ഘട്ടങ്ങളായോ നടത്തണമെന്ന് ഭൂരിഭാഗം രാഷ്ട്രീയ പാർട്ടികളും അഭ്യർത്ഥിച്ചു. ബിഹു ഉത്സവം കണക്കിലെടുത്ത് തിരഞ്ഞെടുപ്പ് തീയതികൾ നിശ്ചയിക്കണമെന്ന ആവശ്യവും രാഷ്ട്രീയ പാർട്ടികൾ മുന്നോട്ടുവെച്ചു.

5. അസമിലെ വോട്ടർ പട്ടികയുടെ പ്രത്യേക പരിഷ്കരണ പ്രക്രിയയെ രാഷ്ട്രീയ പാർട്ടികൾ പൊതുവെ അഭിനന്ദിച്ചു.

6. സംസ്ഥാനത്ത് സമാധാനപരമായ തിരഞ്ഞെടുപ്പ് ഉറപ്പാക്കുന്നതിനുള്ള നിർദ്ദേശങ്ങളും പാർട്ടികൾ മുന്നോട്ടുവെച്ചു.

7. രാഷ്ട്രീയ പാർട്ടികളുമായുള്ള ആശയവിനിമയത്തിന് ശേഷം, തിരഞ്ഞെടുപ്പ് ആസൂത്രണം, ഇ.വി.എം (EVM) മാനേജ്‌മെന്റ്, ലോജിസ്റ്റിക്‌സ്, തിരഞ്ഞെടുപ്പ് ഉദ്യോഗസ്ഥരുടെ പരിശീലനം, പിടിച്ചെടുക്കലുകൾ, ക്രമസമാധാനം, വോട്ടർ ബോധവൽക്കരണ പ്രവർത്തനങ്ങൾ എന്നിവയുടെ എല്ലാ വശങ്ങളെക്കുറിച്ചും ഐ.ജിമാർ, ഡി.ഐ.ജിമാർ, ഡി.ഇ.ഒമാർ, എസ്.എസ്.പിമാർ എന്നിവരുമായി കമ്മീഷൻ വിശദമായ അവലോകനം നടത്തി.

8. ഭരണഘടനയ്ക്കും പ്രസക്തമായ നിയമങ്ങൾക്കും തിരഞ്ഞെടുപ്പ് കമ്മീഷന്റെ നിർദ്ദേശങ്ങൾക്കും അനുസൃതമായി മാത്രമേ തിരഞ്ഞെടുപ്പ് നടത്താവൂ എന്ന് മുഖ്യ തിരഞ്ഞെടുപ്പ് കമ്മീഷണർ ശ്രീ ജ്ഞാനേഷ് കുമാർ അടിവരയിട്ടു.

9. പൂർണ്ണ നിഷ്പക്ഷതയോടെ പ്രവർത്തിക്കാനും രാഷ്ട്രീയ പാർട്ടികളുടെ പരാതികൾക്കും ആക്ഷേപങ്ങൾക്കും ഉടനടി പരിഹാരം ഉറപ്പാക്കാനും എല്ലാ ജില്ലാ തിരഞ്ഞെടുപ്പ് ഓഫീസർമാർക്കും, എസ്.എസ്.പിമാർക്കും, സംസ്ഥാന ഭരണകൂടത്തിനും  കമ്മീഷൻ നിർദ്ദേശം നൽകി.

10. വോട്ടെടുപ്പ് കേന്ദ്രങ്ങൾ ഉത്സവപ്രതീതിയുള്ളതും സ്വാഗതാർഹവും വോട്ടർ സൗഹൃദവുമാക്കുന്നതിലൂടെ വോട്ടർമാർക്ക് സന്തോഷകരമായ അനുഭവം സൃഷ്ടിക്കാൻ ശ്രമിക്കണമെന്നും കമ്മീഷൻ നിർദ്ദേശിച്ചു.

11. വ്യാജവാർത്തകൾ സംബന്ധിച്ച് സമൂഹ മാധ്യമങ്ങൾ  നിരീക്ഷിക്കാനും ആവശ്യമെങ്കിൽ ഉചിതമായ നിയമനടപടികൾ അതിവേഗം സ്വീകരിക്കാനും എല്ലാ ഡി.ഇ.ഒമാർക്കും എസ്.പിമാർക്കും കമ്മീഷൻ നിർദ്ദേശം നൽകി.

-AT-

( റിലീസ് ഐ.ഡി: 2229510) സന്ദര്‍ശക കൗണ്ടര്‍ : 7