وزارتِ ہنرمندی کی ترقی اور صنعت کاری (ایم ایس ڈی ای) نئی دہلی میں منعقد ہونے والے انڈیا اے آئی امپیکٹ سمٹ 2026 میں شرکت کرے گی، جہاں وزارت کی جانب سے ایک خصوصی پویلین قائم کیا جائے گا جو ’’شمولیتی ترقی کے لیے مصنوعی ذہانت‘‘ کے ویژن پر مبنی ہوگا۔ اس کے ذریعے ہنرمندی کو بھارت کے مصنوعی ذہانت کے سفر کے مرکز میں رکھا جائے گا۔ چونکہ یہ سمٹ عالمی رہنماؤں، پالیسی سازوں اور ٹیکنالوجی کے علمبرداروں کو یکجا کر رہا ہے اور اسے عالمی جنوب میں مصنوعی ذہانت کی سب سے بڑی نشستوں میں سے ایک کے طور پر تسلیم کیا جا رہا ہے، اس لیے ایم ایس ڈی ای کی موجودگی اس عزم کو نمایاں کرے گی کہ بھارت مصنوعی ذہانت کو روزگار اور معاشی استحکام مضبوط کرنے کے لیے استعمال کرے گا، نہ کہ لوگوں کے روزگار ختم کرنے کے لیے۔

سمٹ کا خیر مقدم کرتے ہوئے جناب جینت چودھری وزیرِ مملکت (آزادانہ چارج) برائے ہنرمندی کی ترقی و صنعت کاری اور وزیرِ مملکت برائے تعلیم، حکومتِ ہند نے کہا: ’’عالمی جنوب میں مصنوعی ذہانت کے سب سے بڑے سمٹس میں سے ایک کی میزبانی بھارت کے اس عزم کی عکاس ہے کہ ہم ذمہ دار اور شمولیتی مصنوعی ذہانت کے مستقبل کی تشکیل کریں۔ میں عالمی شراکت داروں کے ساتھ بامعنی تبادلۂ خیال کا منتظر ہوں اور یہ دکھانے کے لیے بھی پُرعزم ہوں کہ بھارت کس طرح اپنے نوجوانوں اور افرادی قوت کو مصنوعی ذہانت کے لیے موزوں مہارتوں سے آراستہ کر رہا ہے، جو سب کے لیے ترقی اور مواقع پیدا کرتی ہیں۔‘‘

ایم ایس ڈی ای کا پویلین اس ویژن کو عملی شکل دے گا، جس کے لیے ایک جامع خاکہ تیار کیا گیا ہے جو مصنوعی ذہانت میں ہنرمندی، مصنوعی ذہانت کے ذریعے ہنرمندی اور مصنوعی ذہانت کے لیے ہنرمندی کے گرد قائم ہے۔ مصنوعی ذہانت میں ہنرمندی کا مقصد مصنوعی ذہانت میں بنیادی اور اعلیٰ درجے کی صلاحیتیں پیدا کرنا ہوگا۔ اس کے لیے ایسے اقدامات شامل ہیں جیسے ایس او اے آر (مصنوعی ذہانت کے لیے تیاری کی ہنرمندی)، قومی ہنرمندی اہلیتی فریم ورک کے مطابق نئے ابھرتے ہوئے روزگار سے متعلق کردار اور صنعت کے اشتراک سے فراہم کی جانے والی قلیل مدت کی نینو اسناد۔ پویلین میں آنے والے افراد خرد تعلیم کے ماڈیولز، براہِ راست ڈیش بورڈز اور باہمی تعامل پر مبنی تنصیبات کا مشاہدہ کر سکیں گے، جو یہ دکھائیں گی کہ مصنوعی ذہانت کی بنیادی سمجھ کو مختلف عمر اور پس منظر کے لوگوں تک عام کیا جا سکتا ہے اور سیکھنے والوں کو مصنوعی ذہانت سے معاون پیشوں کی طرف منتقل ہونے میں مدد دی جا سکتی ہے۔

مصنوعی ذہانت کے ذریعے ہنرمندی کے حصے میں یہ نمایاں کیا جائے گا کہ مصنوعی ذہانت خود ہنرمندی کی فراہمی اور اس کے نظم و نسق کو کس طرح بدل رہی ہے۔ مصنوعی ذہانت پر مبنی نظام، جیسے اسکل انڈیا اسسٹنٹ، سیکھنے والوں کی قابلیت اور دلچسپیوں کے مطابق انہیں پیشہ ورانہ راستوں کی رہنمائی فراہم کریں گے، جبکہ اسکل انڈیا ڈیجیٹل ہب کے ساتھ مربوط سفارشاتی نظام مختلف شعبوں میں کورسز کی تجاویز کو ذاتی نوعیت دے گا۔ مصنوعی ذہانت سے مدد یافتہ نگرانی اور جانچ کے آلات، جن میں کمپیوٹر ویژن کی بنیاد پر عملی جانچ بھی شامل ہے، یہ دکھائیں گے کہ ٹیکنالوجی کس طرح ہنرمندی کی سند کے عمل میں شفافیت، کارکردگی اور اعتبار میں اضافہ کر سکتی ہے۔ مجموعی طور پر یہ جدتیں واضح کریں گی کہ بہتر نتائج، زیادہ رسائی اور اعلیٰ معیار کے لیے مصنوعی ذہانت کو ہنرمندی کے نظام میں کس طرح شامل کیا جا رہا ہے۔

مصنوعی ذہانت کے لیے ہنرمندی اس معیشت میں افرادی قوت کی تیاری سے متعلق ہوگی جہاں مصنوعی ذہانت تیزی سے پیداواریت میں اضافہ کر رہی ہے۔ کھیل نما عملی مظاہروں اور حقیقی زندگی سے جڑے کرداروں کے ذریعے پویلین یہ دکھائے گا کہ کسان مصنوعی ذہانت پر مبنی مشاورتی نظاموں سے فائدہ اٹھا سکتے ہیں، الیکٹریشن مصنوعی ذہانت سے مدد یافتہ ایپلی کیشنز کے ذریعے خرابیوں کی تشخیص کر سکتے ہیں، تعمیراتی مزدور کام کی جگہ پر کثیر لسانی مصنوعی ذہانت پر مبنی تعلیمی معاونت حاصل کر سکتے ہیں اور بُنکر مصنوعی ذہانت کے آلات کے ذریعے اپنی ضرورت کے مطابق ڈیزائن مشترکہ طور پر تیار کر سکتے ہیں۔ یہ مثالیں اس پیغام کو مزید مضبوط کریں گی کہ مصنوعی ذہانت صرف پروگرامنگ کرنے والوں یا بڑی صنعتوں تک محدود نہیں، یہ بھارت کی غیر رسمی اور محنت کش افرادی قوت کے لیے بھی پیداواریت اور آمدنی میں اضافہ کر سکتی ہے۔

سمٹ کے ضمن میں وزیر عالمی ٹیکنالوجی رہنماؤں، تعلیمی اداروں اور صنعتی شراکت داروں کے ساتھ متعدد ملاقاتیں کریں گے تاکہ مصنوعی ذہانت میں ہنرمندی اور ڈیجیٹل شمولیت کے شعبے میں تعاون کو مزید مضبوط کیا جا سکے۔

جناب جینت چودھری 17 فروری کو ایم ایس ڈی ای پویلین کا دورہ کرنے والے ہیں، جہاں وہ تنصیبات کا جائزہ لیں گے، نوجوان شرکاء سے بات چیت کریں گے اور ان فریقوں سے تبادلۂ خیال کریں گے جو مصنوعی ذہانت سے مدد یافتہ ہنرمندی کے حل پیش کر رہے ہیں۔

انڈیا اے آئی امپیکٹ سمٹ 2026 میں شرکت کے ذریعے ایم ایس ڈی ای اپنے اس عزم کا اعادہ کرتی ہے کہ بھارت میں مصنوعی ذہانت کی تبدیلی انسان مرکز، شمولیتی اور روزگار پر مبنی ہو، اور یہ اس وسیع تر ،ویژن کے مطابق ہو جس کے تحت ایک ترقی یافتہ بھارت کی تعمیر مقصود ہے، جہاں ٹیکنالوجی مواقع میں اضافہ کرے اور ملک کے آبادیاتی سرمایے کو مزید مضبوط بنائے۔

******

ش ح۔ ش ا ر۔ ول

Uno-2495

(ریلیز آئی ڈی: 2228439) وزیٹر کاؤنٹر : 12