حکومت ملک میں متبادل تنازعات کے حل (اے ڈی آر) کے طریقۂ کار، بشمول ثالثی اور مصالحت، کو مسلسل فروغ دے رہی ہے، کیونکہ یہ طریقے کم تصادمی ہوتے ہیں اور تنازعات کے حل کے روایتی طریقوں کے مقابلے میں بہتر متبادل فراہم کرنے کی صلاحیت رکھتے ہیں۔ حکومت ان طریقۂ کار کو مزید مضبوط بنانے اور انہیں زیادہ مؤثر اور تیز رفتار بنانے کے لیے پالیسی اور قانون سازی سے متعلق اقدامات بھی کر رہی ہے۔

اس سلسلے میں گزشتہ برسوں کے دوران مرکزی حکومت کی جانب سے کیے گئے بڑے اقدامات، اقداماتِ کار اور تدابیر میں ثالثی اور مصالحت ایکٹ 1996 کے حوالے سے اصلاحات شامل ہیں، جس میں ثالثی کے شعبے میں موجودہ پیش رفت کے مطابق ہم آہنگی پیدا کرنے اور ثالثی کو تنازعات کے حل کے ایک قابلِ عمل طریقہ کے طور پر مؤثر بنانے کے لیے 2015، 2019 اور 2020 میں بتدریج ترامیم کی گئی ہیں۔ ان ترامیم کا مقصد ثالثی کی کارروائی بروقت مکمل کرنا، ثالثوں کی غیر جانب داری کو یقینی بنانا، ثالثی کے عمل میں عدالتی مداخلت کو کم سے کم کرنا، ثالثی فیصلوں کے مؤثر نفاذ کو یقینی بنانا، اور ادارہ جاتی ثالثی کو فروغ دینا ہے۔

کمرشل عدالتوں ایکٹ 2015 میں بھی 2018 میں ترمیم کی گئی، جس کے تحت دیگر امور کے ساتھ ساتھ قبل از ادارہ جاتی مصالحت اور تصفیہ (پی آئی ایم ایس) کا طریقۂ کار فراہم کیا گیا۔ اس طریقۂ کار کے تحت، اگر مقررہ مالیت کا کوئی تجارتی تنازع ایسا ہو جس میں فوری عبوری ریلیف درکار نہ ہو تو فریقین کو عدالت سے رجوع کرنے سے پہلے لازمی طور پر پی آئی ایم ایس کے ذریعے دستیاب علاج استعمال کرنا ہوگا۔ اس کا مقصد فریقین کو مصالحت کے ذریعے تجارتی تنازعات حل کرنے کا موقع فراہم کرنا ہے۔

بھارت بین الاقوامی ثالثی مرکز ایکٹ، 2019 اس مقصد کے لیے نافذ کیا گیا کہ بھارت بین الاقوامی ثالثی مرکز قائم کیا جا سکے تاکہ ادارہ جاتی ثالثی کو سہولت فراہم کرنے کے لیے ایک آزاد، خود مختار اور عالمی معیار کا ادارہ تشکیل دیا جا سکے اور مرکز کو قومی اہمیت کا ادارہ قرار دیا جا سکے۔ اس کے بعد مرکز قائم کر دیا گیا ہے اور اس کا مقصد ملکی اور بین الاقوامی، دونوں سطحوں پر فریقین میں اعتماد پیدا کرنا ہے تاکہ ثالثی کے ذریعے تجارتی تنازعات کے حل کے لیے ایک غیر جانب دار پلیٹ فارم فراہم کیا جا سکے۔

مصالحت ایکٹ 2023 مصالحت کے لیے قانونی ڈھانچہ فراہم کرتا ہے جسے تنازع میں شامل فریقین اختیار کر سکتے ہیں، خصوصاً ادارہ جاتی مصالحت کی سرپرستی میں۔ توقع ہے کہ مصالحت ایکٹ، 2023 مصالحت کے لیے ایک مستقل اور علیحدہ قانون فراہم کرنے اور عدالت سے باہر دوستانہ تصفیے کی ثقافت کو فروغ دینے کے لیے ایک نہایت اہم قانون سازی اقدام ثابت ہوگا۔

لوک عدالتیں ملک بھر میں قانونی خدمات اتھارٹیز ایکٹ، 1987 کی دفعات اور قومی قانونی خدمات اتھارٹی (لوک عدالتیں) ضوابط، 2009 کے تحت منعقد کی جاتی ہیں، اور ان میں وہ موضوعات شامل ہوتے ہیں جو مذکورہ ایکٹ اور ضوابط میں طے کیے گئے ہیں، نیز یہ عدالتوں اور ٹریبونلز میں منعقد ہوتی ہیں جیسا کہ مذکورہ ایکٹ کی دفعہ 2 (اے اے اے) میں تعریف کی گئی ہے۔ لوک عدالتوں میں عدالت میں زیرِ التوا مقدمات یا مقدمہ دائر ہونے سے پہلے کے مرحلے پر موجود معاملات کو باہمی رضامندی سے خوش اسلوبی کے ساتھ نمٹانے کی کوشش کی جاتی ہے۔ قانونی خدمات اتھارٹیز ایکٹ، 1987 کے تحت لوک عدالت کو قانونی حیثیت دی گئی ہے، جس سے اسے انصاف کی فراہمی کے ایک تیز تر، کم خرچ اور مؤثر نظام کے طور پر تسلیم کیا گیا ہے۔ لوک عدالت کی جانب سے دیا گیا فیصلہ دیوانی عدالت کے فرمان کے مترادف سمجھا جاتا ہے اور تمام فریقین کے لیے حتمی اور پابند ہوتا ہے، اور اس فیصلے کے خلاف کسی بھی عدالت میں اپیل نہیں کی جا سکتی۔

یہ معلومات آج لوک سبھا میں وزارتِ قانون و انصاف کے وزیرِ مملکت (آزادانہ چارج) اور وزارتِ پارلیمانی امور کے وزیرِ مملکت جناب ارجن رام میگھوال نے فراہم کیں۔

******

ش ح۔ ش ا ر۔ ول

Uno-2425

(ریلیز آئی ڈی: 2227845) وزیٹر کاؤنٹر : 10