ابتدائی بچپن کی دیکھ بھال اور تعلیم (ای سی سی ای) مشن سکشَم آنگن واڑی اور پوشن 2.0 (پوشن 2.0) کے تحت مربوط انداز میں فراہم کی جانے والی چھ خدمات میں سے ایک ہے۔

نیشنل ارلی چائلڈ ہڈ کیئر اینڈ ایجوکیشن (ای سی سی ای) پالیسی، 2013 ای سی سی ای کو ترجیحی توجہ دینے کی ضرورت پر زور دیتی ہے، کیونکہ یہ زندگی بھر کی نشوونما اور سیکھنے کے لیے ایک ناگزیر بنیاد فراہم کرتی ہے اور بچپن کی ابتدائی ترقی پر اس کے دیرپا اثرات مرتب ہوتے ہیں۔ یہ پالیسی ای سی سی ای کو متعدد محرومیوں کے نسل در نسل چکر کو توڑنے اور عدم مساوات کے خاتمے کا سب سے زیادہ مؤثر اور کم لاگت ذریعہ تسلیم کرتی ہے، جس کے نتیجے میں طویل المدتی سماجی اور معاشی فوائد حاصل ہوتے ہیں۔ قومی تعلیمی پالیسی (این ای پی) 2020 بھی بچے کی ابتدائی برسوں میں مناسب تحرک اور نگہداشت کی اہمیت پر زور دیتی ہے، تاکہ زندگی کے لیے مضبوط بنیاد قائم کی جا سکے۔

این ای پی 2020 کے وژن کے مطابق، حکومتِ ہند نے اکتوبر 2022 میں نیشنل کریکیولم فریم ورک فار فاؤنڈیشن اسٹیج (این سی ایف–ایف ایس) کا اجرا کیا، جو نصاب، اساتذہ کی تربیت، سیکھنے اور تدریس کے مواد (ایل ٹی ایم) وغیرہ کے لیے ایک جامع فریم ورک فراہم کرتا ہے۔ یہ بھارت میں 3 تا 8 سال کی عمر کے بچوں کے لیے پہلا مربوط نصابی فریم ورک ہے۔

6 سال تک کی عمر کے بچوں کی ہمہ جہتی ترقی کو یقینی بنانے کے لیے ملک میں ای سی سی ای کو مضبوط بنانے کی غرض سے وزارت کی جانب سے کیے گئے اہم اقدامات درج ذیل ہیں:

• نوچیتن: تین سال تک کی عمر کے بچوں کے لیے ابتدائی بچپن کی تحریک کا قومی فریم ورک، جس کا آغاز مارچ 2024 میں کیا گیا۔ اس کا مقصد بچوں کی نشوونما کی نگہداشت اور تحرک سے متعلق نظری اور عملی خلا کو پُر کرنا ہے۔ یہ فریم ورک نگہداشت کرنے والوں اور آنگن واڑی کارکنوں (اے ڈبلیو ڈبلیو) کو ذمہ دارانہ نگہداشت کے ذریعے بچوں کی جامع ابتدائی تحریک کے لیے بااختیار بناتا ہے۔
• آدرشیلا: تین سے چھ سال کی عمر کے بچوں کے لیے ای سی سی ای کا قومی نصاب، جسے مارچ 2024 میں متعارف کرایا گیا، تاکہ جسمانی، ذہنی، سماجی اور جذباتی پہلوؤں میں ہمہ گیر ترقی کو یقینی بنایا جا سکے۔ آدرشیلا آنگن واڑی مراکز میں ابتدائی تعلیم کے معیار کو بہتر بناتی ہے اور اہلیت پر مبنی اسباق و سرگرمیوں پر زور دیتی ہے، جو سیکھنے کے تمام شعبوں کا احاطہ کرتی ہیں۔
• پوشن بھی، پڑھائی بھی (پی بی پی بی): یہ پہل 10 مئی 2023 کو شروع کی گئی، جس کا مقصد تمام آنگن واڑی کارکنوں کی مہارتوں کو اپ گریڈ کرنا ہے تاکہ وہ دیویانگ بچوں سمیت چھ سال سے کم عمر بچوں کو ای سی سی ای اور غذائیت کی خدمات مؤثر طور پر فراہم کر سکیں۔ تربیتی پروگرام کے پہلے مرحلے میں 3 فروری 2026 تک 41,645 ریاستی سطح کے ماسٹر ٹرینرز (ایس ایل ایم ٹی) اور 10,05,756 آنگن واڑی کارکنوں کو تربیت دی جا چکی ہے۔
• حاملہ خواتین اور دودھ پلانے والی ماؤں (پی ڈبلیو ایل ایم) اور 6 ماہ تا 6 سال کی عمر کے بچوں کے لیے اضافی غذائیت پروگرام (ایس این پی) کے تحت غذائی معاونت فراہم کی جاتی ہے۔
• ہر آنگن واڑی مرکز کے لیے پری اسکول ایجوکیشن (پی ایس ای) کٹس کی مد میں سالانہ 3,000 روپے کی فراہمی کا انتظام کیا گیا ہے، جن میں ثقافتی طور پر موزوں اور کم لاگت کھلونے شامل ہیں۔
• پوشن ٹریکر کے ذریعے روزانہ سیکھنے کے اشاریے، جن میں 249 سے زائد ویڈیوز، 190 وائس نوٹس اور 3 تا 6 سال کے بچوں کے لیے 1,000 سے زیادہ سرگرمیوں کی پی ڈی ایف شامل ہیں، آنگن واڑی کارکنوں کو ڈیجیٹل طور پر فراہم کیے جاتے ہیں۔
• 0 تا 3 سال کی عمر کے بچوں کے لیے 14 ویڈیوز پر مشتمل 140 سرگرمیاں تیار کی گئی ہیں، تاکہ گھریلو دوروں اور نگہداشت کرنے والوں کی شمولیت کو مؤثر بنایا جا سکے۔
• آنگن واڑی سے جماعت اوّل میں ہموار منتقلی کے لیے ’ودیا رامبھ‘ ای سی سی ای سرٹیفکیٹ متعارف کرایا گیا ہے۔
• والدین کی شمولیت اور کمیونٹی کی شرکت کو فروغ دینے کے لیے آنگن واڑی مراکز میں ہر ماہ ای سی سی ای ڈے منایا جا رہا ہے۔

 

وزارت نے وزارتِ تعلیم کے محکمۂ اسکولی تعلیم و خواندگی (ڈی او ایس ای ایل) کے ساتھ ہم آہنگی کو مضبوط کیا ہے۔ سرکاری پرائمری اسکولوں کے اندر آنگن واڑی مراکز کے انضمام کے لیے رہنما خطوط 3 ستمبر 2025 کو جاری کیے گئے۔ اس وقت ملک بھر کے سرکاری اسکولوں میں تقریباً 2.9 لاکھ آنگن واڑی مراکز مشترکہ طور پر قائم ہیں۔

ڈی او ایس ای ایل، مرکزی اسپانسر شدہ سمگر شکشا اسکیم کے تحت سرکاری اسکولوں میں پری پرائمری طلبہ کے لیے بنیادی ڈھانچے اور سہولیات کی فراہمی میں معاونت کرتا ہے، جس میں بچوں کے لیے دوستانہ فرنیچر، بالا (بلڈنگ ایز لرننگ ایڈز) خصوصیات، بیرونی کھیلوں کی سرگرمیوں کے لیے فنڈز، اساتذہ کی صلاحیت سازی اور تدریسی و تعلیمی مواد (ٹی ایل ایم) شامل ہیں۔

پوشن ٹریکر (موبائل پر مبنی ایپلی کیشن) پر 3 تا 6 سال کے بچوں کے لیے خودکار پرمننٹ اکیڈمک اکاؤنٹ رجسٹری (اے پی اے آر) اور 0 تا 6 سال کے بچوں کے لیے آیوشمان بھارت ہیلتھ اکاؤنٹ (اے بی ایچ اے) آئی ڈی بنانے کا انتظام فعال کر دیا گیا ہے۔

گھر پر مبنی نوزائیدہ نگہداشت (ایچ بی این سی) اور گھر پر مبنی چھوٹے بچوں کی نگہداشت (ایچ بی وائی سی) پروگرام کے تحت، آشا (ایکریڈیٹڈ سوشل ہیلتھ ایکٹیوسٹ) کمیونٹی میں منظم گھریلو دورے کرتی ہیں، تاکہ صحت، غذائیت اور ابتدائی بچپن کی نشوونما کے فروغ پر مرکوز بچوں کی پرورش کے طریقوں کو بہتر بنایا جا سکے۔

یہ معلومات خواتین اور بچوں کی ترقی کی مرکزی وزیر، محترمہ انپورنا دیوی نے آج لوک سبھا میں ایک سوال کے تحریری جواب میں فراہم کیں۔

 

***

UR-1842

(ش ح۔اس ک  )

 

(ریلیز آئی ڈی: 2224701) وزیٹر کاؤنٹر : 4