سائنس اور ٹیکنالوجی اور ارضیاتی سائنسز کے مرکزی وزیر مملکت (آزادانہ چارج) نیز  وزیرِ اعظم کے دفتر ، ایٹمی توانائی کے محکمے ، خلاء کے محکمے ، عملہ ، عوامی شکایات اور پنشن کے وزیر مملکت ڈاکٹر جتیندر سنگھ نے آج کہا کہ مرکزی بجٹ 27-2026 ء  بھارت  کے مستقبل کی تشکیل کے لیے ٹیکنالوجی پر مبنی اے آئی سے مربوط ڈھانچہ جاتی اصلاحات کو آگے بڑھاتا ہے اور  موجودہ صدی کی دوسری چوتھائی کے لیے مستقبل پر مبنی ایک روڈ میپ پیش کرتا ہے ۔

سائنس اور ٹیکنالوجی کی وزارت کے زیر اہتمام بجٹ کے بعد کی بات چیت میں میڈیا سے خطاب کرتے ہوئے ، وزیر موصوف نے کہا کہ بجٹ کو مکمل طور پر سراہا جانے میں وقت لگ سکتا ہے ، لیکن یہ ایک واضح ، ترتیب وار نظریے کی عکاسی کرتا ہے ، جہاں ڈھانچہ جاتی اصلاحات جدید ترین ٹیکنالوجیز سے عبارت  ہیں اور جدید ترین ٹیکنالوجیز تیزی سے مصنوعی ذہانت  پر مبنی ہیں ۔ انہوں نے کہا کہ یہ بجٹ کو فطری طور پر مستقبل پر مبنی بناتا ہے اور  اس  سلسلے  میں شہریوں کو اس کے طویل مدتی فوائد سے آگاہ کرنے کی ذمہ داری میڈیا سمیت باخبر متعلقہ فریقوں پر عائد ہوتی ہے ۔

ڈاکٹر جتیندر سنگھ نے متوسط طبقے کے لیے فوائد سے متعلق خدشات کو دور کرتے ہوئے کہا کہ بجٹ کا اصل اثر قلیل مدتی آمدنی کے حساب کے بجائے صحت خدمات اور بڑھتے ہوئے اخراجات سے طویل مدتی راحت میں مضمر ہے ۔ انہوں نے کہا کہ بایوفرما ، جانچ ، ویکسین اور جین پر مبنی علاج میں بڑے پیمانے پر سرمایہ کاری کینسر ، ذیابیطس اور میٹابولک عوارض جیسی مہلک بیماریوں سے لڑنے والے کنبوں  کے مالی بوجھ کو نمایاں طور پر کم کرے گی ۔

بھارت میں صحت کے بڑھتے ہوئے چیلنجوں کو اجاگر کرتے ہوئے ، وزیر موصوف نے کہا کہ ملک میں 11-12 کروڑ سے زیادہ ذیابیطس کے مریض ، تقریباً 14 کروڑ پری ذیابیطس کے مریض  اور کینسر کے تیزی سے بڑھتے ہوئے واقعات ہیں ، جن کا  2030 ء تک سالانہ 20 لاکھ کیسوں  تک پہنچ جانے کا تخمینہ  ہے ۔ انہوں نے کہا کہ سستی دوائیں ، ویکسین اور جانچ ، جو گھریلو بایو مینوفیکچرنگ کی مدد سے  حاصل ہیں ، خاص طور پر متوسط طبقے اور کمزور طبقات کے لیے ایک بڑی سماجی اور معاشی مدد  ثابت ہوگی ۔

10000  کروڑ روپے کی بایوفرما شکتی پہل کا ذکر کرتے ہوئے  ، ڈاکٹر جتیندر سنگھ نے کہا کہ بھارت پہلے ہی عالمی سطح پر بایو مینوفیکچرنگ کے مرکز کے طور پر ابھرا ہے ، جو عالمی سطح پر اور  بھارت - بحرالکاہل  خطے میں اعلیٰ حیاتیاتی معیشتوں میں شامل ہے ۔ انہوں نے کہا کہ نئے اخراجات ، حیاتیات ، بایوسیملرز ، ویکسین ، طبی آلات اور جین پر مبنی ٹیکنالوجیز میں صلاحیتوں  میں اضافہ کرکے  ، ملک کی پوزیشن کو مزید  بہتر  کریں گے  ۔

وزیر موصوف نے بایو ٹیکنالوجی کو اگلے بڑے صنعتی محرک کے طور پر بیان کیا ، جس کا موازنہ پچھلی دہائیوں میں آئی ٹی کے کردار سے کیا جاسکتا ہے۔ انہوں نے مزید کہا کہ آنے والا صنعتی انقلاب ایک حیاتیاتی انقلاب ہوگا ، جس میں ری سائیکلنگ ، از سر نو استعمال ، سرکلر اکنومی اور جدید لائف سائنس جیسی اختراعات شامل ہیں ۔

ڈاکٹر جتیندر سنگھ نے کہا کہ بجٹ میں غیر متعدی بیماریوں اور ذہنی صحت پر بھی توجہ دی گئی ہے ، جن شعبوں کو پچھلی دہائیوں میں نظر انداز کیا گیا تھا ۔ انہوں نے اعلان کیا کہ شمالی بھارت میں ذہنی صحت کے لیے نئے سپر اسپیشلٹی تعلیمی اور طبی ادارے قائم کیے جائیں گے ، جس سے دیکھ بھال کے لیے وسیع تر اور زیادہ مساوی رسائی کو یقینی بنایا جائے گا ۔

انہوں نے آیور وید اور دوا سازی کی تعلیم کے نئے ادارے قائم کرنے کے فیصلے کو بھی اجاگر کیا اور کہا کہ ان اقدامات سے روایتی ادویات کے نظام کو تقویت حاصل ہو  گی اور انہیں جدید تحقیق اور  حفظانِ صحت خدمات کی فراہمی کے ساتھ مربوط کیا جائے گا ۔

وزیر موصوف نے کہا کہ 2035  ء تک  ایٹمی بجلی گھروں کے لیے درآمد شدہ اجزاء پر کسٹمزمحصول میں چھوٹ کی توسیع سے پروجیکٹ کی کارکردگی میں بہتری آئے گی اور قابل اعتماد گھریلو  اور بین الاقوامی سرمایہ کاری کو راغب کیا جائے گا ۔ انہوں نے کہا کہ یہ حالیہ اصلاحات سے مطابقت رکھتا ہے، جس کا مقصد ایٹمی ایکو نظام میں نجی شعبے کی شراکت  داری کو بڑھانا ہے ۔

ڈاکٹر جتیندر سنگھ نے  نایاب معدنیاتی کاریڈورز اور اہم معدنی اقدامات کی ترقی کا بھی ذکر کرتے ہوئے کہا کہ یہ درآمدات پر انحصار کو کم کرتے ہوئے  ، ماحولیات کے لیے ساز گار توانائی کی ٹیکنالوجیز ، الیکٹرانکس مینوفیکچرنگ اور اسٹریٹجک صنعتوں کی مدد کریں گے ۔

قومی جغرافیائی مشن کو ایک بنیادی اصلاح قرار دیتے ہوئے  ، وزیر موصوف نے کہا کہ یہ منصوبہ بند شہر کاری ، بنیادی ڈھانچے کے ڈیزائن اور زمین کے بندوبست میں فیصلہ کن کردار ادا کرے گا ، خاص طور پر جب بھارت میں گاؤوں سے شہروں میں نقل مکانی میں تیزی سے اضافہ ہو رہا ہے ۔ پی ایم گتی شکتی پلیٹ فارم کے ذریعے نافذ کیا گیا یہ مشن سیٹلائٹ ، ڈرون اور نقشہ سازی کے جدید آلات کا استعمال کرتے ہوئے شواہد پر مبنی منصوبہ بندی کو قابل رسائی بنائے گا ۔

ڈاکٹر جتیندر سنگھ نے صنعتوں سے کاربن کے اخراج کو ختم کرنے  ، سرکلر اکنومی اور ماحولیاتی پائیداری کی سمت ایک اہم قدم کے طور پر کاربن کیپچر ، یوٹیلائزیشن اینڈ اسٹوریج (سی سی یو ایس) کے لیے  20,000  کروڑ روپے  مختص کئے جانے کے بارے میں بھی بتایا  ۔ اس بات کو یقینی بناتے ہوئے کہ کسانوں کو ٹیکنالوجی سے فائدہ ہو  اور  اس کے غیر ارادی اثرات سے محفوظ رکھتے ہوئے  ، انہوں نے زراعت میں مصنوعی ذہانت کی منظم تعیناتی کا بھی اعلان کیا  ۔ 

وزیر موصوف نے کہا کہ بجٹ سبھی کی شمولیت کو یقینی بناتا ہے ، جس میں ایسے اقدامات شامل ہیں  ، جن سے غریب ترین طبقوں کو براہ راست فائدہ حاصل ہوتا ہے ، جن میں حفظانِ صحت  تک بہتر رسائی ، سستی دوائیں ، ضلعی سطح پر کینسر کی دیکھ بھال کی سہولیات ، خواتین کے زیر قیادت کاروباری پروگرام اور سائنس پر مبنی اقدامات کے ذریعے روزی روٹی  کے مواقع پیدا کرنا شامل ہیں ۔

سائنس اور ٹیکنالوجی کے محکمے کے سکریٹری پروفیسر ابھے کرندیکر نے کہا کہ بجٹ میں سائنس ، ٹیکنالوجی اور اختراع پر زور دیا گیا ہے  ۔ وزیر خزانہ کی تقریر میں ‘‘ ٹیکنا لوجی ’’  کی اصطلاح بار بار نظر آتی ہے ۔ انہوں نے سائنس کی تحقیق و ترقی کے بنیادی ڈھانچے کی دو بڑی سہولیات ، 30 میٹر طویل نیشنل آپٹیکل ٹیلی اسکوپ اور پینگونگ جھیل کے قریب ایک نیشنل لارج سولر ٹیلی اسکوپ بنانے کا اعلان کیا ، جو  بھارت کے خلائی اور شمسی مشنوں کی تکمیل کرے گا اور عالمی سائنسی تعاون  میں نمایاں طور پر اضافہ کرے  گا ۔

بایوٹیکنالوجی  کے محکمے کے سکریٹری ڈاکٹر راجیش ایس گوکھلے نے کہا کہ بایو فارما شکتی پروگرام کامیاب نیشنل بایوفارما مشن پر مبنی ہے اور اس سے تحقیق کو مینوفیکچرنگ میں تبدیل کرنے میں تیزی آئے گی ۔ انہوں نے کہا کہ یہ پہل صنعت و تعلیمی شراکت داری ، مشترکہ بنیادی ڈھانچے ، کلینیکل ٹرائل نیٹ ورک اور ویکسین کی ترقی کو مضبوط کرتا ہے ، جب کہ بایو ٹیکنالوجی پر مبنی کاربن کے استعمال کی ٹیکنالوجیز کو بھی مربوط کرتا ہے ۔

ارضیاتی سائنسز کی وزارت کے سکریٹری ڈاکٹر ایم روی چندرن نے سمندری معیشت کے تحت اہم اقدامات کا خاکہ پیش کیا ، جن میں قومی آبی گزرگاہوں کی توسیع ، ساحلی سیاحت ، سمندر کے کنارے اور گہرے سمندر میں ماہی گیری اور پائیدار جہاز رانی شامل ہیں ۔ انہوں نے کہا کہ علاقائی سمندر سے آگے اور گہرے سمندروں میں ماہی گیری کی اجازت دینے والی نئی پالیسیاں ماحولیاتی ذمہ داری کو یقینی بناتے ہوئے  ، اہم معاشی مواقع کے لیے راہ ہموار کرے  گی ۔

سی ایس آئی آر کے ڈائریکٹر جنرل اور ڈی ایس آئی آر کے سکریٹری ڈاکٹر این کلائی سلوی نے کہا کہ سی ایس آئی آر بجٹ کے متعدد اقدامات میں مرکزی کردار ادا کرے گا ، جن میں سی سی یو ایس ، سیمی کنڈکٹر ، اہم معدنیات ، نایاب ارضیاتی میگنیٹ ، ماحولیات کے لیے ساز گار توانائی اور جدید مینوفیکچرنگ شامل ہیں ۔ انہوں نے کہا کہ سی ایس آئی آر لیبارٹریوں کو اہم دھاتوں اور معدنیات کے لیے بہترین مراکز کے طور پر نامزد کیا گیا ہے ، جو قومی تحقیقی صلاحیتوں کو صنعتی اور اسٹریٹجک ضروریات کے مطابق بناتے ہیں ۔

اس بات چیت کا اختتام کرتے ہوئے  ، ڈاکٹر جتیندر سنگھ نے کہا کہ بجٹ ایک مشن پر مبنی نقطہ نظر کی عکاسی کرتا ہے ، جہاں تحقیق ، مینوفیکچرنگ اور تعیناتی ایک ساتھ آگے بڑھتے ہیں ۔ انہوں نے کہا کہ بجٹ کے بعد اعلان کردہ سائنس پر مبنی اصلاحات ٹیکنالوجی پر مبنی عالمی شعبوں میں مسابقت کرنے کے لیے ، بھارت کی تیاری کو اجاگر کرتی ہیں  اور اس بات کو  بھی یقینی بناتی ہیں کہ ترقی جامع ، پائیدار اور شہریوں پر مرکوز  ہو ۔

 

۔۔۔۔۔۔۔۔۔۔۔۔۔۔۔۔۔۔۔۔ ۔ ۔ ۔ ۔ ۔ ۔ ۔ ۔ ۔ ۔ ۔ ۔ ۔ ۔ ۔ ۔ ۔ ۔ ۔ ۔ ۔۔۔۔۔۔۔۔۔۔۔۔۔۔۔۔۔۔۔۔

( ش ح۔م ع  ۔ع ا  )

U.No. 1457

(ریلیز آئی ڈی: 2222272) وزیٹر کاؤنٹر : 7