કેન્દ્રીય કૃષિ અને ખેડૂત કલ્યાણ તથા ગ્રામીણ વિકાસ મંત્રી શ્રી શિવરાજ સિંહ ચૌહાણે આજે રાયપુરમાં રાજ્ય સ્તરીય સમીક્ષા બેઠક બાદ પત્રકારો સાથેની વાતચીતને સંબોધતા જણાવ્યું હતું કે છત્તીસગઢ કૃષિ અને ગ્રામીણ વિકાસના ક્ષેત્રોમાં નોંધપાત્ર પ્રગતિ કરી રહ્યું છે. તેમણે માહિતી આપી હતી કે સ્થાનિક કૃષિ-આબોહવાની પરિસ્થિતિઓને અનુરૂપ પાક વૈવિધ્યીકરણ અને ઉત્પાદકતા વધારવા માટેની વ્યૂહરચના વિકસાવવા માટે કેન્દ્ર અને રાજ્ય સરકારોના વૈજ્ઞાનિકો, ખેડૂતો અને અધિકારીઓની બનેલી એક સંયુક્ત ટીમ આ અઠવાડિયે રચવામાં આવશે. આ સાથે સમગ્ર રાજ્યમાં નાના અને સીમાંત ખેડૂતો માટે વૈવિધ્યસભર આવકના સ્ત્રોત ઊભા કરવા માટે સંકલિત કૃષિ પ્રણાલી અને કાર્યક્રમો અમલમાં મૂકવામાં આવશે.

કેન્દ્રીય મંત્રીએ જણાવ્યું હતું કે માનનીય મુખ્ય મંત્રી શ્રી વિષ્ણુ દેવ સાયના નેતૃત્વમાં રાજ્ય સરકાર કૃષિ અને ગ્રામીણ વિકાસના તમામ પરિમાણો પર સક્રિયપણે કામ કરી રહી છે. તેમણે ખાપરી ખાતે ખેડૂતો સાથે સીધો સંવાદ કર્યો હતો, જ્યાં તેમણે આધુનિક કૃષિ પદ્ધતિઓના સ્વીકારની સમીક્ષા કરી હતી. પત્રકાર પરિષદ દરમિયાન મુખ્ય મંત્રી શ્રી વિષ્ણુ દેવ સાય, નાયબ મુખ્ય મંત્રી શ્રી વિજય શર્મા અને રાજ્યના કૃષિ મંત્રી શ્રી રામવિચાર નેતામ પણ ઉપસ્થિત રહ્યા હતા.

કેન્દ્રીય મંત્રીએ ફળ અને શાકભાજીની ખેતી, કલમ (ગ્રાફ્ટિંગ) નર્સરી, ટામેટા અને કેપ્સિકમની ભાટા પદ્ધતિથી ખેતી અને ડ્રેગન ફ્રૂટ, ખજૂર, બ્લૂબેરી અને કેળાની ખેતી સાથે સંબંધિત અદ્યતન ખેતી પદ્ધતિઓનું નિરીક્ષણ કર્યું હતું. તેમણે નિર્દેશ કર્યો હતો કે જ્યારે પરંપરાગત પાકો પ્રતિ એકર ₹35,000–40,000 ની આવક આપે છે, ત્યારે આધુનિક બાગાયત અને હાઈ-ટેક ખેતી પદ્ધતિઓ અપનાવવાથી ખેડૂતોની આવક વધીને પ્રતિ એકર ₹1–2 લાખ થઈ શકે છે. કૃષિ વિભાગની ટીમોએ જંતુનાશકોના વૈજ્ઞાનિક ઉપયોગ, રોગ વ્યવસ્થાપન અને વધુ ઉપજ આપતી પાકની જાતોની પસંદગી અંગે માર્ગદર્શન પૂરું પાડ્યું હતું.

શ્રી ચૌહાણે જણાવ્યું હતું કે પડતર જમીન પર કઠોળના ઉત્પાદનને પ્રોત્સાહન આપવા માટે વિશેષ પહેલ કરવામાં આવશે. મસૂર, અડદ, મગ અને તુવેર જેવા કઠોળની લઘુત્તમ ટેકાના ભાવ (MSP) પર ખરીદી સુનિશ્ચિત કરવામાં આવશે. સાથોસાથ મગફળી, રાયડો અને પામ ઓઈલ સહિતના તેલીબિયાં પાકોની ખેતીને પણ પ્રોત્સાહિત કરવામાં આવશે.

કેન્દ્રીય મંત્રીએ વધુમાં જણાવ્યું હતું કે નાના અને સીમાંત ખેડૂતોને આવકના અનેક સ્ત્રોતો પૂરા પાડવા માટે રાજ્યમાં સંકલિત કૃષિ પ્રણાલીઓ લાગુ કરવામાં આવશે. આ પ્રણાલીઓમાં પશુપાલન, મત્સ્યપાલન, બાગાયત, ઔદ્યોગિક પાકો અને જૈવિક ખેતીનો સમાવેશ થશે, જે ખેડૂતોને આવકની સ્થિરતા વધારવા માટે સક્ષમ બનાવશે.

ગ્રામીણ વિકાસ ક્ષેત્રના મુખ્ય આંકડાઓ શેર કરતા શ્રી ચૌહાણે માહિતી આપી હતી કે પ્રધાનમંત્રી આવાસ યોજના હેઠળ છત્તીસગઢમાં છેલ્લા દોઢ વર્ષમાં 18,12,742 મકાનો મંજૂર કરવામાં આવ્યા છે અને વિતરણ કરવામાં આવ્યા છે. પ્રધાનમંત્રી ગ્રામ સડક યોજના હેઠળ રાજ્યભરમાં 47,847 કિલોમીટરની કુલ લંબાઈ ધરાવતા 10,199 રસ્તાઓ અને 123 મુખ્ય પુલોનું નિર્માણ કરવામાં આવ્યું છે.

મહિલા સશક્તિકરણ પર ભાર મૂકતા કેન્દ્રીય મંત્રીએ કહ્યું કે સ્વ-સહાય જૂથો (SHGs) દ્વારા 'લખપતિ દીદી' યોજના ઝડપી ગતિએ અમલમાં મૂકવામાં આવી રહી છે. હાલમાં 2,76,000 SHGs સાથે 30,68,000 મહિલાઓ જોડાયેલી છે, જ્યારે 4,32,000 મહિલાઓ માઇક્રો-એન્ટરપ્રાઇઝ (લઘુ ઉદ્યોગો) માં સક્રિયપણે સંકળાયેલી છે. વધુમાં, મહિલા લાભાર્થીઓને ક્રેડિટ સપોર્ટ (ધિરાણ સહાય) તરીકે ₹11,196.16 કરોડ પૂરા પાડવામાં આવ્યા છે.

કેન્દ્રીય મંત્રીએ જણાવ્યું હતું કે કેન્દ્ર અને રાજ્ય સરકારો છત્તીસગઢમાં કૃષિ અને ગ્રામીણ વિકાસના દરેક પાસાઓમાં ગાઢ સંકલન સાથે કામ કરી રહી છે. પ્રધાનમંત્રી શ્રી નરેન્દ્ર મોદીના નેતૃત્વમાં ભારત સરકાર રાજ્યમાં ગ્રામીણ અને કૃષિ વિકાસને વેગ આપવામાં કોઈ કસર બાકી રાખશે નહીં. તેમણે મુખ્ય મંત્રી અને રાજ્ય સરકારની ટીમને તેમના ઉત્કૃષ્ટ કાર્ય બદલ અભિનંદન પાઠવ્યા હતા અને પુનરોચ્ચાર કર્યો હતો કે ખેડૂતો, ગરીબ પરિવારો અને મહિલાઓને સશક્ત બનાવવાના ઉદ્દેશ્યવાળી તમામ પહેલો ઝડપી ગતિએ અમલમાં મૂકવામાં આવી રહી છે.

SM/DK/GP/JD

(रिलीज़ आईडी: 2221350) आगंतुक पटल : 5