بجلی کی وزرت کا دو روزہ ’چنتن شیور‘ جو 23–22 جنوری 2026 کو پروانو، ہماچل پردیش میں منعقد ہوا، آج اختتام پذیر ہو گیا۔ اس شیور کا انعقاد ہندوستان کے بجلی کے شعبے کے مستقبل کے لائحۂ عمل پر غور و فکر، تبادلۂ خیال اور اجتماعی طور پر سمت متعین کرنے کے مقصد سے کیا گیا تھا۔

اس تقریب میں بجلی اور ہاؤسنگ و شہری امور سے متعلق مرکزی وزیر جناب منوہر لال، مرکزی وزیرِ مملکت برائے توانائی اور نئی و قابلِ تجدید توانائی، جناب شری پد نائک، سیکریٹری (بجلی)، بجلی کی وزارت کے سینئر افسران، سینٹرل الیکٹریسٹی اتھارٹی (سی ای اے)، سینٹرل الیکٹریسٹی ریگولیٹری کمیشن (سی ای آر سی)، مرکزی سرکاری ادارے (سی پی ایس ای)، ریاستی حکام، ریاستی بجلی ریگولیٹری کمیشنز (ایس ای آر سی) اور صنعت کے قائدین و ماہرین جس میں  ماہرینِ تعلیم  بھی شامل ہیں، نے شرکت کی۔

کل (22 جنوری) افتتاحی خطاب کے دوران جناب منوہر لال نے بھارت کے بجلی کے شعبے کی کامیابیوں کو اجاگر کیا۔ انہوں نے اس بات پر زور دیا کہ بجلی کے شعبے کو درپیش مستقل مسائل اور چیلنجز کا سامنا کرنا اور ان کے حل کے طریقے وضع کرنا ناگزیر ہے، کیونکہ وکست بھارت @ 2047 کے طویل مدتی معاشی نظریہ کے لیے ایک مضبوط، پائیدار بجلی کا شعبہ درکار ہے جو قابلِ اعتماد، کم لاگت اور صاف توانائی فراہم کرنے کی صلاحیت رکھتا ہو۔

دو روزہ مشاورت اور تبادلۂ خیال کے دوران بنیادی طور پر درج ذیل نکات پر توجہ مرکوز کی گئی:

· مالی استحکام، معاشی مسابقت اور توانائی کی منتقلی کو یقینی بنانے کے لیے مجوزہ الیکٹریسٹی ترمیمی بل، 2026

· مجوزہ الیکٹریسٹی پالیسی 2026 تاکہ وکست بھارت 2047 اور توانائی میں خود کفالت کے ہدف کو حاصل کیا جا سکے

· جوہری توانائی پر مبنی بجلی گھروں کی ترقی میں تیزی لانا

· تقسیم کے شعبے میں اصلاحاتی اقدامات تاکہ طویل مدت تک پائیدار نتائج حاصل کیے جا سکیں

· ترسیل کے نظام، تقسیم شدہ توانائی وسائل اور توانائی ذخیرہ کرنے کے نظام کو بہتر بنانا تاکہ ترسیلی اخراجات کم ہوں، تقسیم شدہ توانائی وسائل کی حوصلہ افزائی ہو اور 2030 تک 300 گیگا واٹ آور ذخیرہ کرنے کی صلاحیت کے ہدف کو حاصل کیا جا سکے — درپیش چیلنجز اور آئندہ کا لائحۂ عمل

· قانونی تنازعات میں کمی لانے اور ضابطہ بندی میں نرمی پر توجہ دینے کے لیے عملی منصوبہ

شرکاء نے کلیدی اصلاحات پر کھلی اور جامع بحث اور غور و خوض کیا جس کا مقصد سیکٹر کی مالی صحت کو بحال کرنا، کاروبار کرنے میں آسانی کو فروغ دینا، قابل گریز قانونی چارہ جوئی کو کم کرنا، ریگولیٹری جوابدہی کو مضبوط بنانا اور صارفین کو پاور ایکو سسٹم کے مرکز میں رکھنا اور اپنی متعلقہ تنظیموں سے عملی معلومات کا اشتراک کرنا، اور حقیقی توازن پر توجہ مرکوز کرنا۔

چنتن شیورکے پہلے دن (22 جنوری)، شرکاء نے بجلی ترمیمی بل 2026 کے مسودے میں درکار تبدیلیوں پر تبادلہ خیال کیا جس میں تقسیم کے لائسنس دہندگان کے مالیاتی عملداری کے ساتھ ساتھ ہندوستانی صنعت کی معاشی مسابقت کو حاصل کرنے میں ڈھانچہ جاتی ناہمواریوں اور چیلنجوں سے نمٹنے کی کوشش کی گئی ہے اور جس کا مقصد جدید توانائی کے قانونی فریم کو فروغ دینا ہے۔ کاروبار کرنا، اور ریگولیٹری جوابدہی کو بڑھانا جبکہ اس بات کو یقینی بنانا کہ صارفین کے مفادات محفوظ رہیں۔

مجوزہ قومی بجلی پالیسی، 2026 پر بھی تفصیلی غور و خوض کیا گیا۔ اس پالیسی کے تحت 2030 تک فی کس بجلی کے استعمال کو 2,000 کلو واٹ آور اور 2047 تک 4,000 کلو واٹ آور سے زائد تک لے جانے کا ہدف مقرر کیا گیا ہے۔ اس کے علاوہ 2030 تک اخراجی شدت کو 2005 کی سطح کے مقابلے میں 45 فیصد کم کرنے اور 2070 تک نیٹ زیرو کے ہدف کے حصول کا عزم بھی شامل ہے، جس کے لیے کم کاربن توانائی کی جانب منتقلی ناگزیر قرار دی گئی ہے۔

یہ پالیسی مسابقت کے فروغ، بجلی کے گرڈ کی لچک (ریزیلینس) کو مضبوط بنانے تاکہ متغیر قابلِ تجدید توانائی کے بڑھتے ہوئے حصے کو مؤثر طور پر ضم کیا جا سکے، اور مانگ سے متعلق اقدامات کے ذریعے صارف مرکوز خدمات کی فراہمی پر بھی زور دیتی ہے۔ پہلے دن اس موضوع پر نہایت سرگرم اور جامع تبادلۂ خیال ہوا۔ شرکاء نے ملک میں جوہری توانائی کی صلاحیت کو تیز رفتاری سے بڑھانے کے لیے درپیش چیلنجز سے نمٹنے کے طریقوں پر بھی ایک نہایت مربوط اور بامعنی اجلاس منعقد کیا۔

دوسرے دن (23 جنوری) شرکاء نے ڈسکام کی طویل مدتی مالی پائیداری کو یقینی بنانے اور برقرار رکھنے کے لیے ساختی اصلاحات پر مبنی حکمتِ عملیوں پر تبادلۂ خیال کیا، جن میں ضروری عملیاتی، مالی اور ضابطہ جاتی اقدامات شامل ہیں۔ اہم توجہ کے نکات میں کراس سبسڈیوں کو معقول بنانا بھی شامل تھا، خصوصاً مینوفیکچرنگ، ریلوے اور میٹرو نظام کے لیے، تاکہ صنعتی مسابقت میں اضافہ ہو اور روزگار کے مواقع پیدا کیے جا سکیں۔ شرکاء نے ترسیلی نظام، تقسیم شدہ توانائی وسائل اور توانائی ذخیرہ کرنے کے نظام کو بہتر بنانے سے متعلق چیلنجز اور آئندہ کے لائحۂ عمل پر بھی ایک خصوصی اجلاس میں غور کیا، جس کا مقصد ترسیلی لاگت میں کمی، تقسیم شدہ توانائی وسائل کی حوصلہ افزائی، اور 2030 تک 300 گیگا واٹ آور ذخیرہ کرنے کی صلاحیت کے ہدف کا حصول ہے۔

آخری اجلاس میں شرکاء نے قانونی تنازعات میں کمی لانے کے طریقوں پر غور و خوض کیا۔ اس بات کا مشاہدہ کیا گیا کہ بجلی کے شعبے میں تنازعات کی ایک بڑی وجہ وضاحت کی کمی، مختلف اور غیر یکساں تشریحات، اور طریقۂ کار میں تاخیر ہے۔ ٹیرف کے تعین، قوانین میں تبدیلی سے متعلق دعوؤں، گرڈ کنیکٹیوٹی، یا تنازعات کے حل کے طریقۂ کار میں موجود نظامی رکاوٹوں کی نشاندہی کے ذریعے معیاری نظام (اسٹینڈرڈائزیشن)، ڈیجیٹلائزیشن اور تیز تر فیصلہ سازی کی جانب پیش رفت کی جا سکتی ہے۔ کم تنازعات کا مطلب یوٹیلیٹیز اور صارفین دونوں کے لیے کم لاگت، اور سرمایہ کاری کے لیے ایک زیادہ صحت مند اور سازگار ماحول ہے۔

جناب منوہر لال نے سی ای اے کی رپورٹ بعنوان “36–2035 تک 100 گیگا واٹ ہائیڈرو پمپڈ اسٹوریج پروجیکٹس  کے حصول کا روڈ میپ” بھی جاری کی، جس میں ہندوستانکے اس منصوبے کی تفصیل دی گئی ہے کہ کس طرح 2030 تک غیر فوسل ایندھن پر مبنی بجلی کی صلاحیت کو 500 گیگا واٹ اور 2035 تک 701 گیگا واٹ تک بڑھانے کے نتیجے میں پیدا ہونے والی بڑھتی ہوئی توانائی ذخیرہ کرنے کی ضروریات کو پورا کیا جائے گا۔رپورٹ کے مطابق توانائی ذخیرہ کرنے کی ضروریات کا تخمینہ 30–2029 تک 62 گیگا واٹ اور 35–2034 تک 161 گیگا واٹ لگایا گیا ہے۔ 2030 کے بعد طویل المدتی توانائی ذخیرہ کرنے کی اہمیت میں نمایاں اضافہ ہوگا، جس کے پیش نظر 36–2035 تک 100 گیگا واٹ پمپڈ اسٹوریج پروجیکٹس( پی ایس پی ) کی تنصیب کا ہدف مقرر کیا گیا ہے۔رپورٹ میں پمپڈ اسٹوریج پروجیکٹس (پی ایس پی) کو ایک آزمودہ، صاف، بڑے پیمانے پر اور طویل المدتی توانائی ذخیرہ کرنے کے حل کے طور پر اجاگر کیا گیا ہے، جو زیادہ تر مقامی ٹیکنالوجیز پر مبنی ہیں۔ رپورٹ میں موجودہ ترقیاتی صورتحال کا جائزہ لیا گیا ہے، ریاست وار صلاحیت کی نشاندہی کی گئی ہے، مرحلہ وار صلاحیت میں اضافے کا منصوبہ پیش کیا گیا ہے، اور گرڈ کی لچک کو مضبوط بنانے اور بھارت کی صاف توانائی کی منتقلی میں مدد کے لیے پالیسی، ضابطہ جاتی اور نفاذ سے متعلق اقدامات کی سفارش کی گئی ہے—بالخصوص آف اسٹریم کلوزڈ لوپ منصوبوں کے فروغ پر زور دیا گیا ہے۔

بجلی کی تقسیم کرنے والی یوٹیلیٹیز کی 14ویں مربوط درجہ بندی اور رینکنگ رپورٹ بھی آج (23 جنوری) چنتن شیور کے موقع پر جاری کی گئی۔اس سال کی درجہ بندی کے عمل میں 65 بجلی کی تقسیم کرنے والی یوٹیلیٹیز کا جائزہ لیا گیا، جن میں سے 31 یوٹیلیٹیز کو اے+ یا اے کی درجہ بندی دی گئی ہے۔ٹورینٹ پاور احمد آباد اور ٹورینٹ پاور سورت نے مالی سال 25-2024 کے لیے درجہ بندی میں پہلی پوزیشن حاصل کی۔ریاستی ملکیت والے ڈسکامز میں، اتر گجرات وج کمپنی لمیٹڈ (یو جی وی سی ایل) نے بہترین درجہ بندی حاصل کی۔

جناب منوہر لال نے تمام متعلقہ فریقین  سے مطالبہ کیا کہ وہ اصلاحات کے وقتاً فوقتاً نفاذ کے لیے قریبی تعاون کے ساتھ کام کریں، اور اس بات پر زور دیا کہ مرکز، ریاستیں، صنعت، یوٹیلیٹیز اور اداروں کے درمیان مسلسل اشتراک بھارت کو بجلی کے شعبے میں عالمی رہنما کے طور پر مستحکم کرنے کے لیے ناگزیر ہے۔

*****

ش ح۔ع و ۔ ق ر

 (U: 972)

(रिलीज़ आईडी: 2217692) आगंतुक पटल : 11