کاٹن کارپوریشن آف انڈیا لمیٹڈ (سی سی آئی)، جو وزارتِ ٹیکسٹائل کے تحت ایک عوامی شعبے کا ادارہ ہے، نے آج مالی سال 2024–25 کے لیے 8.89 کروڑ روپے کا ڈیویڈنڈ چیک نئی دہلی میں منعقدہ ایک پروقار تقریب کے دوران مرکزی وزیرِ ٹیکسٹائل جناب گِری راج سنگھ کو پیش کیا۔ اس موقع پر سیکریٹری، ٹیکسٹائل محترمہ نیلم شمی راؤ اور جوائنٹ سیکریٹری، ٹیکسٹائل محترمہ پدمنی سنگلا کی معزز موجودگی بھی رہی۔ سی سی آئی کے چیئرمین و منیجنگ ڈائریکٹر (سی ایم ڈی) جناب للت کمار گپتا نے یہ منافع کا چیک حوالے کیا۔

مرکزی وزیرِ ٹیکسٹائل نے سی سی آئی کی مسلسل کوششوں کو سراہا اور بھارت کی کپاس اور ٹیکسٹائل ویلیو چین کو مضبوط بنانے کے لیے ترقی، کارکردگی، شفافیت اور اختراع (انوویشن) کی اہمیت پر زور دیا۔ انہوں نے کم از کم امدادی قیمت (ایم ایس پی) کے تحت کپاس کے کسانوں کو منافع بخش قیمتوں کی فراہمی کو یقینی بنانے اور اندرونی کپاس مارکیٹ میں توازن برقرار رکھنے میں سی سی آئی کے کلیدی کردار کو اجاگر کیا۔

سال کے دوران کیے گئے اقدامات کا جائزہ لیتے ہوئے سیکریٹری، ٹیکسٹائل نے سی سی آئی کے انتظامیہ اور ملازمین کی لگن اور کارکردگی کی ستائش کی اور آئندہ اہداف کے حصول اور بھارت کے ٹیکسٹائل شعبے کی عالمی مسابقت کو مزید بہتر بنانے کے لیے وزارت کی مسلسل حمایت کا اعادہ کیا۔

سیکریٹری ٹیکسٹائل نے مزید وضاحت کرتے ہوئے کہا کہ بھارت میں تصدیق شدہ کپاس کے فروغ میں کاٹن کارپوریشن آف انڈیا ایک بنیادی ستون کی حیثیت رکھتی ہے۔ تصدیق شدہ کستوری کپاس بھارت کی تقریباً ستانوے فیصد پیداوار—یعنی ایک لاکھ اٹھاون ہزار گانٹھوں میں سے ایک لاکھ اکیاون ہزار گانٹھیں—کاٹن کارپوریشن آف انڈیا نے فراہم کیں، جس سے معیار کی ضمانت، پیداوار کی مکمل جانچ پڑتال اور اعلیٰ درجے کی عالمی کپاس منڈیوں میں بھارت کی بڑھتی ہوئی موجودگی کو مزید مضبوطی ملی۔

مالی سال 2024–25 کے دوران کاٹن کارپوریشن آف انڈیا نے 20 ہزار 9 کروڑ روپے کا کاروبار حاصل کیا، جو ادارے کی تاریخ کے بلند ترین کاروباری اعداد و شمار میں شامل ہے۔ منافع کی تقسیم اس ادارے کی مضبوط مالی حالت، مؤثر انتظامی صلاحیت اور حکومتِ ہند کے لیے اس کی مسلسل خدمات کی عکاسی کرتی ہے، جبکہ ساتھ ہی کسانوں کے مفادات کے تحفظ اور منڈی میں توازن برقرار رکھنے کی ذمہ داری بھی بخوبی نبھائی گئی۔

کم از کم امدادی قیمت پر خریداری کو مضبوط بنانا اور کسانوں تک رسائی

کم از کم امدادی قیمت کے تحت خریداری کے نظام کو زیادہ مؤثر اور وسیع بنانے کے لیے کاٹن کارپوریشن آف انڈیا نے اپنے خریداری کے ڈھانچے میں توسیع کرتے ہوئے ایک سو پچاس کپاس پیدا کرنے والے اضلاع میں پانچ سو اکہتر خریداری مراکز قائم کیے، جبکہ گزشتہ موسم میں یہ تعداد پانچ سو آٹھ مراکز تھی۔ خریداری مراکز کے قیام کے لیے قواعد میں نرمی سے خاص طور پر چھوٹے اور کم وسائل رکھنے والے کسانوں کو بہتر سہولت حاصل ہوئی، نقل و حمل کے اخراجات کم ہوئے اور انتظار کے وقت میں نمایاں کمی آئی۔

کم از کم امدادی قیمت کے تحت کسانوں کو بااختیار بنانا مرکزی حکومت کی اولین ترجیح رہی، جسے کپاس کسان موبائل ایپلی کیشن کے ذریعے عملی شکل دی گئی۔ اس نظام میں 46 لاکھ سے زائد کسان درج ہو چکے ہیں۔ اس ایپلی کیشن نے خریداری کے پورے عمل کو شفاف، کاغذ سے پاک اور کسان دوست بنا دیا ہے، جس کے تحت خود اندراج، پیشگی وقت کا انتخاب، شناختی نمبر سے منسلک ادائیگی اور ہر مرحلے پر بروقت پیغامات کی سہولت فراہم کی جاتی ہے، چاہے وہ اندراج ہو، خریداری ہو، بل کی تیاری ہو یا ادائیگی۔

خریداری کے عمل کی نگرانی ہر زرعی منڈی میں مقامی نگرانی کمیٹیوں کے ذریعے کی گئی، جنہیں شکایات کے فوری ازالے کے لیے مخصوص ہیلپ لائنز اور پیغام رسانی نمبرز کی سہولت فراہم کی گئی۔ اخبارات، ریڈیو، سماجی ذرائع ابلاغ اور مقامی زبانوں میں آگاہی مہمات کے ذریعے کسانوں کی باخبر اور ہمہ گیر شرکت کو یقینی بنایا گیا۔

ڈیجیٹل نظام اور قابلِ سراغی

کاٹن کارپوریشن آف انڈیا نے جدید ڈیجیٹل نظام کے ذریعے کپاس کی گانٹھوں کی سو فیصد شناخت اور سراغ رسانی حاصل کر لی ہے، جس کے تحت خریداری سے لے کر پراسیسنگ تک ہر مرحلے کی مکمل نگرانی ممکن ہو گئی ہے۔

خریداروں کے لیے کاروبار کو آسان بنانے کی غرض سے ادارے نے آن لائن نظام متعارف کرایا ہے جس کے ذریعے کپاس کے بیج اور گانٹھوں کی بغیر کاغذ اور بغیر براہِ راست رابطے کے نیلامی کی جاتی ہے۔ اس نظام میں فوری معلوماتی خاکے، ڈیجیٹل معاہدے، بل اور داخلی اجازت نامے شامل ہیں، جو ادارے کے مرکزی انتظامی نظام سے مکمل طور پر منسلک ہیں۔

******

ش ح۔ ش ا ر۔ ول

Uno-895

(रिलीज़ आईडी: 2217060) आगंतुक पटल : 9