بھارتی فوج نے اپنے تمام فوجی اسٹیشنوں اور اداروں میں بھرپور جوش و جذبے کے ساتھ سابق فوجیوں کا دن منایا، جس کے تحت سابق فوجیوں، ویر ناریوں اور ان کے اہلِ خانہ کے لیے متعدد فلاحی تقاریب کا انعقاد کیا گیا۔ یہ تقریبات نئی دہلی، جے پور، امرتسر، لکھنؤ، رانچی اور راجوری سمیت مختلف اسٹیشنوں پر منعقد ہوئیں۔ جے پور ملٹری اسٹیشن میں، ساؤتھ ویسٹرن کمانڈ کی سرپرستی میں ہونے والی تقریبات کی صدارت چیف آف دی آرمی اسٹاف (سی او اے ایس) جنرل اوپندر دویدی نے کی۔ اس کے بعد دن کے دوران، سی او اے ایس نے ایک علیحدہ انویسٹیچر تقریب کے موقع پر بہادر فوجیوں اور یونٹوں کو بہادری کے اعزازات، سی او اے ایس اعزازنامے اور تعریفی اسناد بھی عطا کیں۔

چیف آف دی آرمی اسٹاف (سی او اے ایس) نے جے پور ملٹری اسٹیشن کے پولو گراؤنڈ میں منعقدہ آرمی ویٹرنز ڈے لنچ میں شرکت کی، جہاں انہوں نے سابق فوجیوں اور ویر ناریوں سے ملاقات کی اور فوج کی وراثت اور قومی سلامتی میں ان کی عظیم خدمات کو سراہا۔ جنرل دویدی نے ان ضلعی سینک بورڈوں کے عہدیداروں کو بھی اعزازات سے نوازا جنہوں نے سابق فوجیوں کے مسائل کے حل کے لیے انتھک محنت کی ہے اور ڈائریکٹوریٹ آف انڈین آرمی ویٹرنز کی جانب سے تیار کردہ رسالہ ’سمّان‘ کا اجرا بھی کیا۔ اس موقع پر آرمی ویمنز ویلفیئر ایسوسی ایشن (اے ڈبلیو ڈبلیو اے) کی صدر محترمہ سنیتا دویدی نے ویر ناریوں اور ویر ماتاؤں کی بھی پذیرائی کی۔

اپنے خطاب میں چیف آف دی آرمی اسٹاف (سی او اے ایس) نے سابق فوجیوں، ویر ناریوں اور ان کے اہلِ خانہ کو دلی مبارکباد پیش کی اور ان بہادر جانبازوں کو خراجِ عقیدت پیش کیا جنہوں نے ملک کے لیے اپنی جانوں کا نذرانہ پیش کیا۔ انہوں نے اس عزم کا اعادہ کیا کہ سابق فوجیوں اور شہیدوں کے اہل خانہ کی فلاح و بہبود بھارتی فوج کی اولین ترجیح اور ایک مستقل ذمہ داری ہے۔ جنگ کے بدلتے ہوئے کردار کو اجاگر کرتے ہوئے انہوں نے جدید کاری، ٹیکنالوجی کے انضمام اور عملیاتی تیاری پر فوج کی مسلسل توجہ پر زور دیا، جبکہ عزت، جرات اور فرض جیسے بنیادی اقدار کو برقرار رکھنے کی اہمیت بھی واضح کی۔ سی او اے ایس نے سابق فوجیوں کو فوجی اقدار کے رول ماڈل اور تاحیات سفیر قرار دیا اور قومی یکجہتی، نظم و ضبط اور استقامت کو مضبوط بنانے کے لیے نوجوانوں اور معاشرے کے ساتھ مسلسل رابطے پر زور دیا۔ انہوں نے سابق فوجیوں تک رسائی اور فلاحی اقدامات کو مستحکم بنانے میں سول انتظامیہ اور تمام متعلقہ فریقوں کے تعاون پر بھی اظہارِ تشکر کیا۔

آرمی انویسٹیچر تقریب کے موقع پر چیف آف دی آرمی اسٹاف (سی او اے ایس) نے اعزازات پیش کیے۔ نمایاں اعزازات میں 10 سینا میڈل (بہادری) اور 49 سی او اے ایس یونٹ سائٹیشن شامل تھیں، جبکہ 60 یونٹس کو سی او اے ایس سرٹیفکیٹس آف اپریسی ایشن بھی عطا کیے گئے (جن میں آپریشن سندور کے لیے 26 اعزازات شامل ہیں)، جو تمام کمانڈ میں یونٹ کی شاندار کارکردگی کا اعتراف تھے۔ یہ اعزازات ان اہلکاروں کی جرات، لگن اور مثالی خدمات کو خراجِ تحسین پیش کرتے ہیں جو مسلسل امتیازی انداز میں ملک کی خدمت کر رہے ہیں۔ میدانِ جنگ سے ہٹ کر خدمات کے اعتراف کے طور پر، چھ سابق فوجیوں کو نمایاں کارکردگی کے حامل افراد اور تین شہریوں کو بھی بھارتی فوج کی معاونت میں ان کی ممتاز خدمات پر اعزاز سے نوازا گیا۔

یہ تقریبات 15 جنوری 2026 کو بھی جاری رہیں گی، جب آرمی ڈے پریڈ محل روڈ، جے پور پر منعقد کی جائے گی، جس کے بعد سوائی مان سنگھ اسٹیڈیم، جے پور میں شوریہ سندھیا کا اہتمام ہوگا۔ ان تقریبات کے ذریعے بھارتی فوج کی پیشہ ورانہ مہارت، عملیاتی تیاری اور عوام کے ساتھ اس کے مضبوط رشتے کا شاندار مظاہرہ کیا جائے گا۔

 

 

                                               **************

ش ح۔ ف ش ع

14-01-2026

                                                                                                                                          U: 604

 

(रिलीज़ आईडी: 2214727) आगंतुक पटल : 7