سڑک نقل و حمل اور شاہراہوں اور کارپوریٹ امور کے وزیر مملکت جناب ہرش ملہوترا نے وکست بھارت ینگ لیڈرز ڈائیلاگ2026 - وکست بھارت سے متعلق نوجوان لیڈروں کے مذاکرات 2026 کے نوجوان شرکاء سے خطاب کیا ، جس میں قوم کی تعمیر و ترقی اور 2047 تک ‘‘وکست بھارت’’ کے قومی وژن کو عملی جامہ پہنانے میں ہندوستان کے نوجوانوں کے اہم کردار کو اجاگر کیا گیا ۔

 نوجوان لیڈروں کا خیر مقدم کرتے ہوئے جناب ملہوترا نے ان نوجوانوں کی خاص طور سے تعریف کی جو کمیونٹیز کی تعمیر و ترقی ، سماجی مقاصد کی وکالت ، ترقیاتی ترجیحات کی حمایت اور مثبت تبدیلی کو فروغ دینے میں سرگرم عمل ہیں ۔  انہوں نے زور دے کر کہا کہ یہ مذاکرہ محض جشن منانے کا پلیٹ فارم نہیں ہے ، بلکہ ایک تعمیری فورم ہے جو نوجوان ہندوستانیوں کو قومی پالیسیوں اور ترجیحات کی تشکیل میں بامعنی طور پر حصہ لینے کے قابل بناتا ہے ۔

جناب ملہوترا نے کہا کہ یہ پہل نوجوانوں کی تبدیلی کی طاقت پر وزیر اعظم کے گہرے اعتماد اور انہیں ہندوستان کے مستقبل کے فعال معمار کے طور پر بااختیار بنانے کے عزم کی عکاسی کرتی ہے۔  یہ مذاکرہ ایک منظم جگہ فراہم کرتا ہے جہاں نوجوان آوازیں اپنے خیالات کا اظہار کر سکتی ہیں ، اہم قومی چیلنجوں سے نمٹ سکتی ہیں اور آنے والے سالوں کے لیے حل فراہم کر سکتی ہیں ۔

وزیر اعظم کے بار بار کے پیغام کو یاد کرتے ہوئے کہ امرت کال کے دوران ہندوستان کے نوجوان ملک کے مستقبل کی تشکیل کریں گے ، جناب ملہوترا نے اس بات کا اعادہ کیا کہ نوجوان شہری 2047 تک ہندوستان کو ایک ترقی یافتہ ملک میں تبدیل کرنے میں فیصلہ کن کردار ادا کریں گے اور وزیر اعظم جناب نریندر مودی کی قیادت میں نوجوانوں کو ہندوستان کی تعمیر وترقی اورترویج و  ترقی کے پیچھے محرک قوت کے طور پر مستقل طور پر تسلیم کیا گیا ہے ۔

جناب ملہوترا نے کہا کہ وزیر اعظم جناب نریندر مودی نے زور دیا ہے کہ ایک لاکھ نوجوان جن کے خاندان کے افراد کا کوئی سیاسی پس منظر نہیں ہے ، انہیں ترقی یافتہ ہندوستان اور مضبوط جمہوریت کے لیے عوامی زندگی کا حصہ بننا چاہیے اور وکست بھارت ینگ لیڈرز ڈائیلاگ اسی کی عکاسی کرتا ہے ۔

وزیر مملکت جناب ملہوترا نے اس بات پر روشنی ڈالی کہ وکست بھارت2047@ ایک اہمیت کے حامل اور جامع وژن کی نمائندگی کرتا ہے ، جس میں معاشی خوشحالی ، سماجی ترقی ، ماحولیاتی پائیداری اور موثر حکمرانی شامل ہے اور نوجوان ، غریب ، خواتین اور کسان ایک ساتھ مل کر اس وژن کے لیے  ریڑھ کی ہڈی کی حیثیت رکھتے  ہیں ۔

وزیر موصوف نے کہا کہ 29 سال کی اوسط عمر کے ساتھ ، ہندوستان عالمی سطح پر سب سے کم عمر ممالک میں سے ایک ہے ۔  دنیا کے تقریبا 20 فیصد نوجوان ہندوستان میں رہتے ہیں ، جو ملک کو اقتصادی ترقی ، اختراع اور سماجی تبدیلی پر اثر انداز ہونے کی بے مثال صلاحیت فراہم کرتے ہیں ۔

جناب ملہوترا نے کہا کہ معیاری تعلیم ، ہنر مندی اور روزگار کے ذریعے نوجوانوں کو بااختیار بنانے کوقومی ترجیح  کی حیثیت حاصل ہے اور روزگار میلے ، پی ایم وشوکرما ، آئی ٹی آئی اپ گریڈیشن ، روزگار سے منسلک ترغیبی اسکیمیں ، اور پردھان منتری وکست بھارت روزگار یوجنا سمیت کئی اہم  اقدامات امنگوں اور مواقع کے درمیان فرق کو ختم کرنے میں مدد کر رہے ہیں ۔ مزید برآں ، پچھلے 1.5 سالوں میں ، حکومت نے تقریبا 11 لاکھ مستقل ملازمتیں فراہم کی ہیں ، جو ایک بے مثال سنگ میل ہے ۔

وزیر موصوف نے خواتین کے لیے  ہنرمندی کی ترقی، کاروباری صلاحیتوں اور ٹیکنالوجی کے ذریعے بااختیار بنانے والے تبدیلی لانے والے پروگراموں کو اجاگر کیا۔ ایسے اقدامات جیسے نمو ڈرون دی دی، مشن شکتی اور لکھپتی دی دی  پروگرام خواتین کو مالی خودمختاری، قیادت کے مواقع اور پائیدار روزگار فراہم کر رہے ہیں۔

وزیر موصوف نے کہا کہ دو لاکھ سے زیادہ اسٹارٹ اپس کے ساتھ ، ہندوستان آج دنیا کے تیسرے سب سے بڑے اسٹارٹ اپ ماحولیاتی نظام کے طور پر کھڑا ہے ۔  اسٹارٹ اپس نے ملک بھر میں 20 لاکھ سے زیادہ روزگار پیدا کیے ہیں ، جو مصنوعی ذہانت ، بائیوٹیکنالوجی ، فنٹیک اور سبز توانائی جیسے شعبوں میں اختراعات کی حوصلہ افزائی کرتے ہیں ۔

جناب ملہوترا نے کہا کہ ہندوستان  میں 2016-17 اور 2022-23 کے درمیان روزگار میں 36 فیصد  اضافہ ہوا  ہے ۔  چار لیبر کوڈز کے ذریعے بڑی لیبر اصلاحات نافذ کی گئیں ہیں ، اور سماجی تحفظ کی کوریج 64.3 فیصد تک بڑھ گئی ہے ، جس سے ہندوستان کو عالمی سطح پر دوسرے نمبر پر رکھا گیا ہے ۔  2017-18 اور 2023-24 کے درمیان کل روزگار 47.5 کروڑ سے بڑھ کر 64.33 کروڑ ہو گیا ، جس سے 16.83 کروڑ روزگار کا اضافہ ہوا  ہے۔

وزیر موصوف نے کہا کہ وکست بھارت ینگ لیڈرز ڈائیلاگ ایک ملک گیر تحریک میں تبدیل ہو گیا ہے جو نوجوانوں کو حکمرانی اور پالیسی مباحثوں سے جوڑتا ہے ۔  عزت مآب وزیر اعظم کے جن بھاگیداری کے وژن کے مطابق ، یہ پہل نوجوانوں کو خیالات کا اظہار کرنے ،مسائل کا  حل تیار کرنے اور ہندوستان کے ترقیاتی سفر کی باغ ڈور سنبھالنے کی ترغیب دیتی ہے ۔

جناب ملہوترا نے مزید زور دے کر کہا کہ وکست بھارت کی تعمیر کے لیے ہر شہری کواپنا کردار ادا کرنا  چاہیے ۔

وزیر موصوف نے نوجوان لیڈروں پر زور دیا کہ وہ اختراع ، صنعت کاری ، ہنر مندی کے فروغ ، سماجی خدمت اور ماحولیاتی ذمہ داری کی حمایت کریں-اس بات کی تصدیق کرتے ہوئے کہ ہندوستان کی ساکھ ، توانائی اور امید آج پہلے سے کہیں زیادہ مضبوط ہے ۔

وکست بھارت سے متعلق نوجوان لیڈروں کے مذاکرات 2026 میں اپنے کلمات کا اختتام کرتے ہوئے جناب ملہوترا نے نوجوان شرکاء کو مبارکباد دی اور ان پر زور دیا کہ وہ عزم و حوصلہ  اور  لگن کے ساتھ آگے بڑھیں اور کہا کہ ہندوستان کا مستقبل ان کے ہاتھوں میں ہے اور ان کے خیالات ، توانائی اور قیادت ملک کو نئی بلندیوں پر لے جائے گی ۔

*******

ش ح ۔م م ع۔ رب

 

U- 455

 

(रिलीज़ आईडी: 2213810) आगंतुक पटल : 4