ભારતીય નૌસેનાનું સ્વદેશી બનાવટનું પરંપરાગત રીતે સીવેલું સઢવાળું વહાણ 'કૌન્ડિન્ય', 29 ડિસેમ્બર 2025ના રોજ ગુજરાતના પોરબંદરથી મસ્કત, ઓમાન સલ્તનત સુધીની તેની પ્રથમ વિદેશી સફર પર રવાના થયું હતું. આ ઐતિહાસિક અભિયાન ભારતની પ્રાચીન દરિયાઈ વિરાસતને જીવંત મહાસાગર સફર દ્વારા પુનર્જીવિત કરવા, સમજવા અને ઉજવવાના પ્રયાસોમાં એક મોટું સીમાચિહ્નરૂપ છે.

વાઈસ એડમિરલ કૃષ્ણા સ્વામીનાથન, ફ્લેગ ઓફિસર કમાન્ડિંગ-ઈન-ચીફ, વેસ્ટર્ન નેવલ કમાન્ડ દ્વારા ભારત ખાતેના ઓમાન સલ્તનતના રાજદૂત હિઝ એક્સેલન્સી ઈસા સાલેહ અલ શિબાનીની ગરિમામય ઉપસ્થિતિમાં, ભારતીય નૌસેનાના વરિષ્ઠ અધિકારીઓ અને પ્રતિષ્ઠિત મહેમાનો સાથે વહાણને વિધિવત રીતે લીલી ઝંડી બતાવી રવાના કરવામાં આવ્યું હતું.

INSV કૌન્ડિન્યનું નિર્માણ પરંપરાગત રીતે સીવેલી શિપબિલ્ડિંગ તકનીકોનો ઉપયોગ કરીને કરવામાં આવ્યું છે, જેમાં કુદરતી સામગ્રી અને પદ્ધતિઓનો ઉપયોગ કરવામાં આવ્યો છે જે સદીઓ જૂની છે. ઐતિહાસિક સ્ત્રોતો અને આઇકોનોગ્રાફિક પુરાવાઓથી પ્રેરિત, આ વહાણ ભારતની સ્વદેશી જહાજ નિર્માણ, સીમેનશિપ (નૌકાયન કળા) અને સમુદ્રી નેવિગેશનની સમૃદ્ધ વિરાસતનું પ્રતિનિધિત્વ કરે છે. આ સફર તે પ્રાચીન સમુદ્રી માર્ગોને પુનર્જીવિત કરે છે જે એક સમયે ભારતના પશ્ચિમ કિનારાને ઓમાન સાથે જોડતા હતા, જેનાથી હિંદ મહાસાગરમાં વેપાર, સાંસ્કૃતિક આદાનપ્રદાન અને સતત સભ્યતાના સંપર્કો સુલભ બન્યા હતા.

આ અભિયાન સહિયારી દરિયાઈ વિરાસતને મજબૂત કરીને અને સાંસ્કૃતિક તથા લોકો વચ્ચેના સંબંધોને ગાઢ બનાવીને ભારત અને ઓમાન વચ્ચેના દ્વિપક્ષીય સંબંધોમાં નોંધપાત્ર વધારો કરશે તેવી અપેક્ષા છે. મસ્કતમાં INSV કૌન્ડિન્યનું આગમન મિત્રતા, પરસ્પર વિશ્વાસ અને આદરના સ્થાયી બંધનોના શક્તિશાળી પ્રતીક તરીકે સેવા આપશે જેણે સદીઓથી બંને દરિયાઈ રાષ્ટ્રોને જોડ્યા છે. આ સફર ગુજરાત અને ઓમાન વચ્ચેના ઊંડા ઐતિહાસિક જોડાણોને પણ પ્રકાશિત કરે છે, જે સહકારના વારસાને પ્રતિબિંબિત કરે છે જે આજ સુધી ચાલુ છે.

આ અભિયાન દ્વારા, ભારતીય નૌસેના દરિયાઈ કૂટનીતિ, વિરાસત સંરક્ષણ અને પ્રાદેશિક સહયોગ પ્રત્યેની તેની પ્રતિબદ્ધતા પર ભાર મૂકે છે. INSV કૌન્ડિન્યની સફર એ ભારતના સભ્યતાલક્ષી દરિયાઈ દૃષ્ટિકોણ અને હિંદ મહાસાગર ક્ષેત્રમાં એક જવાબદાર અને સાંસ્કૃતિક રીતે મૂળ ધરાવતા દરિયાઈ રાષ્ટ્ર તરીકેની તેની ભૂમિકાના પુરાવા સમાન છે.

કમાન્ડર વિકાસ શ્યોરાણ વહાણના સુકાની (સ્કીપર) રહેશે, જ્યારે કમાન્ડર વાય. હેમંત કુમાર, જેઓ આ પ્રોજેક્ટના ખ્યાલથી જ તેની સાથે સંકળાયેલા છે, તેઓ અભિયાનના ઓફિસર-ઇન-ચાર્જ તરીકે સેવા આપશે. ક્રૂમાં ચાર અધિકારીઓ અને નૌસેનાના તેર ખલાસીઓનો સમાવેશ થાય છે.

(रिलीज़ आईडी: 2209607) आगंतुक पटल : 13