Ka IndiaAI Mission, Tnad Electronics bad Information Technology (MeitY), ryngkat ka jingiatreilang bad ka Tnad Information Technology & Communications, Sorkar Meghalaya bad ka IIM Shillong, ki la pynlong ia ka Regional AI Impact Conference kaba nyngkong ha ka 3 tarik u Nohprah 2025. Katkum ka phang pdeng ‘Artificial Intelligence for Citizen Empowerment: Smarter Governance, Better Lives’, kane ka jingïalang ka la sakhi ïa ka jingïashim bynta palat 700 ngut ki briew na ki bynta bapher bapher jong ka imlang sahlang, kaba pynskhem biang ïa ka jingmih jong ka Meghalaya kum ka jaka pdeng ba kongsan na ka bynta ka jingsaindur digital ha ka thaiñ Shatei Lammihngi.

Kane ka forum kadei ka jingialang shuwa ka India - AI Impact Summit 2026, kaba la pynkhreh ban long ha New Delhi, India naduh ka 15 – 20 tarik u Rymphang, 2026 bad kadei shi bynta jong ki prokram ha kylleng ka ri ha kaba yn don 7 tylli ki Regional Conference.

Ha ka jingïasohlang lyngba ka bor internet na ka bynta ka jingai jingkren ba kongsan jong u, u Myntri Sorkar Pdeng ba dei khmih ia ka Tnad Electronics bad IT, Railway bad Information & Broadcasting, u Ashwini Vaishnaw u la ong, “Kumba ka bording ka la pynkylla ïa ka jingim jong kane ka juk, ka AI ka la khren ban long kaba donkam eh na ka bynta ka jingkiew shaphrang jong ka India. Ka thong jong ngi ka long ban pynthikna ba baroh ki ioh bynta ha ka AI khnang ba man la u nongshong shnong un ioh ia ki jingmyntoi jong ka, ban kyntiew ia ka jingseisoh, ban kyntiew ia ka jingpsaindur, bad ban pynbeit ia ki jingeh ha ka pyrthei. Da palat 38,000 tylli ki GPU ha ki jaka common compute bad ki jingthmu ban hikai ïa shi million ngut ki briew ha ka jingtbit ha ka AI, ngi pynthikna ba ka teknoloji kan poi sha man la ki kyndong kynshrot jong ka ri bad kan pynkupbor ïa baroh ki nongshong shnong ban pynwandur ïa ka lawei kaba kham bha, kaba kham ioh bynta lang.”

U Kongsan ha kane ka jingïalang, u Myntri Rangbah ka jylla u Conrad K. Sangma u la ong, “Kane ka jingïalang kan saiñdur ïa ka lawei jong ka teknoloji, ka jingnang jingstad, ka jingsynshar ba la pynïaid da ki data, bad ki kam khaii kiba ngi tei ha ki sngi ban wan. Ngi bei tyngka ha ki IT Park bad pyndonkam ia ka AI ban pynthikna ba ka Meghalaya ka don hakhmat, naduh ka jingkhein lypa ia ka jinglong ka suinbneng na ka bynta ki nongrep haduh ka jingbuddien ia ki longkmie ba armet bad ban buh jingtip ia ki tyllong um. Ban rah shakhmat ia kane, ngi donkam ia ki paralok kiba khlain, bad kane ka jingialang ka dei ban long ka jingkylla ha ka jingwanrah ia ki lad ki lynti bad ki jingiatreilang na ka bynta ki nongseng kam seng jam bad ki nongialam jong ngi ha ka teknoloji.”

U Sangma u la pyllait shuh shuh ïa lai tylli ki sienjam.

1. Ka BHASHINI Hackathon na ka bynta ka jingai jinghikai ha ka ktien khasi bad ktien Garo;

2. Ka MeghDEE na ka bynta ban ïatreilang ban thaw ïa ka jingpynwandur digital da kaba pynïasoh ïa ki samla pule, ki startup bad ki tnad Sorkar;

3. Ka DRISHTI-NE Hackathon na ka bynta ki samla kiba don ka jingangnud ha ka jingsaindur ha ka kam AI.

La soi ruh ïa ka Memorandum of Understanding (MoU) hapdeng ka Tnad Information Technology & Communication, Sorkar Meghalaya bad ka IndiaAI Mission na ka bynta ban buh artylli ki Data & AI Lab ha Meghalaya ha kane ka jingïalang.

Nalor kata, ka Tnad Information Technology & Communication, Sorkar Meghalaya ka la iasoi ruh ia ka MoU bad ka MATH T-Hub na ka bynta ban buh ia ka Satellite Incubation Centre ha nongbah Shillong.

Haba ai jingkren ha ka jingialang, u Sudeep Shrivastava, Joint Secretary ka MeitY, u la ong, “Ka Meghalaya ka pynlong ïa ka jingïalang kaba nyngkong na kine ki regional summit, ka jingpynshisha ïa ka jingbuh hakhmat eh jong ka sorkar India ïa ka thaiñ shatei lammihngi bad ïa ka Act East e Policy jong ka. Kane ka jingïalang kan ai jingkyrshan kaba khraw ïa ki sienjam jong ka jylla ha kaba iadei bad ka  IT bad ki jingpyrshang jong ka ban pyndonkam ïa ka AI kaba don ka jingkitkhlieh na ka bynta ka jingsynshar kaba bha bad ka jingmyntoi kaba kham khraw ïa ki nongshong shnong ha ki sngi ban wan.”

Ka jingïalang ka la pyni ïa ka jingpdiang jong ka Meghalaya ïa ka AI na ka bynta ban ïakhun pyrshah ïa ka jingkylla ka suiñbneng, ka roi ka par kaba ioh bynta lang baroh, bad ka jingpynbha ïa ka jingsynshar, kaba pynkhreh na ka bynta ka India - AI Impact Summit 2026.

****

(Release ID: 2198415) visitor counter : 2